- શ્રીલંકન ક્રિકેટ ટીમના કેપ્ટન વનિન્દુ હસરંગાને સસ્પેન્ડ કરવામાં આવ્યો
- વનિન્દુ હસરંગાના કુલ ડીમેરિટ પોઈન્ટ 5 થવાના કારણે લગાવાયો પ્રતિબંધ
- અફઘાનિસ્તાનના ખેલાડી રહેમાનુલ્લા ગુરબાઝને પણ સજા ફટકારવામાં આવી
ઈન્ટરનેશનલ ક્રિકેટ કાઉન્સિલ (ICC) એ શનિવારે સાંજે એક મોટો નિર્ણય લેતા શ્રીલંકન ક્રિકેટ ટીમના કેપ્ટન વનિન્દુ હસરંગાને સસ્પેન્ડ કરવાનો નિર્ણય લીધો છે. તમને જણાવી દઈએ કે આ સજા અફઘાનિસ્તાન અને શ્રીલંકા વચ્ચે ચાલી રહેલી T20 સીરીઝ દરમિયાન બનેલી ઘટનાને લઈને આપવામાં આવી છે. આ ઉપરાંત ICCએ અફઘાનિસ્તાનના ખેલાડી રહેમાનુલ્લા ગુરબાઝને પણ સજા ફટકારી છે. ખાસ વાત એ છે કે હસરંગાને આગામી બે મેચ માટે સસ્પેન્ડ કરવામાં આવ્યો છે. જ્યારે ગુરબાઝને મેચ ફી અને ડીમેરિટ પોઈન્ટનો દંડ ફટકારવામાં આવ્યો છે.
શું છે સમગ્ર મામલો?
વનિન્દુ હસરંગાના કુલ ડીમેરિટ પોઈન્ટ 5 થઈ ગયા છે. નિયમો અનુસાર જો કોઈ ખેલાડી છેલ્લા બે વર્ષમાં પાંચ ડીમેરિટ પોઈન્ટ મેળવે છે, તો તેની પાસેથી 50 ટકા મેચ ફી અને બે મેચ માટે સસ્પેન્ડ કરવામાં આવે છે. હસરંગાને આઈસીસી આચાર સંહિતાની કલમ 2.13 હેઠળ દોષી ઠેરવવામાં આવ્યો છે. આમાં, જો કોઈ ખેલાડી વ્યક્તિગત રીતે તેના સપોર્ટ સ્ટાફ, અમ્પાયર અથવા મેચ રેફરી માટે ખોટા શબ્દો બોલે છે, તો તે તેના માટે દોષી માનવામાં આવે છે.
નોંધનીય છે કે અફઘાનિસ્તાન અને શ્રીલંકા વચ્ચે રમાયેલી T20 સીરિઝની ત્રીજી અને છેલ્લી મેચનો આ મામલો છે. તે મેચમાં, હસરંગા અમ્પાયર લિંડન હેનીબલ પાસે ગયો અને તેને ફુલ ટોસમાં નો બોલ આપવા બદલ ઠપકો આપ્યો. આ કારણસર તેને દોષી ઠેરવવામાં આવ્યો હતો. હવે તે આવતા મહિને બાંગ્લાદેશ સામે શ્રીલંકાની T20 સીરિઝની પ્રથમ બે મેચમાંથી બહાર થઈ જશે.
રહેમાનુલ્લા ગુરબાઝને શા માટે સજા થઈ?
હવે જો અફઘાનિસ્તાનના ખેલાડી રહેમાનુલ્લા ગુરબાઝની વાત કરીએ તો તેને પણ ICC દ્વારા સજા કરવામાં આવી છે. જો કે તેના પર મેચ ફીના 15 ટકા દંડ ફટકારવામાં આવ્યો છે. તેને ICC કોડ ઓફ કન્ડક્ટના લેવલ 1 માટે દોષિત ઠેરવવામાં આવ્યો છે. તેણે આ કોડની કલમ 2.4ના નિયમનું ઉલ્લંઘન કર્યું હતું. આમાં પણ અમ્પાયરની વાત ન સાંભળવા જેવી બાબતો છે. આ માટે તેને મેચ ફીના દંડ ઉપરાંત 1 ડીમેરિટ પોઈન્ટ પણ મળ્યો હતો. છેલ્લા બે વર્ષમાં આ તેની બીજી ભૂલ છે અને તેના કુલ 2 ડીમેરિટ પોઈન્ટ થઈ ગયા છે.
ખેલાડીઓએ આરોપો સ્વિકાર્યા
ગુરબાઝને બેટની ગ્રીપ સાથે ચેડા કરવા બદલ સજા આપવામાં આવી છે. આ માટે તેને ચેતવણી પણ મળી હતી પરંતુ તેમ છતાં તે માન્યા ન હતા. આ બંને ખેલાડીઓએ પોતપોતાના આરોપો સ્વીકારી લીધા છે. તેણે મેચ રેફરી ક્રિસ બ્રોડ દ્વારા લગાવવામાં આવેલા આરોપોને સ્વીકારી લીધા છે. આ કારણે હવે આ મામલે કોઈ સુનાવણીની જરૂર નથી. આ ફરિયાદ ફિલ્ડ અમ્પાયર લિન્ડન હેનીબલ અને રવિન્દ્ર વિમલાસિરીએ કરી હતી. થર્ડ અમ્પાયર રૂચિરા પલિયાગુરુગે અને ચોથા અમ્પાયર રેનમોર માર્ટિનેઝે પણ આ ફરિયાદ કરી હતી.
