- બાંધકામ ન રોકનાર ઈજનેરથી માંડી પાણી લીકેજ, ડ્રેનેજ, રખડતા ઢોરના કિસ્સા
- વિજિલન્સની તપાસમાં AMCમાં કામના ધાંધિયા થતા હોવાનો ઘટસ્ફોટ
- 112થી લઇ 4,748 દિવસ સુધી ગેરહાજર રહેનાર 32 કર્મીને નોટિસ
અમદાવાદ મ્યુનિ.કોર્પોરેશને વિજિલન્સ તપાસમાં ક્ષતિ કરનાર અને કમિશનર રાઉન્ડમાં લીકેજ પાણી-ડ્રેનેજ, રખડતાં ઢોર, સુપરવિઝન નહીં કરનાર, ગંભીર બદેરકારી દાખવનાર અને ગેરકાયદે બાંધકામ નહીં અટકાવવા સહિત વિવિધ કારણોસર વર્ષ 2023-24માં એડ.સીટી ઇજનેરથી લઇ સફાઇ કર્મી મળી કુલ 293ને નોટિસ ફટકારાઇ છે. જેની સામે વર્ષ 2022-23માં 105ને નોટિસ
ઇસ્યુ કરાઇ હતી. વર્ષ 2022-23ની સરખામણીમાં 2023-24માં સૌથી વધુ નોટિસ અપાઇ છે. જેની તપાસ હાલ ચાલી રહી છે.
મ્યુનિ.વિપક્ષના કોર્પોરેટરે કહ્યું કે, મ્યુનિ.તંત્ર પાસે પૂરતો સ્ટાફ હોવા છતાં અધિકારી-કર્મચારીઓ દ્વારા પીવાના પાણીથી લઇ ડ્રેનેજ લીકેજ સહિત ગંભીર બેદરકારી દાખવામાં આવે છે. કેટલાક અધિકારીઓને ખુલ્લેઆમ છાવરવામાં આવે છે તો કેટલાકને નોટિસ આપી સંતોષ મનાય છે. આમ છતાં સ્થિતિમાં કોઇ સુધારો થતો નથી. કમિશનરના રાઉન્ડ દરમિયાન ઠેર ઠેર પાણી અને ડ્રેનેજ લીકેજ સહિત રખડતાં ઢોર જોવા મળે છે. જો કમિશનરના રાઉન્ડમાં અમદાવાદની આવી સ્થિતિ હોય તો કોર્પોરેટરના વિસ્તારમાં કેવી સ્થિતી હશે ? તે પ્રજાએ વિચારવાની બાબત છે.
વર્ષ 2022-23માં વિવિધ ઝોનથી લઇ સેન્ટ્રલ વર્કશોપ, ડ્રેનેજ પ્રોજેકટ વોટર પ્રોજેકટ, સી.એન.સી.ડી. હેલ્થ મધ્યસ્થ કચેરી, ગાર્ડન, સ્વિમીંગ કોચ, વ્યાયમ શાળા, સંસ્કાર કેન્દ્ર – મ્યુઝિયમ, સેન્ટ્રલ સ્ટોર્સ, સ્નાનાગાર, સોલિડ વેસ્ટમાં પિરાણા ડમ્પ સાઇટના અધિકારીઓ અને કર્મચારીઓને નોટિસ ફટકરી છે. બેથી વધુ કર્મચારીઓએ તો નગરપાલિકા અને મ્યુનિ.માં બંને જગ્યાએ નોકરી કરીને છેતરપીંડી કરી હોવાનું ધ્યાનમાં આવતા શોકોઝ નોટીસ ફટકારી છે.
પ્રોપર્ટી રિટર્ન ડેકલેરેશનની માહિતી ન મોકલવામાં ઇજનેર ખાતુ મોખરે
પ્રોપર્ટી રિટર્ન ડેકલેરેશનની માહિતી નહીં મોકલવામાં ઇજનેર વિભાગના કર્મચારીઓ વધુ હોવા સાથે સૌથી મોખરે છે. ઇજનેર સિવાય ટેક્સ, હેલ્થ, સેન્ટ્રલ સ્ટોર્સ, ડાયગ્નોસ્ટીક સેન્ટર્સ, સોલીડ વેસ્ટ, એસ્ટેટ, એસ્ટેટ ટાઉન પ્લાનિંગના કર્મચારીઓને પણ નોટિસ ફટકારી છે.
112થી લઇ 4,748 દિવસ સુધી ગેરહાજર રહેનાર 32 કર્મીને નોટિસ
મ્યુનિ.તંત્રમાં અધિકારીઓ અને કર્મચારીઓ પોતાની મરજી મુજબ કામ કરતા હોવાની કોર્પોરેટરો દ્વારા વારંવાર ફરિયાદો ઉઠી છે. પરંતુ ઉચ્ચઅધિકારીઓ માત્ર નોટીસ આપ્યા સિવાય અન્ય કોઇ પગલાં ભરતાં નથી. મ્યુનિ.માં ફરજ પર 112 દિવસથી લઇ 4,748 દિવસ સુધી બિનઅધિકૃત રીતે ગેરહાજર રહેવા બદલ 32 કર્મચારીને નોટીસ ફટકારીને તપાસ હાથ ધરાઇ છે.
2023-24માં ઇજનેર વિભાગમાં 40થી વધુ નોટિસ ફટકારી
મ્યુનિ.તંત્રમાં ઇજનેર ખાતુ મહત્વનું મનાય છે. આ ખાતા દ્વારા પાણી, ડ્રેનેજ અને રોડ-રસ્તાનું કામ કરાય છે. જેમાં અધિકારીઓ અને કર્મચારીઓ દ્વારા વારંવાર બેદરકારી દાખવાતી હોવાનું બહાર આવતા વર્ષ 2023-24માં ઇજનેર વિભાગમાં 40થી વધુ નોટીસ ફટાકરી છે. 2022-23માં 14ને નોટીસ ફટાકરાવામાં આવી હતી.
