ચાલુ ટર્મમાં જ વિદ્યાર્થીઓને એડવાન્સ ફી દેવા સંચાલકોનું દબાણ : પરીક્ષામાં નહી બેસવા દેવાની ધમકી
એક બાજુ સરકાર શિક્ષણ દ્વારા વિકાસની વાત કરે છે ત્યારે સામાન્ય લોકો માટે શિક્ષણ ખર્ચાળ અને દોહેલુ બનતું જાય છે. દર વર્ષે ફી વધારો, યુનિફોર્મ અને અન્ય સ્ટેશનરીના ખર્ચથી વાલીઓ પરેશાન છે ત્યારે ખાનગી શાળા સંચાલકોએ આ વર્ષે રૂ.૨ થી ૧૦ હજાર સુધીનો ફી વધારો કરી દેતા વાલીઓમાં દેકારો બોલી ગયો છે.
મળતી વિગત મુજબ બે મહિના પછી નવુ સુત્ર શરૂ થઇ રહ્યુ છે. કહેવાતી ફી નિર્ધારણ કમિટીએ તો હજુ સતાવાર રીતે કોઇ નિર્ણય લીધો નથી પણ ખાનગી શાળા સંચાલકોએ નવા સત્ર માટે અત્યારથી જ રૂ.૨ થી ૧૦ હજારની એડવાન્સ ફી વસુલવાનું નક્કી કરી લીધુ છે.
ફી વધારાની મંજૂરી માગવી એ માત્રને માત્ર એક નાટક છે. અંદરખાને બધુ પહેલેથી જ ગોઠવાયેલુ હોય છે અને કહેવાતી ફી નિર્ધારણ કમિટી સાથે થયેલા આગોતરા ગોઠવણ મુજબ એપ્રિલથી શરૂ થતા નવા સત્રમાં વાલીઓના ખંભે જૂની ફીમાં મહીને એવરેજ ૨ થી ૧૦ હજારનો ફી વધારાનો બોજ આવી જાય તો નવાઇ નહીં રહે. ચાર મહિના અગાઉથી જ સ્કુલ માફિયાઓએ વાલીઓ પાસેથી લૂંટનો તખ્તો તૈયાર કરી લીધો છે.
મોંઘવારી અને બેકારી ગમે તેવી આટો લે એમછતા વાલીઓને પેટે પાટા બાંધીને પણ પોતાના સંતાનોના ભવિષ્ય માટે ઉછી ઉધારા કરીને પણ શિક્ષણ માફિયાઓના પેટ પૈસાથી ભરવા મજબૂર થવુ પડે છે. શિક્ષણધામને ઉઘાડી લૂંટનો ધંધો બનાવી નાખનાર સેલ્ફ ફાયનાન્સ સ્કુલના સંચાલકોએ ફરી એકવખત અને એ પણ ચાલુ વર્ષમાં બીજીવાર ફી વધારો ઝીંકવાની વેતરણમાં છે.
દર વર્ષે એક વ્યવસ્થિત નાટક ભજવાય અને પછી ઘરના ડાકલા અને અને ઘરના ભૂવા જેવી એફઆરસી(ફી નિર્ધારણ કમિટી) સર્વાનૂમતે મંજૂરી આપી દે છે. આ વખતે પણ આવુ જ બનવાનું છે એ નક્કી છે. સરકારની મીઠી નજર હેઠળ સેલ્ફ ફાયનાન્સ સ્કુલને વાલીઓ પાસેથી લૂંટની મંજૂરી મળી જ જાય તો નવાઇ નહીં.
‘ફી નિર્ધારણ સમિતી’માં જ સેલ્ફ ફાયનાન્સ સ્કુલના સંચાલકો છે તેમા સભ્ય!
ચેરિટી કમિશનર અને FRCમાં મુકાતા હિસાબનું મેળવણુ કેમ નહી?
કોઇપણ શાળા ફીમાં ઉઘાડી લૂંટ ન ચલાવે, મનસ્વી રીતે ફી વધારો ન કરે એ માટે ફી નિર્ધારણ સમિતિ બનાવવામા આવી છે. જો કે તેમા પણ સરકારે ઘરના ભૂવા અને ઘરના ડાકલા જેવા ખાનગી શાળા સંચાલકોની જ નિમણુંક કરી છે. ખાનગી શાળાઓએ તેની આવકના હિસાબ આ ફી નિર્ધારણ કમિટી(એફ.આર.સી.) સમક્ષ મુકવાનું ફરજિયાત છે. બીજીબાજુ મોટાભાગની શાળા તેમના કોઇને કોઇ ટ્રસ્ટના ઓઠા હેઠળ ચાલે છે એટલે ચેરિટિ કમિશનરમાં પણ ઓડિટ રિપોર્ટ મુકવામા આવતો જ હોય છે. ફી નિર્ધારણ કમિટી અને ચેરીટી કમિશનરમાં મુકવામા આવતા ઓડિટ રિપોર્ટ બન્નેનુ મેળવણુ જો એફ.આર.સી. કરે તો બેનંબરી આવકનો ભાંડો ફૂટી જાય તેમા શંકાને કોઇ સ્થાન નથી.
સ્કુલ ફી ઉપરાંત બસ, લેબ., ગણવેશ, ચોપડા
સહિતના નામે તોતીંગ વધારો આવશે
નવા સત્રમાં ફરી શિક્ષણ માફિયાઓએ ફીમાં લૂંટનો તખ્તો ઘડી લીધો છે. સ્કુલ ફી ઉપરાંત બસ, લેબ. સહિતના નામે તોતીંગ વધારો આવી રહ્યો છે. અત્યારથી જ સ્કુલ સંચાલકો કહેવાતી ફી નિર્ધારણ કમિટી સમક્ષ મસમોટા ખર્ચાઓ દેખાડીને એ મુજબ ફી વધારો કરવાની મંજૂરી માટે ફાઇલો મુકવા લાગશે. રાજકોટ શહેર-જિલ્લા વાલી મહામંડળે કરેલી ખાનગી તપાસમાં આ હકિકત સામે આવી છે. વિવિધ શાળાઓ દ્વારા રૂ.૧૦ હજારથી લઇને રૂ.૫૦ હજાર સુધીનો વધારો માગવામા આવશે.
ચાલુ સત્રમાં પણ વાલીઓને ધમકી, ફી ભરી જાવ નહીં તો પરીક્ષામાં બેસવા નહીં દઇએ
મોટાભાગનો વાલી વર્ગ એવો છે કે, જેમને વર્ષ આખાની ફી એકસાથે ચુકવવાનુ અનુકુળ પડતુ નથી. એટલે ત્રી માસીક અથવા તો છ માસિક ફી ભરે છે. ચાલુ સત્ર હજુ પુરુ પણ નથી થયુ ત્યાં ધોળકિયા સહિતની મોટાભાગની સ્કુલમાંથી વાલીઓને ફોન આવવા લાગ્યા છે કે, ફી ભરી જાવ નહીં તો તમારા સંતાનને પરીક્ષામાં બેસવા નહીં દઇએ.
ફી નિર્ધારણ કમિટીમાં હાલ પાંચમાંથી બે જ સભ્ય
રાજ્યમાં ખાનગી સ્કુલમાં ફીનું ધોરણ નક્કી કરવા માટે વર્ષ ૨૦૧૭માં સરકાર દ્વારા ફી નિર્ધારણનો કાયદો લાવવામા આવ્યો હતો. જે અંતર્ગત રાજ્યમાં ૪ ઝોનમાં કમિટીની રચના કરવામા આવી હતી. એ પૈકી રાજકોટમાં બેસતી સૌરાષ્ટ્ર ઝોનની કમિટીમાં પણ પાંચમાંથી બે જ સભ્યો રહ્યા છે.
