ભારત અને ન્યુઝીલેન્ડ આગામી મહિનાથી T20 ઈન્ટરનેશનલ સિરીઝ રમશે. આ પછી ફેબ્રુઆરીમાં વર્લ્ડકપ રમાશે, પરંતુ તે પહેલાં, ભારતીય ટીમના કેપ્ટન સૂર્યકુમાર યાદવને મોટો ઝટકો લાગ્યો છે. સૂર્યકુમાર યાદવ લાંબા સમય પછી ICC રેન્કિંગમાં ટોપ 10માંથી બહાર થઈ ગયો છે. પરંતુ એકમાત્ર રાહત એ છે કે તિલક વર્માએ વધુ એક છલાંગ લગાવી છે.
ICC T20 રેન્કિંગમાં અભિષેક શર્મા નંબર 1 બેટ્સમેન
ICCએ ફરી એકવાર T20 ઈન્ટરનેશનલ રેન્કિંગ જાહેર કર્યું છે. ભારતીય ઓપનર અભિષેક શર્મા 908માં નંબરે છે અને તે નંબર 1 પર યથાવત છે. ઈંગ્લેન્ડનો ફિલ સોલ્ટ 849 રેટિંગ સાથે બીજા નંબરે છે. આનો અર્થ એ થયો કે હવે તે નિશ્ચિત છે કે ભારતના અભિષેક શર્મા વર્ષના અંત સુધી નંબર 1 પર રહેશે.
આ વખતે તિલક વર્માને થયો ફાયદો
આ દરમિયાન ભારતના તિલક વર્માએ છલાંગ લગાવી છે. તે હવે એક સ્થાન આગળ વધીને ત્રીજા નંબર પર પહોંચી ગયો છે, જેની સાથે તેનું રેટિંગ 805 થઈ ગયું છે. આ દરમિયાન તિલક વર્માના રેટિંગમાં વધારો થવાથી કેટલાક બેટ્સમેનોને નુકસાન થયું છે. શ્રીલંકાનો પથુમ નિસાન્કા એક સ્થાન નીચે આવીને ચોથા નંબર પર પહોંચી ગયો છે, જેનું રેટિંગ 779 છે. ઈંગ્લેન્ડના જોસ બટલર 770 રેટિંગ સાથે પાંચમા સ્થાને છે.
સૂર્યકુમાર યાદવ 13માં સ્થાને સરકી ગયો
સાઉથ આફ્રિકાના વિસ્ફોટક બેટ્સમેન ડેવાલ્ડ બ્રેવિસ પાંચ સ્થાન ઉપર આવીને 10મા નંબરે પહોંચી ગયો છે. તેનું રેટિંગ હવે 680 છે. આ પહેલી વાર છે જ્યારે ડેવાલ્ડ ટોપ 10માં સ્થાન મેળવ્યું છે. સૂર્યકુમાર યાદવ લાંબા સમય પછી ટોપ 10માંથી બહાર થઈ ગયો છે. તે હવે ત્રણ સ્થાન નીચે આવીને 13મા નંબરે આવી ગયો છે.
આ ભારતીય ટીમ અને સૂર્યકુમાર યાદવ માટે સારું નથી. T20 વર્લ્ડકપ પહેલા સૂર્યકુમાર યાદવને ન્યુઝીલેન્ડ સિરીઝમાં પોતાનું ફોર્મ પાછું મેળવવાની જરૂર પડશે.
આ પણ વાંચો: Vijay Hazare Trophyમાં કર્ણાટકે ઈતિહાસ રચ્યો, 13 વર્ષ જૂનો રેકોર્ડ તોડ્યો
