ICCએ મેન્સ ક્રિકેટના વનડે, ટેસ્ટ અને T20 ઈન્ટરનેશનલના ત્રણેય ફોર્મેટની પ્લેઈંગ ઈલેવન કન્ડીશનમાં ફેરફાર કરવાનો નિર્ણય લીધો છે. આ ફેરફારોમાં કન્કશન સબસ્ટિટ્યુટથી લઈને ODIમાં બે નવા બોલનો ઉપયોગ કરવાના નિયમોને અપડેટ કરવામાં આવ્યો છે.
અત્યાર સુધી વનડે ક્રિકેટમાં બે નવા બોલનો ઉપયોગ થતો હતો, બંને છેડાથી 25-25 ઓવર માટે એક નવો બોલનો ઉપયોગ થતો હતો, જેમાં હવે થોડો ફેરફાર જોવા મળશે. બોલરોને આનો ફાયદો થતો જોવા મળશે. ક્યારથી ત્રણેય ફોર્મેટમાં આ નિયમો બદલાશે તેની તારીખ પણ જાહેર કરવામાં આવી છે.
ત્રણેય ફોર્મેટમાં અલગ-અલગ તારીખે થશે લાગુ
આ નિયમોમાં ફેરફારની તારીખ પણ જાહેર કરવામાં આવી છે. 17 જૂનથી ટેસ્ટ, 2 જુલાઈથી ODI અને 10 જુલાઈથી T20 ફોર્મેટમાં આ અપડેટેડ નિયમો લાગુ થતા જોવા મળશે. વનડે ક્રિકેટમાં હજુ પણ 2 નવા બોલનો ઉપયોગ કરવામાં આવશે, પરંતુ આ 25 નહીં 34મી ઓવર સુધી તેનો ઉપયોગ થશે.
આ સિવાય 35 થી 50 ઓવર સુધી બોલિંગ ચાલુ રાખવા માટે બંને ટીમોએ તે 2 બોલમાંથી એક પસંદ કરવો પડશે. જ્યારે જો મેચ 50 ઓવરથી ઘટાડીને 25 ઓવર કરવામાં આવે છે, તો ફક્ત એક જ બોલનો ઉપયોગ કરવામાં આવશે.
અત્યાર સુધી નિયમો મુજબ બોલરોને છેલ્લી ઓવરોમાં બોલને રિવર્સ કરવો ખૂબ જ મુશ્કેલ હતો. જેના કારણે વનડેમાં ખૂબ મોટા સ્કોર જોવા મળતા હતા, પરંતુ હવે બોલરોની ચિંતા દૂર કરવા માટે, ICC એ આ નિયમમાં ફેરફાર કર્યો છે, જે બોલરોને ઘણી મદદ કરશે.
કન્કશન સબસ્ટિટ્યુટના નિયમોમાં પણ થયો ફેરફાર
હવે કેપ્ટનોએ ટોસ પહેલા તેમના 5 કન્કશન સબસ્ટિટ્યુટ ખેલાડીઓના નામ આપવા પડશે. અત્યાર સુધી આવું ન હતું અને મેચ દરમિયાન કોઈપણ ખેલાડી કન્કશન સબસ્ટિટ્યુટ તરીકે રમવા આવી શકતો હતો. હવે કેપ્ટનોએ આ 5 ખેલાડીઓમાંથી એક બેટ્સમેન, એક ઓલરાઉન્ડર, એક વિકેટકીપર, એક સ્પિનર અને એક ફાસ્ટ બોલર પસંદ કરવાનો રહેશે.
