ટંકારા પાસે આઈસર ટ્રકે ઉભેલા છકડા રિક્ષાને હડફેટે લેતા 7 વર્ષના બાળકનું મોત
ભંગારની ફેરી કરવા ગયેલા પરિવાર પર આફત; દાદા-દાદી ઈજાગ્રસ્ત, માતા-ફુઈ રોડ સાઈડમાં ભંગાર વીણી રહ્યા હતા
અગ્ર ગુજરાત, રાજકોટ
રાજકોટ નજીક ટંકારા પાસે મંગળવારે સર્જાયેલા અકસ્માતમાં 7 વર્ષીય બાળનું મોત નીપજતાં પરિવારમાં શોકનો માહોલ છવાઈ ગયો છે. રાજકોટના કુવાડવા વિસ્તારમાં રહેતા પરિવારનો છકડો રિક્ષા રોડ સાઈડમાં ઉભો રાખેલો હતો ત્યારે પાછળથી આવેલા આઈસર ટ્રકે ઠોકર મારતાં આ દુર્ઘટના બની હતી. અકસ્માતમાં બાળકના દાદા-દાદીને પણ ઈજાઓ પહોંચી છે.
મળતી માહિતી મુજબ કુવાડવા ગામે વાંકાનેર ચોકડી પાસે રહેતા હકાભાઈ રામાભાઈ માંગડીયા (55), તેમની પત્ની લીલાબેન (50) અને પૌત્ર હરિભાઈ નવલભાઈ માંગડીયા (7) મંગળવારે બપોરે છકડા રિક્ષામાં ભંગારની ફેરી કરવા નીકળ્યા હતા. પરિવાર ગામડે ગામડે જઈ ભંગાર એકત્રિત કરીને રોજીંદું ગુજરાન ચલાવે છે.
ટંકારા તથા આસપાસના વિસ્તારોમાં ભંગારની ફેરી કર્યા બાદ પરિવાર પરત ફરી રહ્યો હતો. તે દરમિયાન ટંકારા પાસે રાજકોટ તરફ જતા રસ્તા પર આવેલા પ્રથમ પુલ નજીક છકડો રોડની સાઈડમાં ઉભો રાખવામાં આવ્યો હતો. ત્યારે હરિના માતા અને ફુઈ રિક્ષામાંથી ઉતરી રસ્તા પાસે ભંગાર વીણી રહ્યા હતા, જ્યારે હરિ તેના દાદા અને દાદી સાથે રિક્ષામાં જ બેઠો હતો.
એ દરમિયાન પાછળથી ઝડપથી આવેલા આઈસર ટ્રકે ઉભેલા છકડા રિક્ષાને જોરદાર ટક્કર મારતા ત્રણેયને ઈજા પહોંચી હતી. અકસ્માત બાદ ઈજાગ્રસ્તોને તાત્કાલિક ટંકારાની સરકારી હોસ્પિટલમાં ખસેડવામાં આવ્યા હતા, જ્યાંથી વધુ સારવાર માટે રાજકોટ સિવિલ હોસ્પિટલમાં રિફર કરવામાં આવ્યા હતા.
હરિને માથા અને શરીરના ભાગે ગંભીર ઈજાઓ થતાં સારવાર દરમિયાન તેનું મૃત્યુ નીપજ્યું હતું. હરિ બે ભાઈઓમાં નાનો હોવાનું પરિવારજનોએ જણાવ્યું હતું. બાળકના મોતથી સમગ્ર પરિવાર શોકમાં ગરકાવ થયો છે. આ બનાવ અંગે પોલીસ દ્વારા વધુ તપાસ હાથ ધરવામાં આવી રહી છે.
