દક્ષિણ આફ્રિકાની શ્રીલંકા સામે 2-0થી જીત બાદ વર્લ્ડ ટેસ્ટ ચેમ્પિયનશિપનું પોઈન્ટ ટેબલ ઘણું રોમાંચક બની ગયું છે. હાલમાં ભારતની સાથે ઓસ્ટ્રેલિયા, દક્ષિણ આફ્રિકા અને શ્રીલંકાની ટીમો ફાઇનલમાં પહોંચવાની દાવેદાર છે. ફાઇનલમાં પહોંચવાનો સૌથી મોટો દાવેદાર હાલમાં દક્ષિણ આફ્રિકા છે, જે આગામી વર્ષે લોર્ડ્સમાં થનારી WTC ટાઇટલ મેચમાં પોતાનું સ્થાન મેળવવાથી એક જીત દૂર છે. ભારતની વાત કરીએ તો તેનો રસ્તો થોડો મુશ્કેલ બની ગયો છે.
કેવી રીતે થશે WTC ફાઈનલમાં પહોંચશે ટીમ ઈન્ડિયા?
હવે ભારતે અંતિમ મેચમાં જગ્યા બનાવવા માટે કાંગારૂ ટીમ સામે બોર્ડર-ગાવસ્કર સિરીઝમાં તેની આગામી ત્રણ મેચ જીતવી પડશે. જો ટીમ આવું કરી શકતી નથી તો તેણે અન્ય ટીમોના પરિણામો પર નિર્ભર રહેવું પડશે. ધારો કે ભારત ઓસ્ટ્રેલિયા સામે ટેસ્ટ સિરીઝ 2-3ના માર્જિનથી હારી જાય છે. આવી સ્થિતિમાં, ટીમે પાકિસ્તાન પર નિર્ભર રહેવું પડશે, અને પ્રાર્થના પણ કરવી પડશે કે પાડોશી દેશ પ્રોટીઝ ટીમને તેની જ જમીન પર 2-0થી હરાવે.
પાકિસ્તાન માટે મુશ્કેલ હશે આ કામ
પાકિસ્તાન ટીમ માટે તે મુશ્કેલ કામ હશે, કારણ કે દક્ષિણ આફ્રિકા ઘરઆંગણે ખૂબ જ મજબૂત છે. ટીમ ઈન્ડિયા માટે આ એકલું પૂરતું નથી. પાકિસ્તાનની જીત ઉપરાંત, ટીમ એ પણ ઈચ્છશે કે ઓસ્ટ્રેલિયા તેના ઘરે રમાનારી બે મેચની ટેસ્ટ સિરીઝની એક મેચમાં શ્રીલંકાને હરાવી દે.
એક સમયે ભારત હતું સૌથી આગળ
તમને જણાવી દઈએ કે થોડા મહિના પહેલા એક એવો સમય હતો જ્યારે ટીમ ઈન્ડિયા સતત ત્રીજી વખત વર્લ્ડ ટેસ્ટ ચેમ્પિયનશિપની ફાઇનલમાં પહોંચવામાં સૌથી આગળ હતી. પરંતુ છેલ્લી પાંચમાંથી 4 ટેસ્ટ હાર્યા બાદ સમીકરણ સંપૂર્ણપણે બદલાઈ ગયું છે. જો ભારત ઓસ્ટ્રેલિયા સામેની બાકીની ત્રણમાંથી બે ટેસ્ટ જીતે છે અને એક ડ્રો કરે છે, તો તેની પાસે ટોચની બેમાં સ્થાન મેળવવાની તક છે, ભલે કાંગારુઓ શ્રીલંકા સામેની સિરીઝ 2-0ના માર્જિનથી જીતે.
