સરહદ પર ચીનની આ હરકતથી ટેન્શનમાં આવ્યા ભારત-ભૂટાન, થયો મોટો ખુલાસો

• સરહદને અડીને શહેરનો વિકાસ
  
• સૈન્ય માટે ઉપયોગી બની શકે તેવું સિટી
  
• ચીનમાં આ શહેર આવ્યું છે ચર્ચામાં
  

ચીને ભારત અને ભૂતાનની સરહદને અડીને આવેલા કોનાના લેબુગૌ ગામને અપગ્રેડ કરીને શહેર બનાવ્યું છે. આ જોવા માટે લોકો ચીનમાં દૂર દૂરથી આવી રહ્યા છે. આ સ્થળ ભારત અને ભૂતાનની સરહદને અડીને આવેલું છે. 1962ના યુદ્ધ દરમિયાન ચીનની સેનાએ આ ગામમાં પડાવ નાખ્યો હતો.

ચીને ભારત-ભૂતાન બોર્ડર પાસે તિબેટના એક ગામને અપગ્રેડ કરીને શહેરમાં બનાવ્યું છે. આ નવા શહેરે ચીન સહિત સમગ્ર વિશ્વનું ધ્યાન ખેંચ્યું છે. પશ્ચિમમાં ભૂટાન અને દક્ષિણમાં ભારતની સરહદે આવેલું આ વ્યૂહાત્મક રીતે મહત્વપૂર્ણ શહેર 1962ના યુદ્ધ દરમિયાન પણ ચર્ચામાં હતું. તે સમયે, ચીની સેનાએ આ સ્થાન પર તેની ભારે સૈન્ય ટુકડી તૈનાત કરી હતી જે એક ગામ હતું. હાલમાં જ ચીનના સરકારી મીડિયા ગ્લોબલ ટાઈમ્સે આ શહેરની તસવીર જાહેર કરી છે. આ તસવીરમાં સળંગ બાંધેલી નવી ઇમારતો નજરે પડે છે. ચીન આને ગ્રામીણ વિસ્તારોના પુનરુત્થાન તરીકે દર્શાવી રહ્યું છે, પરંતુ વાસ્તવમાં તે સરહદી વિસ્તારમાં ચીનની ઈન્ફ્રાસ્ટ્રક્ચર વિકસાવવાની એક ચાલ છે. ચીન એવું બતાવવા માંગે છે કે તે સરહદી વિસ્તારોમાં તેના હરીફો કરતા વધુ શક્તિશાળી છે.

ચીનની આ ચાલથી ભારત અને ભૂટાને ખાસ ચેતવા જેવું છે. કારણ કે તેના લીધે ભારત અને ભૂટાનના સરહદ પર નવો ખતરો ઉભો થયો છે. ચીન આ શહેરોને પોતાની સેનાના લોજિસ્ટિક સેન્ટર અને તેના સપ્લાય સેન્ટર તરીકે ઉપયોગ કરી શકે છે. ચીન તેના સૈનિકોને સાદા નાગરિકોના વેશમાં અહીં સ્થાયી કરી શકે છે અને તેના બદલે ભારત અને ભૂટાનના સરહદીય વિસ્તારોમાં જાસૂસી અને અન્ય ષડયંત્રોને અમલી બનાવી શકે તેમ છે.

ચીને ભારત-ભૂતાન બોર્ડર પર જે ગામને અપગ્રેડ કરીને શહેર બનાવ્યું છે તેનું નામ લેબુગૌ છે. તે કોનાની દક્ષિણે સ્થિત એક સ્થળ છે. ગ્લોબલ ટાઈમ્સે અહેવાલ આપ્યો છે કે તે 1962ના યુદ્ધમાં ભારત વિરુદ્ધ ચીની આક્રમણનો મુખ્ય યુદ્ધ વિસ્તાર હતો. તિબેટ મિલિટરી કમાન્ડના તત્કાલીન કમાન્ડર જનરલ ઝાંગ ગુઓહુઆની ફ્રન્ટલાઈન કમાન્ડ પોસ્ટની જગ્યા હજુ પણ સચવાયેલી છે. લેબુગોઉમાં 1500 લોકો રહે છે. 2020 માં, ગલવાન અથડામણ પછી વાસ્તવિક નિયંત્રણ રેખા પર ચાલી રહેલા તણાવ વચ્ચે, ચીને આ સ્થાનને રાષ્ટ્રીય લાલ પ્રવાસન રૂટમાં સામેલ કર્યું હતું, જેથી ચીનના લોકોમાં દેશભક્તિની ભાવના જગાડી શકાય

લેબુગૌમાં બનેલી નવી ટાઉનશીપમાં હોસ્પિટલો, શાળાઓ, કિન્ડરગાર્ટન્સ અને અન્ય ઈન્ફ્રાસ્ટ્રક્ચર પ્રોજેક્ટ્સ વિકસાવવામાં આવ્યા છે. તેનો મુખ્ય ધ્યેય લોકોને સરહદી વિસ્તારમાં સ્થાયી થવા માટે પ્રોત્સાહિત કરવાનો છે. ચીને આ ગામને તિબેટના મુખ્ય વીજળી ગ્રીડ સાથે પણ જોડ્યું છે. જેના કારણે વીજળીની સમસ્યા પણ હલ થઈ છે. સ્થાનિક લોકોનો દાવો છે કે તેમને દૂરના જંગલોમાં પણ મોબાઈલ ફોન સિગ્નલ મળે છે. સરકારે તેમના બાળકો ભણવા માટે સારી શાળાઓ ખોલી છે અને લોકોને સબસિડી આપે છે.