ગિફટ સીટીમાં અબુધાબીની ડીપી વર્લ્ડ બેંકને મળી લીલીઝંડી

 ગિફટ સીટીમાં અબુધાબીની ડીપી વર્લ્ડ બેંકને મળી લીલીઝંડી

ઝડપથી વૈશ્વિક નાણાકીય હબ તરીકે ઉભરી આવેલુ ગુજરાત

અગ્ર ગુજરાત, ગાંધીનગર

ગુજરાત ઇન્ટરનેશનલ ફાઇનાન્સ ટેક-સિટી હવે ઝડપથી વૈશ્વિક નાણાકીય હબ તરીકે ઉભરી રહ્યું છે. આ દિશામાં એક મોટી સફળતા મેળવતા, આબુ ધાબીની અગ્રણી બેંકને ગિફ્ટ સિટીમાં પોતાની શાખા શરૂ કરવા માટે સત્તાવાર મંજૂરી આપવામાં આવી છે. આ બેંક ‘ડીપી વર્લ્ડ’ના નામે પોતાની બેંકિંગ સેવાઓ કાર્યરત કરશે.

યુનાઈટેડ આરબ અમીરાત અને ભારત વચ્ચેના મજબૂત થતા આર્થિક સંબંધોના ભાગરૂપે આ મંજૂરી અત્યંત મહત્વની માનવામાં આવે છે. આબુ ધાબીની આ પ્રથમ બેંક હશે જે ગિફ્ટ સિટીમાં પોતાની ફુલ-ફ્લેજ્ડ બ્રાન્ચ બનાવશે. ‘ડીપી વર્લ્ડ’ બેંક દ્વારા સ્થાપિત થનારી આ બ્રાન્ચ આંતરરાષ્ટ્રીય વેપાર, વિદેશી હૂંડિયામણ અને મોટા કોર્પોરેટ ટ્રાન્ઝેક્શનમાં મહત્વની ભૂમિકા ભજવશે.

ગિફ્ટ સિટીમાં વિદેશી બેંકોના આગમનથી સ્થાનિક વ્યવસાયોને આંતરરાષ્ટ્રીય સ્તરની બેંકિંગ સુવિધાઓ ઘરઆંગણે પ્રાપ્ત થશે. સરકારના પ્રયાસો અને આધુનિક ઇન્ફ્રાસ્ટ્રક્ચરને કારણે હવે વિશ્વની મોટી નાણાકીય સંસ્થાઓ ગુજરાત તરફ આકર્ષાઈ રહી છે. ‘ડીપી વર્લ્ડ’ જેવી મજબૂત બેંકની એન્ટ્રીથી ગિફ્ટ સિટીની વિશ્વસનીયતામાં વધારો થશે અને આગામી સમયમાં અન્ય દેશોની બેંકો પણ અહીં પોતાની કચેરીઓ શરૂ કરે તેવી પ્રબળ શક્યતાઓ છે.

૨૦3૦ સુધીમાં એક લાખ રોજગારીનો ટાર્ગેટ

દાવોસમાં યોજાયેલા વર્લ્ડ ઇકોનોમિક ફોરમ (WEF) 2026 દરમિયાન GIFT Cityએ વૈશ્વિક ફાઇનાન્સના કેન્દ્ર તરીકે પોતાની મજબૂત હાજરી નોંધાવી છે. GIFT Cityના CEO સંજય કૌલે જણાવ્યું હતું કે, GIFT City ઝડપથી આંતરરાષ્ટ્રીય નાણાકીય સેવાઓનું ગ્લોબલ હબ બની રહ્યું છે અને 2030 સુધીમાં અહીં 1 લાખથી વધુ રોજગાર સર્જવાનો લક્ષ્ય રાખવામાં આવ્યો છે.

સંજય કૌલના જણાવ્યા મુજબ GIFT Cityમાં બેંકિંગ, ઇન્શ્યોરન્સ, ફિનટેક, કેપિટલ માર્કેટ્સ અને એસેટ મેનેજમેન્ટ જેવા ક્ષેત્રોમાં વૈશ્વિક કંપનીઓનો વિશ્વાસ સતત વધી રહ્યો છે. અનુકૂળ નિયમનકારી માળખું, વિશ્વસ્તરીય ઇન્ફ્રાસ્ટ્રક્ચર અને ટેકનોલોજી આધારિત ઇકોસિસ્ટમના કારણે GIFT City વિદેશી રોકાણકારો માટે આકર્ષણનું કેન્દ્ર બન્યું છે.

WEF 2026માં GIFT Cityને ભારતના ફાઇનાન્સિયલ ગેટવે તરીકે રજૂ કરવામાં આવ્યું, જ્યાંથી આંતરરાષ્ટ્રીય નાણાકીય પ્રવૃત્તિઓને નવી દિશા મળશે. CEOએ ઉમેર્યું હતું કે, આગામી વર્ષોમાં વધુ વૈશ્વિક બેંકો, નાણાકીય સંસ્થાઓ અને સ્ટાર્ટઅપ્સ GIFT Cityમાં કામગીરી શરૂ કરશે, જેના પરિણામે ગુજરાત અને ભારતની અર્થવ્યવસ્થાને મોટો ફાયદો થશે. GIFT Cityના વિકાસ સાથે ભારતને વૈશ્વિક ફાઇનાન્સિયલ નકશા પર વધુ મજબૂત સ્થાન મળશે અને યુવાનો માટે રોજગારના નવા અવસર ખુલશે.