- ભારત સરકારે હાફિઝ સઈદને નવી દિલ્હીને સોંપવા માટે કહ્યું
- ભારતે પાકિસ્તાન પાસે હાફિઝ સઈદના પ્રત્યાર્પણની માંગ કરી
- ભારતે કહ્યું છે કે હાફિઝ સઈદ પુલવામામાં થયેલા આતંકી હુમલાનો માસ્ટરમાઈન્ડ છે
હવે ભારતે લશ્કરથી લઈને જૈશ સુધીના આતંકવાદીઓને પોષતા પાકિસ્તાન પાસેથી મોટી માંગ કરી છે. ભારત સરકારે પાકિસ્તાનને લશ્કર-એ-તૈયબાના સ્થાપક અને ભારતમાં અનેક આતંકવાદી હુમલાઓને અંજામ આપનાર હાફિઝ સઈદને નવી દિલ્હીને સોંપવા માટે કહ્યું છે. ભારતે પાકિસ્તાન પાસે હાફિઝ સઈદના પ્રત્યાર્પણની માંગ કરી છે. પાકિસ્તાની મીડિયાનો દાવો છે કે ભારતે કહ્યું છે કે હાફિઝ સઈદ પુલવામામાં થયેલા આતંકી હુમલાનો માસ્ટરમાઈન્ડ છે. આ સંદર્ભમાં મોદી સરકારે પાકિસ્તાનના વિદેશ મંત્રાલયને ઔપચારિક અરજી પણ આપી છે. ભારતની આ માંગ બાદ હવે પાકિસ્તાન સરકારની હાલત કફોડી છે.
પાકિસ્તાની મીડિયાએ અહેવાલ આપ્યો છે કે પાકિસ્તાનના વિદેશ મંત્રાલયે હજુ સુધી ન તો ભારતની માંગની પુષ્ટિ કરી છે કે ન તો નકારી કાઢી છે. ભારત અને પાકિસ્તાન વચ્ચે હાલમાં કોઈ પ્રત્યાર્પણ કરાર નથી. પાકિસ્તાની વિશ્લેષક અને વરિષ્ઠ પત્રકાર એજાઝ સઈદના જણાવ્યા અનુસાર, ચૂંટણી પહેલા પાકિસ્તાન હાફિઝ સઈદના પ્રત્યાર્પણ માટે કોઈ પગલું ભરે તેવી કોઈ શક્યતા નથી. તેણે દાવો કર્યો હતો કે હાફિઝ સઈદ હાલમાં જેલમાં છે. એજાઝે કહ્યું હતું કે હાફિઝ સઈદ પાકિસ્તાનની ચૂંટણી પર અસર કરી શકે છે.
હાફિઝની પાર્ટી પાકિસ્તાનની દરેક સીટ પર ચૂંટણી લડશે
ભારતે આ માંગ એવા સમયે કરી છે જ્યારે હાફિઝ સઈદની પાર્ટી પાકિસ્તાન મરકઝી મુસ્લિમ લીગે જાહેરાત કરી છે કે તે આવતા વર્ષે પાકિસ્તાનમાં યોજાનારી સામાન્ય ચૂંટણીમાં ભાગ લેશે. હાફિર સઈદ 26/11 મુંબઈ હુમલાનો માસ્ટરમાઇન્ડ પણ છે. સંયુક્ત રાષ્ટ્રે પણ હાફિઝ સઈદને આતંકવાદી જાહેર કર્યો છે. આવી સ્થિતિમાં ભારતની આ પ્રત્યાર્પણની માંગને કારણે પાકિસ્તાન સરકાર ખરાબ રીતે ફસાઈ શકે છે. પાકિસ્તાને હાલમાં આરોપ લગાવ્યો હતો કે ભારત તેના દેશમાં TTP દ્વારા આતંકવાદી હુમલાઓને પ્રોત્સાહન આપી રહ્યું છે.
હાફિઝ સઈદને વૈશ્વિક આતંકવાદી જાહેર કરવામાં આવ્યો છે ત્યારે તેની પાર્ટીને પાકિસ્તાનમાં ચૂંટણી લડવાની પરવાનગી મળી ગઈ છે. 8 ફેબ્રુઆરીએ યોજાનારી ચૂંટણી માટે હાફિઝની પાર્ટીએ દરેક રાષ્ટ્રીય અને પ્રાંતીય વિધાનસભા બેઠક પર ઉમેદવારો ઉભા રાખ્યા છે. એટલું જ નહીં મહત્વની વાત એ છે કે હાફિઝનો પુત્ર તલ્હા સઈદ પણ ચૂંટણી લડવાનો છે અને તે લાહોર બેઠક પરથી ચૂંટણી લડે તેવી શક્યતા છે. અમેરિકાએ હાફિઝ સઈદ પર 10 મિલિયન ડોલરનું ઈનામ જાહેર કર્યું છે. આવી સ્થિતિમાં, ભારતની માંગને કારણે પાકિસ્તાન ફસાઈ જશે તે નિશ્ચિત માનવામાં આવે છે. તેથી જ તે કોઈ જવાબ વિશે વિચારી શકતો નથી.
