મેલબોર્ન ટેસ્ટમાં ચોથા દિવસે ભારતીય ટીમ ખૂબ જ મજબૂત સ્થિતિમાં જોવા મળી હતી. ખાસ કરીને ટીમ ઈન્ડિયાની બોલિંગ સામે કાંગારુ બેટ્સમેનો વધુ સમય ક્રિઝ પર ટકી શક્યા ન હતા. ચોથા દિવસે જસપ્રીત બુમરાહ અને મોહમ્મદ સિરાજે શાનદાર બોલિંગ કરી.
ચોથા દિવસે વિરાટ કોહલી પણ સ્ટીવ સ્મિથ માટે માસ્ટર પ્લાન બનાવતો જોવા મળ્યો અને બીજા જ બોલ પર સ્મિથ કોહલીના માસ્ટર પ્લાનમાં ફસાઈ ગયો.
કોહલીના માસ્ટર પ્લાનમાં ફસાયો સ્મિથ
જ્યારે સ્ટીવ સ્મિથ ક્રિઝ પર બેટિંગ કરી રહ્યો હતો, ત્યારે રોહિત શર્માએ મોહમ્મદ સિરાજને બોલિંગ માટે નિયુક્ત કર્યો હતો. આ દરમિયાન કોહલીએ સિરાજને ક્રિઝના ખૂણેથી બોલ ફેંકવાનું કહ્યું હતું. ફિલ્ડિંગ દરમિયાન કોહલી ‘કોને સે, કોને સે…ઉસકો પસંદ સે કોને સે..’ બૂમો પાડતો જોવા મળ્યો હતો, જેના પછી સિરાજે કોહલીની વાત માની અને બીજા જ બોલ પર સ્મિથે ભૂલ કરી અને તેની વિકેટ ગુમાવી દીધી. પ્રથમ દાવમાં સદી ફટકારનાર સ્મિથ બીજી ઈનિંગમાં માત્ર 13 રન બનાવીને આઉટ થયો હતો. જેનો વીડિયોસોશિયલ મીડિયા પર પણ ખૂબ જ ઝડપથી વાયરલ થઈ રહ્યો છે.
ઓસ્ટ્રેલિયાએ 91 રનમાં 6 વિકેટ ગુમાવી
ચોથા દિવસે ટીમ ઈન્ડિયાના ફાસ્ટ બોલરોએ શાનદાર બોલિંગ રજૂ કરી હતી. બુમરાહ અને સિરાજની સામે ઓસ્ટ્રેલિયન બેટ્સમેનો વધુ સમય સુધી ક્રિઝ પર ટકી શક્યા ન હતા. ઓસ્ટ્રેલિયાએ માત્ર 91 રનમાં તેની 6 વિકેટ ગુમાવી દીધી હતી. મોહમ્મદ સિરાજે 3 અને જસપ્રિત બુમરાહે 4 વિકેટ ઝડપી હતી. મેલબોર્ન ટેસ્ટ પર ટીમ ઈન્ડિયાની પકડ ઘણી મજબૂત લાગી રહી છે.
