સોના અને ચાંદીમાં વિશ્વ બજાર પાછળ આગેકૂચ: ક્રૂડતેલ તથા કોપરમાં ઘટાડો

મુંબઈ : મુંબઈ ઝવેરી બજારમાં આજે સોના-ચાંદીના ભાવ વધ્યા હતા. વિશ્વ બજાર ઉંચકાતાં ઘરઆંગણે ઈંમ્પોર્ટ કોસ્ટ ઉંચકાઈ હતી. વિશ્વ બજારમાં સોનાના ભાવ ઔંશના ૧૯૭૪થી ૧૯૭૫ વાળા ઉંચામાં ૧૯૯૩થી ૧૯૯૪ થઈ ૧૯૮૨થી ૧૯૮૩ ડોલર રહ્યા હતા. વૈશ્વિક ડોલર ઈન્ડેક્સ વધ્યો હતો પરંતુ બોન્ડ યીલ્ડ ઉંચેથી શ્રઘટતાં વિશ્વ બજારમાં સોનામાં ફંડોનું બાઈંગ ચાલુ રહ્યું હતું સોના પાછળ વૈશ્વિક ચાંદીના ભાવ પણ ઔંશદીઠ ૨૨.૭૭ વાળા ઉંચામાં ૨૩.૧૪ થઈ ૨૨.૯૩થી ૨૨.૯૪ ડોલર રહ્યા હતા. 

દરમિયાન, ઘરઆંગણે આજે અમદાવાદ બજારમાં ચાંદીના ભાવ કિલોના રૂ.૧૦૦૦ વધી  રૂ.૭૩૫૦૦ બોલાયા હતા જ્યારે  અમદાવાદ સોનાના ભાવ ૧૦ ગ્રામના  રૂ.૧૦૦ વધી ૯૯.૫૦ના રૂ.૬૨૪૦૦ તથા ૯૯.૯૦ના રૂ.૬૨૬૦૦ રહ્યા હતા. દરમિયાન, વિશ્વ બજારમાં પ્લેટીનમના ભાવ ઔંશના ૮૯૬થી ૮૯૭ વાળા ઉંચામાં ૯૧૪થી ૯૧૫ થઈ ૯૧૩થી ૯૧૪ ડોલર રહ્યા હતા જ્યારે પેલેડીયમના ભાવ ઔંશદીટ ૧૧૩૫થી ૧૧૩૬ વાળા ઘટી ૧૧૧૨થી ૧૧૧૩ ડોલર રહ્યા હતા વૈશ્વિક કોપરના ભાવ આજે ૦.૩૧ ટકા નરમ હતા. ચીનની સરકારે નવા સ્ટીમ્યુલ્સ પેકેજો  જાહેર કરવા છતાં વિશ્વ બજારમાં કોપર અને ક્રૂડતેલના ભાવમાં ઘટાડો થતાં વૈશ્વિક જાણકારો આશ્ચર્ય બતાવી રહ્યા હતા. અમેરિકામાં ક્રૂડતેલના સ્ટોક વિશે મતમતાંતરો બતાવાઈ રહ્યા હતા. અમેરિકન પેટ્રોલિયમ ઈન્સ્ટીટયુટના જણાવ્યા મુજબ ત્યાં ક્રૂડતેલના સ્ટોકમાં ઘટાડો થયો છે જ્યારે ઈન્ટરનેશનલ એનર્જી એજન્સીના જણાવ્યા મુજબ અમેરિકામાં ક્રૂડતેલના સ્ટોકમાં વૃદ્ધી થઈ છે! આ પ્રશ્ને પણ વિશ્વ બજારમાં આજે ખાસ્સી ચર્ચા જાગી હતી.  દરમિયાન, બ્રેન્ટ ક્રૂડ તેલના ભાવ બેરલદીઠ ૮૮.૪૧ વાળા આજે નીચામાં ૮૭.૫૩  થઈ ૮૭.૬૫ ડોલર રહ્યા હતા જ્યારે  યુએસ ક્રૂડના ભાવ ૮૩.૯૮  વાળા ૮૨.૫૬ થઈ ૮૨.૬૭ ડોલર રહ્યા હતા.

દરમિયાન, મુંબઈ બુલીયન બજારમાં આજે સોનાના ભાવ જીએસટી વગર ૯૯.૫૦ના રૂ.૬૦૩૨૧ વાળા રૂ.૬૦૭૪૦ તથા ૯૯.૯૦ના ભાવ રૂ.૬૦૫૬૪  વાળા રૂ.૬૦૯૮૪ રહ્યા હતા  જ્યારે મુંબઈ ચાંદીના ભાવ જીએસટી  વગર રૂ.૭૧૦૦૪ વાળા રૂ.૭૧૫૬૦ રહ્યા હતા. મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા.

 દરમિયાન, યુરોપથી મળતા સમાચાર મુજબ ત્યાં યુરોપીયન સેન્ટ્રલ બેન્કે જુલાઈ ૨૦૨૨થી શરૂ કરેલી વ્યાજ વધારાની ચાલને બ્રેક વાગી છે  તથા આજની મિટિંગમાં ત્યાં વ્યાજના દર વધુ વધારવાના બગલે જાળવી રાખવાનું નકક્કી કર્યું છે. ત્યાં વ્યાજના દર ૪ ટકાના સ્તરે જાળવી રાખવામાં આવ્યા છે. ત્યાં તાજેતરમાં  ચાલેલી વ્યાજ વધારાની એકધારી ચાલમાં ૨૫ વર્ષનો રેકોર્ડ તૂટયો હતો.