અફઘાનિસ્તાનના વિજયની હેટ્રિક, નેધરલેન્ડ્સનો સાત વિકેટે પરાજય

• નેધરલેન્ડ્સના ચાર ખેલાડીઓ રનઆઉટ થયા
• વિજય સાથે અફઘાન ટીમ હજુ પણ સેમિફાઇનલની રેસમાં જીવંત
  
• નેધરલેન્ડ્સ 179 ઓલઆઉટ, અફઘાનિસ્તાન 3/181, નબી 3/28
  

અફઘાનિસ્તાને નેધરલેન્ડ્સને સાત વિકેટે હરાવીને વર્તમાન વન-ડે વર્લ્ડ કપમાં વિજયની હેટ્રિક નોંધાવી હતી. ટોસ જીતીને પ્રથમ બેટિંગ કરનાર નેધરલેન્ડ્સની ટીમ 179 રનના સ્કોરે ઓલઆઉટ થઇ ગઇ હતી. નેધરલેન્ડ્સના ચાર બેટ્સમેન રનઆઉટ થયા હતા. મેન ઓફ ધ મેચ બનેલા મોહમ્મદ નબીએ 28 રનમાં ત્રણ વિકેટ ખેરવી હતી. અફઘાનિસ્તાનની ટીમે 31.3 ઓવરમાં ત્રણ વિકેટના ભોગે 181 રન બનાવીને વિજય મેળવી લીધો હતો. આ વિજય સાથે અફઘાન ટીમ હજુ પણ સેમિફાઇનલની રેસમાં જીવંત છે. તેના આઠ પોઇન્ટ થયા છે અને બીજી તરફ નેધરલેન્ડ્સનો પાંચમો પરાજય થયો છે જેના ખાતામાં માત્ર ચાર પોઇન્ટ છે.

નેધરલેન્ડ્સની ઇનિંગમાં એંગલબ્રાચે સર્વાધિક 58, મેક્સ ઓડોડે 42 તથા કોલિન એકરમાને 29 રન બનાવ્યા હતા. ઓડોડ અને એકરમાને બીજી વિકેટ માટે 69 રનની ભાગીદારી નોંધાવી હતી. રનઆઉટના કારણે નેધરલેન્ડ્સના પાંચ ખેલાડીઓ 97 રનના સ્કોરે પેવેલિયન પરત ફરી ચૂક્યા હતા. તેના છ ખેલાડીઓ બેવડાં આંકનો સ્કોર પણ નોંધાવી શક્યા નહોતા.