ભારે વિરોધ બાદ સરકારનો નિર્ણય : મેનેજમેન્ટ ક્વોટામાં 5 લાખની ફી ઘટાડાઇ
GMERSની 13 મેડીકલ કોલેજોમાં ફી ઘટાડાની જાહેરાત કરી છે. ઘટાડાની જાહેરાત બાદ પોણા બે લાખની ફી ઓછી થઇ છે. જો કે સૂત્રોના જણાવ્યા મુજબ અગાઉની ફી કરતા સરકારે ફી વધારી જ દીધી છે. વિદ્યાર્થીઓને એકંદરે વધારે ફી ચુકવવી પડશે. ગુજરતા સરકારની સોસાયટી એવી ગુજરાત મેડિકલ એજ્યુકેશન એન્ડ રિસર્ચ સોસાયટી (GMERS) સંચાલિત અર્ધસરકારી મેડીકલ કોલેજોમાં સરકારે ૬૭ ટકાથી ૮૮ ટકા સુધીનો ધરખમ વધારો કરી દેતા વાલીઓથી માંડી મેડિકલ એસોસિએશન સહિતના વિવિધ સંગઠનો-રાજકીય પક્ષો દ્વારા ઉગ્ર વિરોધ કરવામા આવ્યો હતો અને રાજ્યભરમાં ચોમેર વિરોધ થવા સાથે મેડિકલ શિક્ષણ સસ્તુ : આપવાનો વાયદો ખોટો પડે તેમ હોઈ સરકારની શાખ પર સવાલ આવતા અંતે સરકારે ઝુકવુ પડયુ છે. સરકારે આજે ૧૩ મેડિકલ કોલજોમાં એમબીબીએસની ફીમાં ઘટાડો કરવાની જાહેરાત કરી દીધી છે. જેમાં ૧.૭૫ લાખ રૂપિયાથી લઈને પાંચ લાખ રૂપિયા સુધીનો ઘટાડો કરવામા આવ્યો છે.
સરકારની મંજૂરી બાદ ચાલુ શૈક્ષણિક વર્ષમાં જીએમઈઆરએસ દ્વારા ૧૩ મેડિકલ કોલેજોમાં MBBSની સ્ટેટ ક્વોટાની ફી વધારીને 5.50 લાખ રૂપિયા અને મેનેજમેન્ટ ક્વોટાની ફી ૧૭ લાખ રૂપિયા કરી દેવા ઠરાવ કરવામા આવ્યો હતો.સરકારે ગત વર્ષે પણ જે ફી વધારાનો ઠરાવ કર્યો હતો. તે જ ઠરાવ આ વર્ષે કરી દેવામા આવ્યો હતો. ગત વર્ષે ચૂંટણીનું હોઈ મેડિકલ પ્રક્રિયા થઈ ગયા બાદ ફી વધારો કરવામાં આવતા વિરોધને પગલે સરકારે ફી વધારાનો ઠરાવ રદ કર્યો હતો અને ફી વધારો પાછો ખેંચી લીધો હતો. પરંતુ આ વર્ષે ફરીથી સરાકરે ફી વધારાનો ઠરાવ કરતા ભારે વિરોધ ઉભો થયો હતો. જીએમઈઆરએસ દ્વારા ગત ૨૯મી જૂને કરાયેલા ઠરાવમાં જીએમઈઆરએસની ૧૩ મેડિકલ કોલેજોમાં સરકારી ક્વોટામાં ફી ૩.૪૦ લાખથી વધારીને ૫.૫૦ લાખ અને મેનેજમેન્ટ ક્વોટામાં ૭.૭૫ લાખથી ફી વધારીને ૧૭ લાખ રૂપિયા કરી હતી.
જ્યારે એનઆરઆઈ ક્વોટામાં પણ ફી વધારો કરીને ૨૫ હજાર યુએસ ડોલર કરાઈ હતી. ૧૩ કોલેજોમાં કુલ ૨૧૦૦ બેઠકો છે. જેમાં ૧૫૦૦ સ્ટેટ ક્વોટામાં અને ૨૧૦ મેનેજમેન્ટ ક્વોટાની તથા ૩૧૫ એનઆરઆઈ ક્વોટાની બેઠકો છે.આમ આટલી બધી બેઠકોમાં ધરખમ વધારો થતા ગરીબ-મધ્યમવર્ગના વિદ્યાર્થીઓના વાલીઓ મોટી મુશ્કેલીમાં મુકાયા હતા અને વિદ્યાર્થીઓનું મેડિકલનું સપનું રોળાયુ હતુ. ફ્રી વધારા સામે વિદ્યાર્થીઓ-વાલીઓથી માંડી વિવિધ સંગઠનો અને મેડિકલ એસોસિએશન દ્વારા પણ ઉગ્ર વિરોધ કરાયો હતો.સરકારને પોતાના જ પક્ષના નેતાઓમાંથી પણ ફી ઘટાડાની રજૂઆતો મળી હતી.આમ સરકારે અંતે ઝુકવુ પડયુ છે અને ફી ઘટાડો કરવો પડયો છે.સ્ટેટ ક્વોટામાં ૮૦ ટકા અને મેનેજમેન્ટ ક્વોટામાં ૬૨.૫ ટકા ફી ઘટાડો કરવામા આવ્યો છે.જે સાથે હવે સ્ટેટ ક્વોટામાં રૂ.૩.૭૫ લાખ અને મેનેજમેન્ટ ક્વોટામાં ૧૨ લાખ રૂપિયા ફી રહેશે.
