વૈશ્વિક બજાર પાછળ સોનાચાંદીના ભાવ ઊંચકાયા

મુંબઈ : વૈશ્વિક સોનાચાંદી બજારમાં સપ્તાહ અંતે સુધારો જળવાઈ રહેતા સ્થાનિક સોનાચાંદી બજારમાં પણ ભાવમાં ધીમો સુધારો જોવા મળ્યો હતો. અમેરિકામાં બેરોજગારીના  દાવા અપેક્ષા કરતા વધુ આવતા ફેડરલ રિઝર્વ વ્યાજ દરમાં હવે વધારો નહીં કરે તે ધારણાં મજબૂત બની છે. ડોલર ઈન્ડેકસ  નબળો પડતા સોનાચાંદી મક્કમ રહ્યા હતા. બીજી બાજુ ક્રુડ તેલમાં ચાર મહિનાની નીચી સપાટી જોવા મળ્યા બાદ તેમાં સાધારણ સુધારો જોવા મળ્યો હતો. વૈશ્વિક કરન્સીઝ સામે રૂપિયામાં મિશ્ર પ્રવાહ જોવાયો હતો. 

મુંબઈ ઝવેરી બજારમાં સોનાચાંદીમાં  સુધારો જોવા મળ્યો હતો.  સોનાએ રૂપિયા ૬૧૦૦૦ની જ્યારે ચાંદીએ  ફરી રૂપિયા ૭૩૦૦૦ની સપાટી કુદાવી હતી. અમદાવાદ સોનાચાંદી બજાર  દિવાળીની રજા પૂરી કરી આવતી કાલે લાભપાંચમથી ફરી શરૂ થશે. મુંબઈ સોનું ૯૯.૯૦ દસ ગ્રામના જીએસટી વગરના ભાવ  ૬૦૦ જેટલા વધી રૂપિયા ૬૧૧૭૦ રહ્યા હતા.

જ્યારે ૯૯.૫૦ દસ ગ્રામના રૂપિયા ૬૦૯૨૫ મુકાતા હતા. જીએસટી સાથે ભાવ ત્રણ ટકા ઊંચા મુકાતા હતા.  ચાંદી .૯૯૯ એક કિલોના જીએસટી વગરના ભાવ રૂપિયા ૭૩૭૪૭ રહ્યા હતા.  વૈશ્વિક બજારમાં સોનું એક ઔંસ દીઠ ૧૯૮૯ ડોલર જ્યારે ચાંદી પ્રતિ ઔંસ ૨૪.૦૩ ડોલર મુકાતી હતી. 

કરન્સી બજારમાં મુખ્ય કરન્સીઝ સામે રૂપિયામાં મિશ્ર પ્રવાહ રહ્યો હતો. ડોલર ૩ પૈસાવધી રૂપિયા ૮૩.૨૬, યુરો  ૦૨ પૈસા વધી રૂપિયા ૯૦.૩૪  જ્યારે પાઉન્ડ ૦૪  પૈસા ઘટી રૂપિયા ૧૦૩.૧૮ રહ્યો હતો. ડોલર ઈન્ડેકસ ઘટી ૧૦૪.૦૯ રહ્યો હતો.  ક્રુડ તેલ ચાર મહિનાની નીચી સપાટીએ પહોંચ્યા બાદ તેમાં સુધારો જોવાયો હતો. નાયમેક્સ ડબ્લ્યુટીઆઈ ક્રુડ તેલ પ્રતિ બેરલ ૭૩.૮૧ ડોલર જ્યારે આઈસ  બ્રેન્ટ ક્રુડ ૭૮.૪૯ ડોલર કવોટ કરાતું હતું.