સરકારી નોકરીઓ માટે અરજી કરનારાઓ માટે આ એક મહત્વપૂર્ણ સમાચાર સામે આવ્યા છે, કારણ કે સરકાર ટૂંક સમયમાં બધી ભરતીઓ માટે એક જ પોર્ટલ બનાવવાની યોજના પર કામ શરૂ કરવા જઈ રહી છે. આ માટે કર્મચારી રાજ્યમંત્રી ડૉ. જીતેન્દ્ર સિંહની અધ્યક્ષતામાં એક બેઠક યોજાઈ છે. જેમાં આ બાબતે સંમતિ સધાઈ ગઈ છે. બેઠક બાદ તેમણે જાહેરાત કરી કે સરકાર તમામ સરકારી ભરતીઓ માટે એકીકૃત જોબ એપ્લિકેશન પોર્ટલ વિકસાવવા તરફ કામ કરી રહી છે.
નોકરી શોધનારાઓની ઉર્જા અને સમય બચાવશે
આ પોર્ટલની મદદથી સરકાર એવા લોકોને વધુ સુવિધા આપવા માગે છે, જેઓ નોકરી માટે વિવિધ પોર્ટલ પર માહિતી શોધતા રહે છે. આ પહેલ નોકરી શોધનારાઓની ઉર્જા અને સમય બચાવશે. આ નિર્ણય કર્મચારી અને તાલીમ વિભાગમાં યોજાયેલી ઉચ્ચ સ્તરીય બેઠકમાં લેવામાં આવ્યો છે. આ બેઠક દરમિયાન કેન્દ્રીય મંત્રી જિતેન્દ્ર સિંહે જણાવ્યું હતું કે ભરતી પ્રક્રિયાને વધુ સરળ અને પારદર્શક બનાવવી પડશે, જેના માટે તેમણે ટેકનોલોજી અને નવીનતાઓ અપનાવવાની સરકારની પ્રતિબદ્ધતાનો પુનરોચ્ચાર કર્યો.
જીતેન્દ્ર સિંહે સૂચનાઓ આપી
આ આદેશ અંગે મંત્રાલય દ્વારા એક સત્તાવાર નિવેદન પણ જાહેર કરવામાં આવ્યું છે. આ નિવેદન મુજબ ડૉ. જીતેન્દ્ર સિંહે વિભાગના અધિકારીઓને શક્ય તેટલી વહેલી તકે ‘સિંગલ જોબ એપ્લિકેશન પોર્ટલ’ વિકસાવવા નિર્દેશ આપ્યો છે. તેમને જણાવ્યું કે આ યોજના પર કામ શરૂ થઈ ગયું છે અને ટૂંક સમયમાં પૂર્ણ થશે. તેમણે કહ્યું કે હિન્દી અને અંગ્રેજી ઉપરાંત, આ પોર્ટલ 13 પ્રાદેશિક ભાષાઓમાં શરૂ કરવામાં આવશે.
22 ભાષાઓમાં પરીક્ષાની તૈયારી
કેન્દ્રીય મંત્રી જિતેન્દ્ર સિંહે કહ્યું છે કે સરકારનો ઉદ્દેશ્ય બંધારણની આઠમી અનુસૂચિમાં 22 ભાષાઓમાં સમાવિષ્ટ તમામ પ્રાદેશિક ભાષાઓમાં પરીક્ષાઓ લેવાનો છે. તેમણે કહ્યું કે ભરતી પ્રક્રિયાનો સમયગાળો પહેલા લગભગ 15 મહિનાનો હતો, જે હવે ઘટાડીને 8 મહિના કરવામાં આવ્યો છે. આવનારા સમયમાં તેમાં વધુ ઘટાડો થશે.
