Morbiમાં મિત્રને ઉછીના રૂપિયા આપવા ના પડે તેને લઈ હત્યા કરી

• મોરબીમાં એક યુવાન ગુમ થતા ૩૮ દિવસ બાદ પોલીસે ભેદ ઉકેલ્યો
  
• સનસનીખેજ હત્યાનો ઝડપાયેલ આરોપી પણ શાતીર હત્યારો
  
• ખતરનાક પ્લાન કરી હત્યા તો કરી પરંતુ મૃતદેહ છુપાવવાથી લઈને નિર્દોષ રહેવાના કર્યા અનેક ધમપછાડા
  

મોરબીમાં મિત્ર પાસેથી લીધેલા ૧૮ લાખ પરત ના આપવા પડે એ માટે પોતાના જ મિત્રની કરેલી કરપીણ હત્યાની આખી કહાની બહાર આવી છે.મોરબી એ ડિવીઝન પોલીસના જાપ્તામાં રહેલ આ શખ્સ એકદમ શાતીર મગજ ધરાવતો આરોપી છે જીતેન્દ્ર ગજીયા નામનો આ આરોપી નિવૃત પોલીસમેનનો પુત્ર છે વર્ષ ૨૦૧૮માં સુપ્રીમ કોર્ટના જામીન પર જેલમાંથી બહાર આવ્યો છે તેના ઉપર સને ૨૦૦૬માં રાજકોટના જેતપુર ખાતે એક ડોક્ટર પુત્રની સનસનીખેજ હત્યાનો આરોપ હતો.

ઉછીના રૂપિયા માંગવા જતા મળ્યું મોત

એ ડિવીઝન પોલીસે ૩૮ દિવસ પહેલા ગુમ થયેલ જીતેન્દ્ર કૈલા નામના યુવાનની કરપીણ હત્યા કરવાનો સનસનીખેજ આરોપમાં આરોપીની ધરપકડ કરી છે ૨૦ જુને ગુમ થયેલ જીતેન્દ્ર કૈલાની હત્યા તો એ જ દિવસે થઇ ગઈ હતી પરંતુ તેના મૃતદેહ સુધી પહોચવા અને આરોપી વિરુદ્ધ પુરતા પુરાવા એકત્ર કર્યા બાદ અંતે પોલીસે તેની ધરપકડ કરી લીધી છે હળવદ તાલુકા ના ઘનશ્યામગઢ ગામનો જીતેન્દ્ર કૈલા તા ૨૦ જુન ના રોજ તેના મિત્ર જીતેન્દ્ર ગજીયાની ઓફિસે ઉછીના આપેલ ૧૮ લાખ રૂપિયા પરત લેવા માટે પહોચે છે અને બસ ત્યારથી તે ગુમ થઇ જાય છે તેનું બાઈક પણ મોરબીના મંડળ ગામ પાસેથી રેઢું મળી આવે છે.

હત્યાબાદ લાશને દાટી દીધી

મોબાઈલથી તેની પત્નીને મેસેજ પણ આવે છે કે તે ઘર છોડી ને જાય છે તેને શોધે નહી પરંતુ તેના પરિવારજનોને શંકા હતી કે તે જેની પાસે પૈસા લેવા ગયો છે તે જીતેન્દ્ર ગજીયા દ્વારા તેનું અપહરણ કરવામાં આવ્યું છે આ શંકા ના લીધે ૨૫ જુનના રોજ જીતેન્દ્ર કૈલાના અપહરણની ફરિયાદ નોંધાઈ જોકે જુદા જુદા સીસીટીવી ચેક કર્યા મોબાઈલમાં થયેલ મેસેજ ચેક કર્યા અને અંતે જીતેન્દ્ર ગજીયાની અટકાયત કરીને પૂછતાછ કરી જીતેન્દ્ર ગજીયા ભાંગી પડયો અને તેણે હત્યા કર્યાની કબૂલાત આપી અને જીતેન્દ્ર કૈલાની દફનાવી દીધેલ લાશને ૩૮ દિવસ બાદ મોરબીના માણેકવાડા ગામની સીમમાં આવેલ ખેતર પાસેના પાણી નિકાલના વોકળામાં ખાડો ખોદીને શોધી કાઢી હતી.

હત્યાનો ઉકેલાયો ભેદ

સમગ્ર ઘટનાક્રમ ચકચારી છે તા ૨૦ ના રોજ ગુમ થયેલ જીતેન્દ્ર કૈલાની હત્યા એ જ દિવસે થઇ ગઈ હતી મોરબીના વાવડી ગામ પાસે આવેલ સતનામ કોમ્પ્લેક્ષ માંપ્રથમ માળે આવેલ ગાત્રા મોબાઈલ નામની દુકાને આરોપી જીતેન્દ્ર ગજીયાની બેઠક હતી ૨૦ જુનના રોજ મૃતક જીતેન્દ્ર કૈલા પોતાના મિત્ર જીતેન્દ્ર ગજીયાને ઉછીના આપેલ ૧૮ લાખ પરત લેવા માટે તેની ઓફીસ પહોચ્યો હતો અને ત્યારથી જ ગુમ થઇ ગયો હતો પોલીસે ગુમશુધાના આધારે આરોપી જીતેન્દ્ર ગજીયાની ઓફીસ પાસે સીસીટીવી ચેક કર્યા જેમાં ૨૦ તારીખ ના રોજ સાંજે ૪ વાગ્યે જીતેન્દ્ર કૈલા પોતાનું હેલમેટ પહેરીને ગાત્રા મોબાઈલ ઓફીસમાંથી નીચે ઉતરે છે અને પોતાનું બાઈક લઈને માંડલ પાસે જાય છે ત્યાં બાઈક મૂકી ને ગુમ થઇ જાય છે.

કઈ રીતે કરી હત્યા

પોલીસ તપાસમાં બહાર આવ્યું કે જીતેન્દ્ર કૈલાની તા ૨૦ જૂનના રોજ જીતેન્દ્ર ગજીયા એ તેની જ ઓફીસમાં હત્યા કરી નાખી દોરીથી ગળું દબાવી જીતેન્દ્ર કૈલાની હત્યા કર્યા બાદ ખુદ જીતેન્દ્ર ગજીયા નીચે આવ્યો હતો અને પહેલા જીતેન્દ્ર કૈલાના બાઈક માં મુકેલું હેલમેટ લઈ ને દુકાન માં ચાલ્યો ગયો બાદ માં જીત્તેન્દ્ર કૈલા ના કપડા પહેરીને માથામાં હેલ્મેટ સાથે જીતેન્દ્ર ગજીયા જ નીચે ઉતર્યો હતો ત્યાંથી બાઈક લઇ ને માંડલ ગામ પાસે બાઈક છોડી દીધું અને ત્યાંથી ગુમ થયો એવું દ્રશ્ય ઉભું કર્યુંસીસીટીવીમાં દેખાઈ રહેલ શક્શ જીતેન્દ્ર કૈલા જ છે એવું દેખાડવા માટે જીતેન્દ્ર ગજીયા એ આ ખેલ રચ્યો હતો.

મિત્રોને રૂપિયા આપતા પહેલા ચેતો

મૃતક જીતેન્દ્ર કૈલા પાસેથી આરોપી જીતેન્દ્ર ગજીયા એ મિત્રતાના દાવે ધિરાણ ભરવા માટે અગાઉ ૮ લાખ રૂપિયા લીધા હતા બાદમાં રવાપર ગામે જમીનના સોદાખત માટે ૧૦ લાખ રૂપિયા ઉછીના લીધા હતા આમ કુલ ૧૮ લાખ રૂપિયા આપવા બદલ યુવાને જીવ ગુમાવવો પડયો તો ચકચારી હત્યા જેવો સંગીન ગુનાહિત ઈતિહાસ ધરાવતો આરોપી જીતેન્દ્ર ગજીયા ખતરનાક પ્લાન કરી ને પૈસા ના આપવા પડે એ માટે મિત્ર ની જ હત્યા કરી નાખે છે અને ફિલ્મી કહાની ની જેમ મૃતદેહ છુપાવવાથી લઇ ને સીસીટીવી માં પણ કહાની કઈક અલગ જ લાગે એવો ભ્રમ ઉભો કરે છે પરંતુ અંતે હવે તે પોલીસ ના સકંજા માં આવી ચૂક્યો છે.