- ભારતને હરાવીને ઓસ્ટ્રેલિયા છઠ્ઠી વખત વર્લ્ડ ચેમ્પિયન
- ઓસ્ટે્લિયાએ ભારતને 6 વિકેટ હરાવ્યું
- ઓપનર ટ્રેવિસ હેડે 137 રનની શાનદાર ઇનિંગ રમી
કરોડો ભારતીય ચાહકોના ફરી એકવાર સપના ચકનાચૂર થઈ ગયા. અમદાવાદના નરેન્દ્ર મોદી સ્ટેડિયમમાં રમાયેલી વર્લ્ડ કપ 2023ની ફાઈનલ મેચમાં ઓસ્ટ્રેલિયાએ રોહિત શર્માની કેપ્ટન્સીવાળી ભારતીય ટીમને 6 વિકેટે હરાવ્યું હતું. ઓસ્ટ્રેલિયાની આ જીતમાં ડાબોડી ઓપનર ટ્રેવિસ હેડે 137 રનની શાનદાર ઇનિંગ રમીને મહત્વનું યોગદાન આપ્યું હતું. આ સિવાય લાબુશેને 58 રન બનાવ્યા હતા. ટાઇટલ મેચમાં ઓસ્ટ્રેલિયાએ શરૂઆતથી જ ભારત પર પ્રભુત્વ જમાવ્યું હતું.
ઓસ્ટ્રેલિયાનું આ છઠ્ઠું ODI વર્લ્ડકપ ટાઇટલ હતું. મેચમાં ઓસ્ટ્રેલિયાએ ટોસ જીતીને બોલિંગ કરવાનો નિર્ણય લીધો હતો. પ્રથમ બેટિંગ કરતા ભારતીય ટીમ 50 ઓવરમાં 240 રનના સ્કોર પર ઓલઆઉટ થઈ ગઈ હતી. 241 રનના લક્ષ્યનો પીછો કરતા ઓસ્ટ્રેલિયાએ 43 ઓવરમાં મેચ જીતી લીધી હતી. પેટ કમિન્સના નેતૃત્વમાં ઓસ્ટ્રેલિયા બેટિંગ, બોલિંગ અને ફિલ્ડિંગ સહિત ત્રણેય વિભાગોમાં શાનદાર હતું.
ઓપનર ટ્રેવિસ હેડ અને પાંચમા નંબરના માર્નસ લાબુશેનની જોડીએ ઓસ્ટ્રેલિયાને જીત અપાવી હતી. બંને બેટ્સમેનોએ ચોથી વિકેટ માટે 192 રનની ભાગીદારી કરી હતી, જેની સામે તમામ ભારતીય બોલરો નિષ્ફળ રહ્યા હતા. હેડે સદી ફટકારી હતી અને લાબુશેને ફિફ્ટી ફટકારી હતી. બંને બેટ્સમેનોએ સમજદારીપૂર્વક દાવને આગળ વધાર્યો અને કાંગારૂ ટીમને જીત તરફ દોરી ગઈ. જોકે, ટ્રેવિસ મેચ જીતતા પહેલા 2 રને હેડ આઉટ થઈ ગયો હતો.
ઓસ્ટ્રેલિયાનો દબદબો યથાવત
ઓસ્ટ્રેલિયાએ 6.6 ઓવરમાં 3 વિકેટ ગુમાવી હોવા છતાં પણ ઓસ્ટ્રેલિયાએ મેચમાં પોતાનું વર્ચસ્વ જાળવી રાખ્યું હતું. કાંગારૂ ટીમને પહેલો ફટકો ડેવિડ વોર્નર (07)ના રૂપમાં લાગ્યો હતો, જેને શમીએ આઉટ કર્યો હતો. આ પછી બુમરાહે પાંચમી ઓવરમાં મિચેલ માર્શ (15)ને પેવેલિયન મોકલી દીધો હતો. ત્યારબાદ બુમરાહે સાતમી ઓવરમાં સ્ટીવ સ્મિથ (04)ને પોતાનો શિકાર બનાવ્યો હતો. ઓસ્ટ્રેલિયાએ 47 રનના સ્કોર પર 3 વિકેટ ગુમાવી દીધી હતી. પરંતુ આ પછી ટ્રેવિસ હેડ અને માર્સન લાબુશેનની ચોથી વિકેટની ભાગીદારી ભારતીય બોલરો માટે ઘાતક સાબિત થઈ, જેને તેઓ સમજી શક્યા નહીં. બંનેએ 215 બોલમાં 192 રન જોડ્યા હતા. જો કે, આ ભાગીદારી 43મી ઓવરના છેલ્લા બોલ પર તૂટી ગઈ, જ્યારે ઓસ્ટ્રેલિયાને જીતવા માટે માત્ર 2 રનની જરૂર હતી.
ભારતીય બોલરો નિષ્ફળ રહ્યા હતા
ભારતીય ટીમ માટે જસપ્રીત બુમરાહે 9 ઓવરમાં 43 રન આપીને 2 વિકેટ ઝડપી હતી. આ સિવાય મોહમ્મદ શમી અને સિરાજને 1 સફળતા મળી હતી.
