- ભારત અને દક્ષિણ આફ્રિકા વચ્ચે કેપટાઉનમાં બીજી ટેસ્ટ ચાલુ
- પ્રથમ દાવમાં દક્ષિણ આફ્રિકા માત્ર 55 રનમાં ઓલઆઉટ થઈ ગયું
- સિરાજે કિલ્લાની જેમ મજબૂત દેખાતી આફ્રિકન બેટિંગ લાઇનઅપને કરી ખતમ
આજે ભારત અને દક્ષિણ આફ્રિકા વચ્ચે કેપટાઉનમાં બીજી ટેસ્ટ રમાઇ રહી છે. દક્ષિણ આફ્રિકાએ ટોસ જીતી પ્રથમ બેટીંગ કરવા ઉતરી હતી. ભારત તરફથી આવેલા સિરાજ નામના તોફાનમાં તેના 6 બેટ્સમેનો આઉટ થઇ ગયા હતા. ભારત સામે બીજી ટેસ્ટના પ્રથમ દાવમાં દક્ષિણ આફ્રિકા માત્ર 55 રનમાં ઓલઆઉટ થઈ ગયું હતું. આફ્રિકન ટીમ મેચમાં પુરા સત્ર સુધી પણ બેટિંગ કરી શકી ન હતી. કુલ 55 રન સાથે આફ્રિકાએ ભારત સામે ટેસ્ટ ક્રિકેટની એક ઇનિંગમાં સૌથી નાનો ટોટલ બનાવવાનો શરમજનક રેકોર્ડ બનાવ્યો હતો. પ્રથમ ટેસ્ટમાં ભારતીય ઝડપી બોલર મોહમ્મદ સિરાજે કિલ્લાની જેમ મજબૂત દેખાતી આફ્રિકન બેટિંગ લાઇનઅપને ખતમ કરવામાં મહત્વપૂર્ણ યોગદાન આપ્યું હતું, જેણે 6 વિકેટ પોતાના નામે કરી હતી.
આ પહેલા ન્યૂઝિલેન્ડના નામે હતો આ રેકોર્ડ
આ પહેલા ન્યૂઝીલેન્ડના નામે ભારત સામે ટેસ્ટમાં સૌથી ઓછો સ્કોર બનાવવાનો શરમજનક રેકોર્ડ હતો, જ્યારે 2021માં વાનખેડે ખાતે કિવી ટીમ ભારતીય ટીમ સામે 62 રનમાં ઓલઆઉટ થઈ ગઈ હતી. પરંતુ દક્ષિણ આફ્રિકાએ ભારત સામે 55 રનમાં ઓલઆઉટ થઈને આ ખરાબ રેકોર્ડ પોતાના નામે કરી લીધો છે.
135 વર્ષ જૂનો રેકોર્ડ તૂટ્યો
દક્ષિણ આફ્રિકાની ટીમ અગાઉ 1889માં ઘરઆંગણે ઈંગ્લેન્ડ સામે 84 રનમાં ઓલઆઉટ થઈ ગઈ હતી. ટેસ્ટ ક્રિકેટમાં દક્ષિણ આફ્રિકાએ 1889માં ઈંગ્લેન્ડ સામે ઘરઆંગણે 84 રનનો સૌથી ઓછો સ્કોર બનાવ્યો હતો. ભારતીય ફાસ્ટ બોલર મોહમ્મદ સિરાજે હવે 135 વર્ષ જૂનો રેકોર્ડ તોડી નાખ્યો છે. તેઓએ સાઉથ આફ્રિકાને પોતાના ઘરઆંગણે સૌથી ઓછા સ્કોર પર ઓલઆઉટ કર્યું.
ભારત સામે દક્ષિણ આફ્રિકાનો સૌથી ઓછો ટેસ્ટ સ્કોર
- 55 રન- કેપ ટાઉન ટેસ્ટ, 2023
- 79 રન- નાગપુર ટેસ્ટ, 2015
- 84 રન- જોહાનિસબર્ગ ટેસ્ટ, 2006
- 105 રન- અમદાવાદ ટેસ્ટ, 1996
- 109 રન- મોહાલી ટેસ્ટ, 2015
હોમ ગ્રાઉન્ડ પર બનેલી સૌથી નાનો સ્કોર
માત્ર ભારત સામે જ નહીં પરંતુ ઘરની ધરતી પર ટેસ્ટ ક્રિકેટમાં આફ્રિકાની ઈનિંગ્સનો સૌથી નાનુ ટોટલ 55 રન હતો. બે મેચોની ટેસ્ટ શ્રેણીની પ્રથમ મેચમાં યજમાન આફ્રિકા બેટિંગમાં ખૂબ જ મજબૂત દેખાઈ રહ્યું હતું, પરંતુ બીજી ટેસ્ટમાં તે ભારતીય બોલરોની સામે નબળી ઈમારતની જેમ તૂટી પડ્યું હતું.
સિરાજ સહિતના ભારતીય બોલરોએ તબાહી મચાવી
ભારતીય બોલરો દક્ષિણ આફ્રિકાના બેટ્સમેનો પર ક્રિકેટના બોલ નહીં, પણ આગના બોલ ફેંકી રહ્યા હતા. ઈનિંગની શરૂઆતથી જ ભારતે કડક સિકંજો રાખ્યો હતો, જેમાં મોહમ્મદ સિરાજે મહત્વની ભૂમિકા ભજવી હતી. સિરાજે 6 ઓવરમાં બંને આફ્રિકાના ઓપનરોને પેવેલિયનનો રસ્તો બતાવ્યો હતો. સિરાજે પહેલા એડન માર્કરમ (02) અને પછી ડીન એલ્ગર (04)ને પ્રથમ ટેસ્ટમાં શાનદાર સદી ફટકારીને પેવેલિયન પરત મોકલ્યો હતો. સિરાજે માત્ર 15 રનમાં 6 વિકેટ લીધી હતી. આ સિવાય જસપ્રિત બુમરાહ અને મુકેશ કુમારે 2-2 વિકેટ પોતાના નામે કરી અને આફ્રિકાને 55 રનમાં ઓલ આઉટ કરી દીધુ.
