- મિચેલ સ્ટાર્ક IPLનો સૌથી મોંઘો ખેલાડી
- કોલકાતા નાઈટ રાઈડર્સે રૂ. 24.75 કરોડમાં ખરીદ્યો
- પેટ કમિન્સને હૈદરાબાદે રૂ. 20.50 કરોડમાં ખરીદ્યો
IPL 2024 માટે મંગળવારે (19 ડિસેમ્બર) ના રોજ યોજાયેલી હરાજીમાં મિચેલ સ્ટાર્ક અને પેટ કમિન્સ રેકોર્ડ બ્રેક કિંમતે વેચાયા હતા. કોલકાતા નાઈટ રાઈડર્સે મિચેલ સ્ટાર્કને રૂ. 24.75 કરોડમાં ખરીદ્યો હતો, જ્યારે સનરાઈઝર્સ હૈદરાબાદે પેટ કમિન્સ પર રૂ. 20.50 કરોડનો દાવ લગાવ્યો હતો. આટલી મોટી કિંમત સાથે આ બંને ખેલાડીઓ IPL ઈતિહાસના સૌથી મોંઘા ખેલાડી પણ બની ગયા છે.
પેટ કમિન્સ છેલ્લી IPL સિઝન અધવચ્ચે છોડીને વતન પરત ફર્યો હતો. બીજી તરફ મિચેલ સ્ટાર્ક માટે IPL ક્યારેય પ્રાથમિકતા રહી નથી. આ જ કારણ છે કે તે લાંબા સમય બાદ IPLમાં પરત ફર્યો છે. આ બંને ખેલાડીઓની પ્રાથમિકતા હંમેશા ઓસ્ટ્રેલિયન ટીમ રહી છે. ત્યારબાદ મિચેલ સ્ટાર્ક પણ ઈજાગ્રસ્ત થયો છે. આવી સ્થિતિમાં સવાલ એ ઊભો થાય છે કે જો આ બે મોંઘા ખેલાડીઓ ટૂર્નામેન્ટની વચ્ચે ઈજાગ્રસ્ત થઈ જાય અથવા ઉપલબ્ધ ન હોય તો પણ શું ફ્રેન્ચાઈઝી તેમને કરોડોનો પગાર આપશે?
શું કહે છે IPL પગાર નિયમ?
IPLમાં ખેલાડીઓને પગાર ચૂકવવાના નિયમો ખૂબ જ સ્પષ્ટ છે. એટલે કે, જો કોઈ ખેલાડી IPLની એક સિઝન માટે ફુલ ટાઈમ ઉપલબ્ધ હોય છે, તો જો ફ્રેન્ચાઈઝી તેને એક પણ મેચમાં તક ન આપે તો તેણે આખી સિઝન માટે તેનો પગાર ચૂકવવો પડે છે. પરંતુ જો કોઈ ખેલાડી ટુર્નામેન્ટની મધ્યમાં અંગત કારણોસર મેચોમાં ઉપલબ્ધ ન હોય અથવા ઈજાગ્રસ્ત થઈ જાય, તો તેને જેટલી મેચો માટે તે ઉપલબ્ધ હતો તેટલો જ પગાર મળે છે. આવી સ્થિતિમાં, જો કમિન્સ અને સ્ટાર્ક IPL સિઝનની મધ્યમાં ઈજાગ્રસ્ત થાય છે અથવા અન્ય કોઈ કારણોસર ઉપલબ્ધ નથી, તો તેમને એક સિઝનની મેચોમાં તેમની ઉપલબ્ધતાના પ્રમાણમાં પૈસા મળશે.
ખેલાડી બદલી શકે
તેવી જ રીતે, જો કોઈ ખેલાડી ઈજાગ્રસ્ત થાય છે અથવા IPL સિઝન શરૂ થાય તે પહેલા ઉપલબ્ધ નથી, તો ફ્રેન્ચાઈઝી માટે તેને એક રૂપિયો પણ ચૂકવવો ફરજિયાત નથી. આવા સમયે, ફ્રેન્ચાઇઝી તે ખેલાડીને અન્ય ખેલાડી સાથે બદલી શકે છે.
