- 30 થી વધુ અમેરિકન નાગરિકો મિયામી પહોંચ્યા
- હિંસાને પગલે હૈતીથી લોકો પલાયન કરવા મજબૂર
- યુએસ એમ્બેસી દ્વારા પોતાના નાગરિકોને કરી અપીલ
હૈતીમાં દિવસેને દિવસે હિંસા વધતી જ જઈ રહી છે. આ જ કારણ છે કે અહીંના લોકો ચિંતિત થઈને પલાયન કરવા માટે મજબૂર બન્યા છે. હૈતીથી ભાગી રહેલા અમેરિકન નાગરિકોને અન્ય શહેરોમાં લઈ જતું એક વિશેષ ચાર્ટર પ્લેન મિયામી પહોંચ્યું છે. આ સમાચારની પુષ્ટિ યુએસ સ્ટેટ ડિપાર્ટમેન્ટના અધિકારીઓએ કરી છે.
30 થી વધુ નાગરિકો મિયામી પહોંચ્યા
અધિકારીઓના જણાવ્યા અનુસાર સરકારી ચાર્ટર પ્લેનમાં લગભગ 30 અમેરિકન નાગરિકો સવાર હતા. ચાલુ ગેંગવોર દરમિયાન આ નાગરિકો હૈતી છોડીને મિયામી પહોંચ્યા છે. મહિનાની શરૂઆતમાં યુએસ એમ્બેસી દ્વારા પોર્ટ-ઓ-પ્રિન્સમાં લોકોને ખાસ અપીલ કરવામાં આવી હતી.
હૈતીમાં વધી રહેલી અરાજકતાને જોતા દૂતાવાસે અમેરિકન નાગરિકોને વહેલી તકે દેશ છોડી દેવાની સલાહ આપી હતી. આ સંદર્ભમાં રવિવારે દૂતાવાસ દ્વારા નાગરિકોને પરત લાવવા માટે એક વિશેષ વિમાન મોકલવામાં આવ્યું હતું.
હૈતીની સ્થિતિ અત્યંત દયનીય
ગેંગવોરને પગલે હાલ હૈતીની સ્થિતિ ખૂબ જ દયનીય બની ગઈ છે. આર્થિક દુર્દશાનો અંદાજ એ હકીકત પરથી લગાવી શકાય છે કે અહીંના લોકો પાણીથી લઈને રોજીંદી મૂળભૂત જરૂરિયાતો માટે તરસી રહ્યા છે.
સશસ્ત્ર જૂથોએ મુખ્ય માર્ગો પર મેળવ્યો કબજો
હૈતીમાં કેટલાક સશસ્ત્ર જૂથોએ દેશના મુખ્ય માર્ગો પર કબજો જમાવી લીધો છે. સ્થિતિ એ છે કે રાજધાની પોર્ટ-ઓ-પ્રિન્સની ફ્લાઈટ્સ સતત ખોરવાઈ રહી છે. સરકારે સુરક્ષાના કારણોસર કેટલીક ફ્લાઈટ્સ પર પ્રતિબંધ પણ મૂક્યો છે.
આટલું જ નહીં, હિંસા કારણે લોકોની આવકમાં પણ મોટો ઘટાડો થયો છે. લોકો સતત દેશ છોડીને અન્ય શહેરોમાં સ્થળાંતર કરી રહ્યા છે. રિપોર્ટ અનુસાર, અત્યાર સુધીમાં લગભગ 3 લાખ 62 હજાર લોકોને પલાયન કરવાની ફરજ પડી છે. આ લોકોમાં અડધો અડધ તો બાળકો જ છે.
