દાહોદ જિલ્લામાંથી એક ગમખ્વાર માર્ગ અકસ્માતની ઘટના સામે આવી છે, જેમાં બે વ્યક્તિઓએ પોતાનો જીવ ગુમાવ્યો છે. જિલ્લાના ભીટોડી ગામે નેશનલ હાઇવે પર બનેલી આ ઘટના હિટ એન્ડ રનની છે, જ્યાં અજાણ્યો વાહન ચાલક બે લોકોને ટક્કર મારીને સ્થળ પરથી ફરાર થઈ ગયો હતો.
દાહોદમાં હિટ એન્ડ રનની ઘટના
પ્રાથમિક માહિતી મુજબ, હાઇવે પર પસાર થઈ રહેલા આ બે લોકોને પૂરપાટ ઝડપે આવતા એક અજાણ્યા વાહને ટક્કર મારી હતી. ટક્કર એટલી ભયંકર હતી કે, બેમાંથી એક વ્યક્તિનું તો ઘટના સ્થળે જ કમકમાટીભર્યું મોત નીપજ્યું હતું.જ્યારે બીજા ઈજાગ્રસ્તને ગંભીર હાલતમાં તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો, પરંતુ સારવાર દરમિયાન આ વ્યક્તિએ પણ દમ તોડી દીધો હતો. આ રીતે આ હિટ એન્ડ રનની ઘટનામાં કુલ બે વ્યક્તિઓના મોત થયા છે.
હિટ એન્ડ રનમાં બે લોકોના મોત
ઘટનાની જાણ થતા જ સ્થાનિક પોલીસનો કાફલો તાત્કાલિક ભીટોડી હાઇવે પર પહોંચી ગયો હતો. પોલીસે મૃતદેહોનો કબજો મેળવીને કાયદેસરની કાર્યવાહી હાથ ધરી છે. પોલીસે આ અકસ્માત સર્જીને ફરાર થઈ ગયેલા અજાણ્યા વાહન ચાલક અને તેના વાહનને શોધવા માટે આસપાસના સીસીટીવી ફૂટેજની તપાસ શરૂ કરી છે. પોલીસે અકસ્માતનો ભોગ બનેલા બંને મૃતકોની ઓળખ કરવાની અને તેમના પરિવારજનોને જાણ કરવાની કામગીરી પણ હાથ ધરી છે. હાઇવે પર બનેલી આ કરૂણ ઘટનાથી સમગ્ર પંથકમાં શોક અને ચિંતાનો માહોલ ફેલાયો છે.
