રાદડિયાના સમર્થક સંઘાણી ચેરમેનપદે બીનહરીફ
ભાજપના મેન્ડેટથી ચૂંટણીમાં ઉભેલા સતાવાર ઉમેદવારની હાર બાદ બીજા દિવસે ચેરમેન અને ચાર વાઇસ ચેરમેનની થઇ વરણી
વિશ્વની સૌથી મોટી સહકારી સંસ્થા ઇફ્કોની ચૂંટણીને લઇને ભાજપમાં જ અંદરોઅંદરનું આંતરિક રાજકારણ ગરમાયુ છે. ડિરેક્ટરપદ માટે ભાજપના મેન્ડેટથી જાહેર થયેલા સતાવાર ઉમેદવાર બિપીન પટેલ સામે ભાજપના જ સહકારી ક્ષેત્રના દિગ્ગજ અને ભાજપના જ પૂર્વ મંત્રી અને વર્તમાન ધારાસભ્ય જયેશ રાદડિયાનો વિજય થયા બાદ આજે બીજા દિવસે ૨૧ ડિરેક્ટરોની મળેલી મિટિંગમાં ચેરમેનપદે દિલીપભાઇ સંઘાણીની બીનહરીફ વરણી થઇ છે. સતત બીજી ટર્મમાં સંઘાણીની ચેરમેન પદે વરણી થઇ છે. નોંધનીય છે કે, ભાજપના મેન્ડેટથી ઉપરવટ થઇને ચૂંટણી જંગમાં ઝંપલાવી અને વિજય પણ મેળવનાર જયેશ રાદડિયાએ જ્યારે ડિરેક્ટરપદે ફોર્મ ભર્યુ હતુ ત્યાંરે દિલીપભાઇ સંઘાણી તેમના સમર્થનમાં હતા. ગઇકાલે ડિરેક્ટરપદની ચૂંટણીનું પરિણામ આવ્યા બાદ આજે એક ચેરમેન અને ચા વાઇસ ચેરમેની નિયુક્તિ કરવામા આવી હતી. ઇફકોના પરિણામે એ સાબિત કરી દીધુ છે કે સહકારી ક્ષેત્રમાં વફાદારી અને વ્યકિતગત નેતા જ સર્વોપરી છે અને તેમાં પાર્ટીલાઇન ગૌણ બની જાય છે. ખાસ કરીને જયેશ રાદડીયા જેવા નેતાના સહકારી નેટવર્કને તોડવાનું ભાજપ માટે પણ શકય બન્યું ન હોવાનું સ્પષ્ટ છે.
જસદણમાં ફટાકડા ફૂટ્યા, GIDC એસો.એ પણ કરી ઉજવણી
દેશની સૌથી મોટી અને રૂ.૬૦૩૨૪ કરોડનું ટર્ન ઓવર ધરાવતી ઇફકો ઇન્ડિયન ફામેર્સ ફર્ટિલાઈઝર કો. ઓપરેટિવ લિમિટેડ(ઇફકો)ના ગુજરાતનાં એક માત્ર ડિરેક્ટર પદે ભાજપના જયેશભાઈ રાદડીયાનો ભવ્ય વિજય થતાં જસદણમાં સરદારચોકમાં ખેડૂતો ઝૂમી ઉઠી ફટાકડાંની આતશબાજી કરી હતી દરમિયાન જસદણ જીઆઈડીસી એસોસિએશન અને યુવા ભાજપ બક્ષીપંચ મોરચાના પ્રમુખ વિજયભાઈ રાઠોડ એ જણાવ્યું કે છેલ્લી બે ટર્મથી ઇફકોના ડિરેક્ટર તરીકેની કામગીરી જયેશભાઈએ બેખુબીથી કરી હતી એનું ફળ આજે મળેલ હતું.
રાદડિયાના હરીફ બિપીન પટેલને માત્ર ૬૬ મત જ મળ્યા
પાર્ટીની ટોચની નેતાગીરીનો મજબૂત ટેકો હોવા છતા હરીફની થઇ કરારી હાર
ઈફકોની ચૂંટણીમાં મતદાન પ્રક્રિયામાં કુલ 182માંથી 180 વોટ નાખવામાં આવ્યા હતા, 2 સદસ્યએ વિદેશમાં રહેતા હોવાથી વોટિંગ કર્યું ન હતું. ભાજપમાંથી મેન્ડેન્ટ મેળવનાર બિપીન પટેલ અને સહકારી ક્ષેત્રના માંધાતા કહી શકાય તેવા જયેશ રાદડિયા વચ્ચે સીધો જંગ હતો. મતદાન પૂર્વે જ આમતો રાદડિયા જૂથ તરફથી એવો દાવો હતો જ કે, જયેશ રાદડિયા તરફથી કુલ પડેલા ૧૮૦ મતમાંથી ૧૨૫ જેટલા મત પડ્યા છે. આજે સાંજે મેણમાં ૧૧૪ મત નીકળતા તેનો વિજય થયો હતો. રાદડિયાના હરીફ બિપીન પટેલને ખુદ ભાજપની ટોચની નેતાગીરીનો મજબૂત ટેકો હોવા છતા માત્રને માત્ર ૬૬ મત જ મળ્યા હતા.
