- પોલીસ કર્મચારીના પુત્રની પોલીસે કરી ધરપકડ
- ઘર બંધ કરી પોલીસ કર્મચારી પરિવાર સાથે પલાયન
- અગાઉ તેલંગાણાના યુવકની ધરપકડ થઇ છે
મુકેશ અંબાણીને ધમકી કેસમાં ગુજરાત કનેક્શન સામે આવ્યું છે. જેમાં કલોલમાંથી એક શખ્સની ધરપકડ કરવામાં આવી છે. તેમાં પોલીસ કર્મચારીના પુત્રની પોલીસે ધરપકડ કરી છે. ઘર બંધ કરી પોલીસ કર્મચારી પરિવાર સાથે પલાયન થયો છે.
મુંબઈ ક્રાઈમ બ્રાન્ચની ટીમે કલોલમાંથી એક યુવકની ધરપકડ કરી
ઉદ્યોગપતિ મુકેશ અંબાણીને ધમકી આપવાના કેસમાં મુંબઈ ક્રાઈમ બ્રાન્ચની ટીમે કલોલમાંથી એક યુવકની ધરપકડ કરી છે. જેમાં કલોલ પોલીસ લાઈનમાં રહેતા અને ગાંધીનગર પોલીસમાં ફરજ બજાવતા પોલીસકર્મીના પુત્રની ધરપકડ કરાઇ છે. હાલ પોલીસ લાઈનમાં પોલીસ કર્મીના પોલીસ કવાટર્સમાં તાળુ છે. જેમાં ઘર બંધ કરી પોલીસ કર્મી પરિવાર સાથે પલાયન થયો છે. પડોશમાં રહેતા પોલીસ કર્મી પરિવારોએ પણ અહીંયા રહેતા કે કંઈ ખબર ન હોવાનું રટણ કરી રહ્યા છે.
જાણો શું છે સમગ્ર ઘટના:
બિઝનેસમેન મુકેશ અંબાણીને ધમકીભર્યા ઈમેલ મોકલવાના આરોપમાં મુંબઈની ગામદેવી પોલીસે તેલંગાણાના એક 19 વર્ષીય યુવકની ધરપકડ કરી હતી. આરોપીની ઓળખ ગણેશ રમેશ વનપારધી તરીકે થઈ છે. પોલીસે જણાવ્યું કે, આરોપીની ધરપકડ કરી તેને કોર્ટમાં રજૂ કરવામાં આવ્યો હતો અને ત્યાંથી તેને 8 નવેમ્બર સુધી પોલીસ કસ્ટડીમાં મોકલી દેવામાં આવ્યો છે. ગત અઠવાડિયે અંબાણીને અનેક ઈમેલ મળ્યા હતા. આ ઈમેલમાં પૈસાની માંગ કરવામાં આવી હતી અને જાનથી મારી નાખવાની પણ ધમકી આપવામાં આવી હતી.
400 કરોડ રૂપિયાની ખંડણીની માંગ કરવામાં આવી
મુંબઈ પોલીસના એક વરિષ્ઠ અધિકારીએ જણાવ્યું કે, એવું લાગે છે કે કેટલાક કિશોરો દ્વારા શરારત કરવામાં આવી છે. હાલમાં અમારી તપાસ ચાલી રહી છે અને અમે મામલાના મૂળ સુધી જવાનો પ્રયત્ન કરીશું. મુકેશ અંબાણીને કુલ પાંચ ઈમેલ મળ્યા હતા જેમાં તેમની પાસેથી કુલ 400 કરોડ રૂપિયાની ખંડણીની માંગ કરવામાં આવી હતી. પરંતુ આરોપી કંઈ કરે તે પહેલા જ તેમાંથી એકની ધરપકડ કરી લેવામાં આવી છે.
