ગુજરાત સહિત દેશના ૧૫,૦૦૦ ક્રિએટર્સને સરકાર દ્વારા અપાશે AIની તાલીમ
પ્રતિભાશાળી સર્જકોને દેશના વિકાસમાં સહભાગી થવા ટેક્નોલોજીના ઉપયોગ અંગે સમજણ અપાશે
અગ્ર ગુજરાત, રાજકોટ
ભારત અત્યારે કૃત્રિમ બુદ્ધિમત્તા (AI) ના ક્ષેત્રમાં વૈશ્વિક સ્તરે પોતાની ઓળખ બનાવી રહ્યું છે. આ દિશામાં એક મોટું ડગલું ભરતા, ભારત સરકારના માહિતી અને પ્રસારણ મંત્રાલયે ‘ઇન્ડિયન ઇન્સ્ટિટ્યૂટ ઓફ ક્રિએટિવ ટેક્નોલોજીસ’ (IICT) ના સહયોગથી Google અને YouTube સાથે વ્યૂહાત્મક ભાગીદારી કરી છે. આ ભાગીદારીનો મુખ્ય ઉદ્દેશ્ય દેશના 15,000 પ્રતિભાશાળી સર્જકોને AI ટેકનોલોજીનો અસરકારક ઉપયોગ કરતા શીખવવાનો છે.
આજના સમયમાં વીડિયો, ઈમેજ અને અન્ય ડિજિટલ કન્ટેન્ટ બનાવવાની રીત ઝડપથી બદલાઈ રહી છે. ભારતમાં લાખો સર્જકો છે, પરંતુ તેમની પાસે AI ટૂલ્સનો ઉપયોગ કરવાનું પદ્ધતિસરનું જ્ઞાન નથી. આ કાર્યક્રમ દ્વારા સરકાર એનિમેશન, ગેમિંગ અને ડિજિટલ સ્ટોરીટેલિંગ જેવા ક્ષેત્રોમાં કામ કરતા યુવાનોને સક્ષમ બનાવવા માંગે છે, જેથી તેઓ ઉચ્ચ ગુણવત્તાવાળું કન્ટેન્ટ બનાવી શકે અને વૈશ્વિક સ્તરે સ્પર્ધા કરી શકે.
સમગ્ર પ્રોજેક્ટને બે મુખ્ય ભાગમાં વહેંચવામાં આવ્યો છે. પ્રથમ તબક્કો (મૂળભૂત શિક્ષણ): આ તબક્કામાં પસંદ થયેલા તમામ સહભાગીઓને AI ના પાયાના જ્ઞાન વિશે ઓનલાઇન અભ્યાસક્રમો પૂરા પાડવામાં આવશે. આ તબક્કો સફળતાપૂર્વક પૂર્ણ કરનારને અધિકૃત પ્રમાણપત્ર પણ આપવામાં આવશે.
બીજો તબક્કો વધુ એડવાન્સ હશે. જેમાં સર્જકોને વાસ્તવિક પ્રોજેક્ટ્સ પર કામ કરવાની તક મળશે. તેઓ અત્યાધુનિક AI ટૂલ્સ દ્વારા વાર્તા કહેવાની કળા અને YouTube જેવા પ્લેટફોર્મ પર કેવી રીતે સફળ થવું તેની ટેકનિક શીખશે. આ તાલીમ દેશના મુખ્ય શહેરોમાં ઓનલાઇન અને ઓફલાઇન એમ બંને રીતે ઉપલબ્ધ કરાવાશે.
