- ભારત અને ઈંગ્લેન્ડ વચ્ચે સિરીઝની બીજી ટેસ્ટ
- શુભમન ગિલની 13 ઇનિંગ બાદ શાનદાર સદી
- શુભમન ગિલે 132 બોલમાં 100 રન પૂર્ણ કર્યા
ભારત અને ઈંગ્લેન્ડ સામે રમાઈ રહેલી બીજી ટેસ્ટ મેચમાં શુભમન ગિલે 13 ઈનિંગ્સ બાદ પોતાની પ્રથમ ફિફટી ફટકારી હતી. તેની ફિફટી જ નહીં, તે પછી તેણે તેની ત્રીજી ટેસ્ટ સદી પણ ફટકારી. ત્રીજા નંબર પર રમતી વખતે ગિલની આ પ્રથમ સદી હતી. જ્યારે ભારત બીજા દાવમાં બેટિંગ કરવા આવ્યું ત્યારે તેના બંને ઓપનર રોહિત શર્મા અને યશસ્વી જયસ્વાલે ત્રીજા દિવસે 28 રનથી આગળ રમવાનું શરૂ કર્યું. પરંતુ જેમ્સ એન્ડરસને પહેલા શાનદાર બોલથી રોહિતને ક્લીન બોલ્ડ કર્યો અને ત્યારબાદ બીજી ટેસ્ટની પ્રથમ ઇનિંગમાં બેવડી સદી ફટકારનાર યશસ્વી પણ જેમ્સ એન્ડરસનનો શિકાર બન્યો હતો.
ત્રીજા નંબર પર ગિલની પ્રથમ સદી
ભારતનો બીજો દાવ 3 નંબર પર બેટિંગ કરવા આવેલા શુભમન ગિલ માટે કરો યા મરો હતો. તેણે છેલ્લી 13 ઇનિંગ્સ બાદ સદી ફટકારી હતી. ગિલ માટે આ મેચ ખૂબ જ મહત્વપૂર્ણ માનવામાં આવી રહી હતી. કારણ કે છેલ્લી 12 ઇનિંગ્સમાં તેના બેટમાંથી એકપણ ફિફ્ટી નથી આવી. બીજી ટેસ્ટની પ્રથમ ઇનિંગમાં પણ તે માત્ર 34 રન બનાવીને આઉટ થયો હતો. જે બાદ ગિલની ઘણી ટીકા થઈ રહી હતી અને ચાહકો સતત તેને ટીમમાંથી હટાવવાની માંગ કરી રહ્યા હતા. પરંતુ હવે ઈંગ્લેન્ડ સામે મુશ્કેલ સંજોગોમાં આવી રહેલા ગિલની આ સદી તેના ટીકાકારોને જડબાતોડ જવાબ છે. તેણે 132 બોલમાં સદી ફટકારી હતી.
13 ઇનિંગ્સમાં પ્રથમ સદી
જ્યારથી ગિલ ત્રીજા નંબર પર બેટિંગ કરવા મેદાનમાં આવ્યો હતો. ત્યારથી તે સતત રન બનાવવા માટે સંઘર્ષ કરી રહ્યો હતો. ગિલે આ પહેલા રમેલ 12 ઇનિંગ્સમાં એકપણ ફિફ્ટી ફટકારી ન હતી. પરંતુ હવે ઈંગ્લેન્ડ સામેની આ સદી તેને થોડો આત્મવિશ્વાસ આપશે.
મેચની સ્થિતિ
વિશાખાપટ્ટનમમાં ભારત અને ઈંગ્લેન્ડ વચ્ચે રમાઈ રહેલી બીજી ટેસ્ટનો આજે ત્રીજો દિવસ છે. આજે ભારતીય ટીમની નજર મેચ પુરી કરીને સિરીઝ બરાબરી કરવા પર હશે. બીજા દિવસે ભારતીય ટીમનો દાવ ખતમ થયો, પછી ઈંગ્લેન્ડની ઈનિંગ પણ સમાપ્ત થઈ અને ભારતની બીજી ઈનિંગ શરૂ થઈ. ભારતે પ્રથમ દાવમાં 396 રન બનાવ્યા હતા જેના જવાબમાં ઈંગ્લેન્ડની ટીમ 253 રનમાં ઓલઆઉટ થઈ ગઈ હતી. યશસ્વી જયસ્વાલે શાનદાર 209 રન બનાવ્યા હતા. ભારતને 143 રનની લીડ મળી હતી. હવે બીજી ઈનિંગમાં જોવાનું એ રહેશે કે ટીમ ઈન્ડિયા કેટલા રનનો સ્કોર કરે છે અને ઈંગ્લિશ ટીમ સમક્ષ કયો ટાર્ગેટ રાખે છે.
