સરકારી કાર્યક્રમો, સાંસ્કૃતિક ઇવેન્ટમાં સ્ટેજને ફૂલોથી શણગારવા મનપા રૂ.૯પ લાખ ખર્ચશે

 સરકારી કાર્યક્રમો, સાંસ્કૃતિક ઇવેન્ટમાં સ્ટેજને ફૂલોથી શણગારવા મનપા રૂ.૯પ લાખ ખર્ચશે

 સેન્ટ્રલમાં ૬૨.૫૦ લાખ, ઇસ્ટમાં રૂ.૨૦ લાખ અને વેસ્ટ ઝોનમાં રૂ.૧૨ લાખના ખર્ચનો અંદાજ : ત્રણેય ઝોનના ટેન્ડર પ્રસિધ્ધ કરાયા

અગ્ર ગુજરાત, રાજકોટ

મનપા દ્વારા યોજાતા સરકારી કાર્યક્રમો, સાંસ્કૃતિક આયોજનો અને મહેમાનોના સ્વાગત માટે ગુલદસ્તા, સ્ટેજ સજાવવા ફૂલોનો ઉપયોગ કરવામાં આવે છે. ત્રણેય ઝોન માટે કોર્પોરેશન દ્વારા ટેન્ડર પ્રસિધ્ધ કરાયા છે. જેમાં રૂ.૯૫ લાખનો અંદાજીત ખર્ચ કરવાનું નક્કી કરવામાં આવ્યું છે. અગાઉના વર્ષને ધ્યાનમાં રાખી બે વર્ષ માટેનું બજેટ ફાળવવામાં આવ્યું છે.

ટેન્ડરની વિગતો મુજબ, ત્રણેય ઝોન માટે અલગ-અલગ રકમ ફાળવવામાં આવી છે. સેન્ટ્રલ ઝોનમાં સૌથી વધુ કાર્યક્રમો અને મહત્વની કચેરીઓ આવેલી હોવાથી ત્યાં રૂ.62.50 લાખનું એસ્ટિમેટ રાખવામાં આવ્યું છે. જ્યારે ઇસ્ટ ઝોન માટે રૂ.20 લાખ અને વેસ્ટ ઝોન માટે રૂ.12 લાખના ખર્ચનો અંદાજ મૂકવામાં આવ્યો છે. ઉલ્લેખનીય છે કે, બે વર્ષ અગાઉ જ્યારે આ કોન્ટ્રાક્ટ આપવામાં આવ્યો હતો, ત્યારે તે 14 ટકા ‘ઓન’ (વધારે ભાવ) સાથે મંજૂર થયો હતો. હાલની એજન્સીઓની મુદત પૂર્ણ થતા, ગાર્ડન શાખા દ્વારા આ વખતે અગાઉથી જ 14 ટકા ઓન ગણીને નવું એસ્ટિમેટ તૈયાર કરવામાં આવ્યું છે અને તે મુજબ જ નવી એજન્સીઓ પાસેથી ભાવો મંગાવવામાં આવ્યા છે.

મહાનગરપાલિકા દ્વારા બહાર પાડવામાં આવેલા આ ટેન્ડરમાં ફૂલોની સજાવટથી માંડી સ્વાગતની નાની-નાની વસ્તુઓના ભાવ પણ નક્કી કરી દેવામાં આવ્યા છે. જેમાં ગુલાબની શેર માટે રૂ.21.50, ગલગોટાની શેર માટે રૂ.11 અને લીલીના ફૂલો માટે રૂ.8.50નો ભાવ નક્કી કરાયો છે. આ ઉપરાંત મોંઘા ગણાતા સેવંતીના ફૂલો માટે રૂ.90 અને ગેલોર્ડિયા માટે રૂ.70નો દર રાખવામાં આવ્યો છે. સ્ટેજ ડેકોરેશન માટે ઉપયોગમાં લેવાતા આસોપાલવના બીડા માટે રૂ.4 અને ત્રણથી વધુ રંગના ફૂલોના મિશ્રણવાળા તોરણનો રૂ.71.50નો ભાવ નિર્ધારિત છે. આર્ટિફિશિયલ ડેકોરેશનમાં લાઇનિંગ માટે રૂ.5.50 અને તોરણ માટે રૂ.28.50 પ્રતિ ફૂટ નક્કી કરાયા છે.

સજાવટની સાથે-સાથે મહાનુભાવોના સન્માન માટે વપરાતી સામગ્રીના દરો પણ ટેન્ડરમાં સ્પષ્ટ કરવામાં આવ્યા છે. મહેમાનોના સ્વાગત માટે વપરાતા સાદા બુકેના રૂ.51.50, જ્યારે ખાદીનો રૂમાલ અને ડચ ગુલાબ સાથેના સ્પેશિયલ બુકેના રૂ.140 રાખવામાં આવ્યા છે. હાઈ-પ્રોફાઈલ કાર્યક્રમો માટે ઝરબેરા, ઓર્કિડ અને જીપ્સો જેવા વિદેશી ફૂલોથી સજ્જ મોટા હેન્ડ બુકે માટે રૂ.2800 સુધીનો ભાવ નક્કી છે. આ ઉપરાંત સુતરની આંટી માટે રૂ.75 અને બે ઇંચની રીબિન ડેકોરેશન માટે રૂ.25 પ્રતિ ફૂટનો ખર્ચ અંદાજવામાં આવ્યો છે. કાર્યક્રમોમાં આકર્ષણ જમાવતી રંગોળી માટે પણ અલગ-અલગ ભાવ છે, જેમાં લાકડાના ભૂસાની રંગોળી માટે રૂ.45.50 અને ચિરોડી આર્ટવર્ક માટે રૂ.450 પ્રતિ ચોરસ ફૂટ નક્કી કરાયા છે.

તંત્ર દ્વારા કરવામાં આવેલી આ કામગીરીનો મુખ્ય ઉદ્દેશ્ય આગામી બે વર્ષ સુધી યોજાનારા તમામ નાના-મોટા સરકારી સમારોહમાં ડેકોરેશનની વ્યવસ્થા સુચારુ રીતે જળવાઈ રહે તે છે. ખાસ કરીને જ્યારે મુખ્યમંત્રી કે અન્ય મંત્રીઓની મુલાકાત હોય અથવા સ્થાપના દિવસ જેવા મોટા પાયાના સાંસ્કૃતિક કાર્યક્રમો હોય, ત્યારે છેલ્લી ઘડીએ દોડધામ ન થાય તે માટે આ વાર્ષિક રેટ કોન્ટ્રાક્ટ પદ્ધતિ અપનાવવામાં આવી છે. હવે ટેન્ડર પ્રક્રિયા પૂર્ણ થયા બાદ એજન્સીઓની પસંદગી કરવામાં આવશે અને મ્યુનિસિપલ કમિશનરની મંજૂરી બાદ વર્ક ઓર્ડર આપવામાં આવશે.