જાન્યુઆરીમાં રાજકોટના આંગણે રચાશે ઇતિહાસ

દેશ કા એકસ્પોનું રવિવારે ભૂમિપૂજન

રાજકોટના નવા રીંગરોડ ઉપર એક લાખ ચોરસ મીટર જગ્યામાં વિવિધ કેટેગરીના ૧3 અત્યાધુનિક પેવેલિયનમાં એરકન્ડીશન્ડ ડોમ ઉભા કરવામાં આવશે

વિશ્વભરમાં હાલ ભારતની બોલબાલા અને વર્ચશ્વ વધી રહ્યા છે. અને કોવિડ-૧૯ બાદ ચીનનું સ્થાન ભારત લઈ રહ્યું છે. ત્યારે રાજકોટના આંગણે આગામી તા.૭થી ૧૦ જાન્યુઆરી ૨૦૨૪ દરમિયાન રાજકોટ સહિત સૌરાષ્ટ્રના વ્યાપાર-ઉદ્યોગ જગતને વૈશ્વિક કક્ષાનું આંતરરાષ્ટ્રીય પ્લેટફોર્મ પુરૂ પાડવા માટે ક્રાંતિકારી સંસ્થા સરદારધામના નેજા હેઠળ જી.પી.બી.એસ. દેશ કા એક્સ્પોનું મહા આયોજન કરવામા આવેલ છે. જેનું આગામી રવિવારે ભૂમિપૂજન રાખવામાં આવ્યું છે.

આ સમિટના આયોજકોએ જણાવ્યું છે કે સૌરાષ્ટ્રના તમામ જ્ઞાતિ-સમાજના ઉદ્યોગકારો માટે જી.પી.બી.એસ. દેશ કા એક્સપો આંતરરાષ્ટ્રીય ફલક ઉપર પાંખો પ્રસરાવવા માટે એક મજબુત પ્લેટ ફોર્મ પુરુ પાડવાનો ઉમદા ઉદેશ્ય છે અને આ સમિટ ગુજરાત સરકારની ‘વાઈબ્રન્ટ સમિટ’ની સમકક્ષ બની રહે તે પ્રકારનું વિશાળ આયોજન કરવામા આવ્યું છે. તેથી એક્સ્પોને ‘દેશ કા એક્સ્પો’ નામ આપવામાં આવ્યું છે.
જી.પી.બી.એસ. ‘દેશ કા એક્સ્પો’ રાજકોટના નવા રીંગરોડ ઉપર એક લાખ ચોરસ મીટર જગ્યામાં વિવિધ કેટેગરીના ૧3 અત્યાધુનિક પેવેલિયનમાં એર કંડીશન ડોમ ઉભા કરવામાં આવશે અને દેશ-વિદેશની ૧૦૦ બ્રાન્ડના સ્ટોલનું બુકિંગ કરવામાં આવ્યું છે. હાલ આ આંતરરાષ્ટ્રીય ઈવેન્ટ માટે કુલ 3૬ દેશમાં માટે પ્રચાર-પ્રસાર કરવામા આવી રહ્યો છે. વધારાના દેશોને જોડાવાના પ્રયાસો પણ ચાલી રહ્યા છે. ચાર દિવસ દરમિયાન એક્સ્પોની દસ લાખથી વધુ લોકો મુલાકાત લે તેવા અંદાજ સાથે આયોજન કરવામાં આવી રહ્યું છે.

આ એક્સ્પોમાં કોઈ ઉદ્યોગકાર પોતાની પ્રોડક્ટના વેચાણ માટે અગાઉથી જાણ કરશે તો તેની સાથે બાયર્સની ખાસ બીટુબી મુલાકાત પણ ગોઠવી દેવામાં આવશે. તા.૭ જાન્યુઆરી ૨૦૨૪ના રોજ ઉદ્ઘાટન સમયે તમામ લોકો માટે એક્સ્પોમાં એન્ટ્રી મફત રાખવામાં આવી છે. જ્યારે બાકીના દિવસોમાં સવારે ૯ થી ૨ વિઝીટર્સ માટે એન્ટ્રી રૂ.૧૦૦ નક્કી કરવામા આવી છે. જ્યારે બપોરે બે વાગ્યાથી સાંજના ૬:3૦ વાગ્યા સુધી
તમામ માટે એન્ટ્રી મફત રાખવામાં આવી છે. સવારે ૯ થી સાંજે ૬:3૦ સુધી એક્સ્પો વિઝિટર્સ માટે ખુલ્લો રહેશે. આ દરમિયાન સવારે ૯ થી બપોરે ૨ વાગ્યા સુધી દેશના ટોચના બિઝનેસ સ્પીકર અને મોટીવેશનલ સ્પીકર્સ ઉદ્યોગકારોને માર્ગદર્શન આપે તેવી ખાસ વ્યવસ્થા કરવામાં આવેલી છે. આવી ઈવેન્ટ્સ માટે ૫૦૦૦ ચોરસ મીટરનો ખાસ એરકંડીશન હોલ પણ તૈયાર કરવામા આવનાર છે.

દેશ કા એક્સ્પોના ઉદ્ઘાટન માટે વડાપ્રધાન નરેન્દ્રભાઈ મોદીને પણ આમંત્રણ આપવામાં આવ્યું છે. છેલ્લે સુરતમાં એક્સ્પો યોજાયો ત્યારે વડાપ્રધાને વર્ચ્યુઅલ હાજરી આપી હતી.
‘દેશ કા એક્સપો’માં અમેરિકાના તમામ સ્ટેટમાં રોડ-શો કરવામાં આવ્યા હતા. આથી અમેરિકાના તમામ સ્ટેટમાંથી વિઝિટર્સ દેશ કા એક્સ્પોની મુલાકાતે આવે તેવા કંન્ફોર્મેશન પણ મળી ચૂકયા છે. આ ઉપરાંત કેનેડા, યુ.એ.ઈ., થાઈલેન્ડ, વિયેતનામ, ઓમાન, યુ.કે., મેક્સિકો, સાઉથ આફ્રિકા, પોલેન્ડ, કતાર, સેનેગલ, કેન્યા, રોમાનિયા, યુગાન્ડા, ઓસ્ટ્રેલિયા, તાન્ઝાનિયા, ફિલિપાઈન્સ, કોન્ગો, જર્મની, ઈજીપ્ત, બહેરીન, ઝમ્બીયા, બ્રાઝિલ, ઘાના, ઈન્ડોનેશિયા, યમન, તુર્કી, નેપાળ, બેલ્જીયમ, શ્રીલંકા, જોર્ડન, કુવૈત, નેધરલેન્ડ, બાંગ્લાદેશ સહિતના દેશોના ઉદ્યોગકારો મુલાકાતે આવનાર છે. જૂજ સ્ટોલ બાકી હોવાથી વહેલા તે પહેલાના ધોરણે ૮૫૧૧૧ ૧૫૦૧૭ પર સંપર્ક કરવો.