ICC ચેમ્પિયન્સ ટ્રોફી 2025ની ફાઇનલ મેચ આજે રમાશે. ભારત અને ન્યુઝીલેન્ડ રવિવારે (9 માર્ચ) ના રોજ ફાઇનલમાં ટકરાવાના છે. બંને ટીમો વચ્ચેની આ મેચ ભારતીય સમય અનુસાર બપોરે 2.30 વાગ્યાથી રમાશે. ભારતીય ટીમે ઓસ્ટ્રેલિયાને 4 વિકેટથી હરાવીને ટાઈટલ મેચમાં જગ્યા બનાવી લીધી છે. બીજી તરફ કિવી ટીમે બીજી સેમીફાઈનલમાં સાઉથ આફ્રિકાને 50 રનથી હરાવ્યું હતું. ચેમ્પિયન્સ ટ્રોફીની ફાઈનલ મેચમાં ભારતની જીત માટે પ્રશંસકો પૂજા અને આરતી કરી રહ્યા છે. પ્રશંસકો ભગવાન શિવની અભિષેક આરતી અને ભજન કરતા જોઈ શકાય છે.
ભારતે ગ્રુપ મેચમાં ન્યુઝીલેન્ડને હરાવ્યું હતું
જો કે આ ટુર્નામેન્ટની ગ્રુપ મેચમાં ભારતે ન્યુઝીલેન્ડને હરાવ્યું છે, પરંતુ ફાઇનલમાં કઠિન સ્પર્ધાની અપેક્ષા છે. ભારતીય ટીમે વિરાટ કોહલી અને રોહિત શર્મા જેવા દિગ્ગજોને લઈને ભાવુક થવાનું ટાળવું પડશે અને ટીમના તમામ ખેલાડીઓએ પોતાનું સર્વશ્રેષ્ઠ પ્રદર્શન આપવું પડશે. ન્યુઝીલેન્ડ હંમેશા ભારત માટે કઠિન પડકાર સાબિત થયું છે અને આઈસીસી ટુર્નામેન્ટમાં ન્યુઝીલેન્ડનો હાથ ઉપર છે. ન્યૂઝીલેન્ડે ICC નોકઆઉટ મેચોમાં ભારત સામે ચારમાંથી ત્રણ મેચ જીતી છે.
હાલ ભારતની સૌથી મોટી તાકાત તેની સ્પિન ચોકડી છે
હાલ ભારતની સૌથી મોટી તાકાત તેની સ્પિન ચોકડી છે, જે દુબઈની સપાટ પિચ પર ઘણી સફળ રહી છે. ભારત આત્મવિશ્વાસથી ભરેલું છે. એવું લાગે છે કે ફાઇનલમાં પણ ટીમ ઇન્ડિયા ચાર સ્પિનરો અને બે ઝડપી બોલરોના સંયોજન સાથે ઉતરશે. જો ભારત અને પાકિસ્તાન વચ્ચે મેચ રમાઈ હતી તે જ પીચ પર ફાઈનલ રમાય તો આ ચાર બોલર કિવી ટીમને સ્પિનની જાળમાં ખરાબ રીતે ફસાવી શકે છે. જો કે, ન્યુઝીલેન્ડની ટીમ પાસે સેન્ટનર, બ્રેસવેલ, રચિન અને ગ્લેન ફિલિપ્સ જેવા અનુભવી સ્પિનરો પણ છે.
ભારત 25 વર્ષ પહેલા ફાઈનલમાં ન્યુઝીલેન્ડ સામે હારી ગયું હતું
ન્યુઝીલેન્ડ માટે સૌથી મોટી આશા કેન વિલિયમસન અને રચિન રવિન્દ્રની બેટિંગ પર રહેશે. બંનેએ અત્યાર સુધી ઘણી મોટી ઇનિંગ્સ રમી છે. રચિને આ ટૂર્નામેન્ટમાં બે સદી પણ ફટકારી છે, જોકે તેણે ભારત સામેની ગ્રુપ મેચમાં બેટિંગ કરી નહોતી. ન્યૂઝીલેન્ડના સ્પિનરોએ ગયા વર્ષે ટેસ્ટ શ્રેણીમાં ભારતને ખૂબ જ પરેશાન કર્યું હતું અને ફરી એકવાર તેઓ 2000 પછી પ્રથમ વખત ICC ODI ખિતાબ જીતવાના પ્રયાસમાં તે પ્રદર્શનનું પુનરાવર્તન કરવા માંગશે. પચીસ વર્ષ પહેલાં નૈરોબીમાં ન્યુઝીલેન્ડે ફાઇનલમાં ભારતને હરાવીને નોકઆઉટ ટુર્નામેન્ટ જીતી હતી.
