સોનું તૂટી રૂ.59,000ની અંદર: ચાંદી વધુ રૂ.2000 ગબડતાં ખેલાડીઓ સ્તબ્ધ

મુંબઈ : મુંબઈ ઝવેરી બજારમાં આજે સોના-ચાંદીના ભાવમાં મંદી વેગથી આગળ વધી હતી. વિશ્વ બજાર ગબડતાં ઘરઆંગણે ઈંપોર્ટ કોસ્ટ નીચી ઉતરતાં તથા શ્રાદ્ધપક્ષ વચ્ચે નવી માગ ધીમી રહેતાં ઝવેરી બજારમાં આજે વેચનારા વધુ અને લેનારા ઓછા જોવા મળ્યા હતા. વિશ્વ બજારમાં ડોલર ઈન્ડેક્સ તથા બોન્ડ યીલ્ડ વધતાં સોનામાં સેલીંગ ચાલુ રહ્યું હતું. 

 વિશ્વ બજારમાં સોનાના ભાવ ઔંશના ૧૮૩૬થી ૧૮૩૭ વાળા નીચામાં ૧૮૧૫થી ૧૮૧૬ થઈ ૧૮૨૬થી ૧૮૨૭ ડોલર રહ્યા હતા. સોના પાછળ વૈશ્વિક ચાંદીના ભાવ પણ ઔંશના ૨૧.૭૫થી ૨૧.૭૬ વાળા આજે  વધુ ગબડી નીચામાં ૨૦.૬૮ થઈ ૨૧.૦૫થી ૨૧.૦૬ ડોલર રહ્યા હતા. ઘરઆંગણે અમદાવાદ બજારમાં આજે ચાંદીના ભાવ કિલોદીઠ રૂ.૨૦૦૦ તૂટી રૂ.૬૯૫૦૦ બોલાયા હતા જ્યારે અમદાવાદ સોનાના ભાવ ૧૦ ગ્રામના વધુ રૂ.૩૦૦ ઘટી ૯૯.૫૦ના રૂ.૫૮૯૦૦  તથા ૯૯.૯૦ના રૂ.૫૯૧૦૦ બોલાતા થયા હતા.

દરમિયાન, વિશ્વ બજારમાં આજે પ્લેટીનમના ભાવ ઔંશદીઠ ૯૦૦થી ૯૦૧ વાળા નીચામાં ૮૭૧ થઈ ૮૮૦થી ૮૮૧ ડોલર રહ્યા હતા  જ્યારે પેલેડીયમના ભાવ ઔંશના ૧૨૨૫થી ૧૨૨૬ વાળા નીચામાં  ૧૧૮૯ થઈ ૧૧૯૧થી ૧૧૯૨ ડોલર રહ્યા હતા.  વૈશ્વિક કોપરના ભાવ આજે ૦.૬૬ ટકા માઈનસમાં રહ્યા હતા. વિશ્વ બજારમાં ક્રૂડતેલના ભાવ ઉંચેથી ગબડતાં તેની અસર પણ વૈશ્વિક સોનાના ભાવ પર આજે દેખાઈ હતી.

બ્રેન્ટ ક્રૂડતેલના ભાવ બેરલદીઠ ૯૨.૭૦ વાળા નીચામાં ૮૯.૫૦ થઈ ૯૦.૧૮ ડોલર રહ્યા હતા જયારે યુએસ ક્રૂડના ભાવ ૯૧.૧૯ વાળા નીચામાં ૮૭.૭૬ થઈ ૮૮.૩૧ ડોલર રહ્યાના નિર્દેશો હતા. નવી માગ રુંધાતા ક્રૂડમાં નફારૂપી વેચવાલી નિકળી હતી. વિશ્વસ બજારમાં  ડોલર ઈન્ડેક્સ વધી ૧૦ મહિનાની  ટોચે જ્યારે  સોનાના ભાવ ગબડી ૧૦ મહિનાના તળિયે ઉતર્યા હતા.

વિશ્વ બજારમાં ક્રૂડતેલના ભાવ ત્રીજા ત્રિમાસિકમાં  આશરે ૩૦ ટકા વધી ૧૦ મહિનાની ટોચે પહોંચતાં  હવે નફારૂપી વેચવાલી શરૂ થઈ હતી, વિશ્વ બજારમાં ક્રૂડતેલમાં તુર્કીની સપ્લાય પણ વધી છે. ઓપેકના ક્રૂડ ઉત્પાદક દેશો તથા રશિયાની મિટિંગ બુધવારે (આજે) મલવાની છે અને તેના પર હવે બજારની નજર રહી હતી.

સપ્ટેમ્બરમાં ક્રૂડનું વૈશ્વિક ઉત્પાદન વધ્યાના વાવડ હતા. વિશ્વ બજારમાં ચાંદીના ભાવ તૂટી ૭ મહીનાના તળિયે જ્યારે પ્લેટીનમના ભાવ તૂટી ૧૨ મહિનાના તળિયે  ઉતરી ગયાના નિર્દેશો મળ્યા હતા.

મુંબઈ બુલીયન બજારમાં આજે  સોનાના ભાવ જીએસટી વગર ૯૯.૫૦ના રૂ.૫૭૦૦૦ વાળા રૂ.૫૬૩૫૦ થઇ રૂ.૫૬૪૪૮ રહ્યા હતા જ્યારે ૯૯.૯૦ના ભાવ રૂ.૫૭૨૫૦ વાળા રૂ.૫૬૫૭૭ થઈ રૂ.૫૬૬૭૫ રહ્યા હતા. મુંબઈ ચાંદીના ભાવ જીએસટી વગર રૂ.૬૮૮૦૦ વાળા આજે રૂ.૬૭૦૩૭ રહ્યા હતા. મુંબઈ  સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા ઉંચા રહ્યા હતા.