ભારતે ઈન્ટરનેશનલ માસ્ટર્સ લીગ 2025નો ખિતાબ જીત્યો છે. ઈન્ડિયા માસ્ટર્સ ટીમે વેસ્ટ ઈન્ડિઝ માસ્ટર્સને 6 વિકેટે હરાવીને ટ્રોફી જીતી. આ ટાઈટલ મુકાબલામાં, વેસ્ટ ઈન્ડીઝે પ્રથમ બેટિંગ કરીને 148 રન બનાવ્યા.
જેના જવાબમાં ભારતે 17 બોલ બાકી રહેતા આ લક્ષ્ય સરળતાથી પ્રાપ્ત કરી લીધું. ભારતની જીતનો સૌથી મોટો હીરો અંબાતી રાયડુ હતો, જેને 50 બોલમાં 74 રનની મેચ વિજેતા ઈનિંગ રમી.
આ છે ભારતના વિજયના હીરો
વેસ્ટ ઈન્ડિઝ પહેલા બેટિંગ કરવા આવ્યું, જેના માટે ઓપનર ડ્વેન સ્મિથે 45 રન બનાવ્યા, પરંતુ બ્રાયન લારા અને વિલિયમ્સ પર્કિન્સ 6-6 રન બનાવીને આઉટ થઈ ગયા. શાહબાઝ નદીમે ઘાતક બોલિંગ કરી, 4 ઓવરમાં ફક્ત 12 રન આપીને 2 વિકેટ લીધી. લેન્ડલ સિમન્સે ચોક્કસપણે 57 રનની મહત્વપૂર્ણ ઈનિંગ રમી હતી, પરંતુ નદીમ સિવાય વિનય કુમારે પણ ભારત માટે બોલિંગમાં ધૂમ મચાવી. વિનય કુમારે મેચમાં કુલ 3 વિકેટ લીધી.
લેન્ડલ સિમોન્સે ફટકારી અડધી સદી
આ મેચમાં વેસ્ટ ઈન્ડિઝના કેપ્ટન બ્રાયન લારાએ ટોસ જીતીને પહેલા બેટિંગ કરવાનો નિર્ણય લીધો. વેસ્ટ ઈન્ડીઝે ઈન્ડિયા માસ્ટર્સને 149 રનનો લક્ષ્યાંક આપ્યો છે. વેસ્ટ ઈન્ડિઝ તરફથી લેન્ડલ સિમન્સે સૌથી વધુ રન બનાવ્યા. તેને 41 બોલમાં 57 રનની ઈનિંગ રમી. પોતાની ઈનિંગ દરમિયાન તેને 5 ચોગ્ગા અને 1 છગ્ગો ફટકાર્યો. આ ઉપરાંત ડ્વેન સ્મિથે 35 બોલમાં 45 રન બનાવ્યા. તેને 6 ચોગ્ગા અને 2 છગ્ગા ફટકાર્યા. ભારત તરફથી વિનય કુમારે સૌથી વધુ 3 વિકેટ લીધી છે. જ્યારે, નદીમે બે વિકેટ લીધી છે. તેમના સિવાય નેગી અને બિન્નીએ એક-એક વિકેટ લીધી.
જ્યારે બેટિંગનો સમય આવ્યો ત્યારે અંબાતી રાયડુ એક અલગ જ લયમાં જોવા મળ્યો. રાયડુએ સચિન તેંડુલકર સાથે 67 રનની ઓપનિંગ પાર્ટનરશિપ કરી, તે પહેલાં સચિન 25 રન બનાવીને આઉટ થયો. ગુરકીરત સિંહ માન 14 રન બનાવીને આઉટ થયો. રાયડુ એક છેડે મજબૂત રીતે ઊભો રહ્યો અને 50બોલમાં 74 રન બનાવ્યા, જે દરમિયાન તેને 9 ચોગ્ગા અને 3 છગ્ગા ફટકાર્યા. છેલ્લી ઓવરોમાં, સ્ટુઅર્ટ બિન્નીએ 9 બોલમાં 16 રનની કેમિયો ઈનિંગ રમી અને ભારતની જીતમાં મોટો ફાળો આપ્યો.
માત્ર 7 દિવસ પહેલા જીતી ચેમ્પિયન્સ ટ્રોફી
ટીમ ઈન્ડિયાને ચેમ્પિયન્સ ટ્રોફી જીત્યાને માત્ર એક અઠવાડિયું જ થયું છે. 7 દિવસમાં, સચિન તેંડુલકરની કેપ્ટનશીપ હેઠળ ઈન્ડિયા માસ્ટર્સે ઈન્ટરનેશનલ માસ્ટર્સ લીગનો ખિતાબ જીત્યો. તમને જણાવી દઈએ કે સમગ્ર ટુર્નામેન્ટ દરમિયાન ભારતે 7 મેચ રમી હતી, જેમાંથી તેને ફક્ત એક જ હારનો સામનો કરવો પડ્યો હતો.
