મેલબોર્ન ટેસ્ટનો પ્રથમ દિવસ પૂરો થતાંની સાથે જ ICCએ અનુભવી બેટ્સમેન વિરાટ કોહલી પર ભારે દંડ ફટકાર્યો છે. વાસ્તવમાં વિરાટે ઓસ્ટ્રેલિયાના ઓપનર સેમ કોન્સ્ટાસને ટક્કર મારી હતી. આ ઘટના બાદ ICCએ વિરાટની મેચ ફીમાંથી 20 ટકા રકમ કાપી લીધી છે અને તે લેવલ 1 માટે દોષી સાબિત થયો છે. પ્રથમ દિવસની રમત સમાપ્ત થયા બાદ વિરાટે પણ પોતાની ભૂલ સ્વીકારી લીધી છે, જેના કારણે આ મામલે વધુ સુનાવણીની જરૂર રહેશે નહીં.
10મી ઓવરમાં બની આ ઘટના
ઓસ્ટ્રેલિયન ઇનિંગ્સની 10મી અને 11મી ઓવર વચ્ચેના વિરામ દરમિયાન, જ્યારે કોન્સ્ટાસ અને ઉસ્માન ખ્વાજા છેડો બદલી રહ્યા હતા, ત્યારે કોહલી કોન્સ્ટાસ તરફ ગયો અને તેને ખભા પર માર્યો. તે સમયે કોમેન્ટ્રી કરી રહેલા ઓસ્ટ્રેલિયાના પૂર્વ કેપ્ટન રિકી પોન્ટિંગનું પણ માનવું હતું કે કોહલીએ જાણી જોઈને આવું કર્યું છે. બીજી તરફ પૂર્વ ભારતીય ખેલાડી અને કોચ રવિ શાસ્ત્રીએ વિરાટની આ ક્રિયાને સંપૂર્ણપણે બિનજરૂરી ગણાવી હતી.
વિરાટ લેવલ વન માટે દોષી જણાયો
રિપોર્ટ્સ અનુસાર વિરાટ લેવલ વનમાં દોષી સાબિત થયો છે અને તેથી તેની મેચ ફી કાપવામાં આવી છે. જો આ લેવલ ટુનો ગુનો હોત તો ભારતીય બેટ્સમેનને 3 કે 4 ડીમેરિટ પોઈન્ટ મળ્યા હોત. આગામી મેચ માટે ખેલાડીને સસ્પેન્ડ કરવા માટે 4 પોઈન્ટ પૂરતા છે. આના પરથી સ્પષ્ટ છે કે વિરાટ સિડનીમાં યોજાનારી પાંચમી મેચમાં રમતો જોવા મળશે.
આ ઘટના અંગે કોન્સ્ટાસે શું કહ્યું?
આ ઘટના બાદ કાંગારુ ઓપનર કોન્સ્ટાસે સવારના સત્રમાં ડ્રિંક્સ બ્રેક દરમિયાન તેના વિશે વાત કરી અને કહ્યું કે તે આ ઘટનાને મેદાનની અંદર રાખવા માંગે છે, પરંતુ તેને ભારતીય ટીમ સામે સખત સ્પર્ધા આપવામાં કોઈ વાંધો નથી. કોન્સ્ટાસે કહ્યું, ‘ફિલ્ડ પર જે થાય છે તે મેદાન પર જ રહે છે. મને સ્પર્ધા કરવી ગમે છે અને ડેબ્યૂ કરવા માટે દર્શકોથી ભરેલા સ્ટેડિયમથી વધુ સારી જગ્યા કોઈ હોઈ શકે નહીં.
