- ભારતે બીજી ટેસ્ટ મેચમાં ઈંગ્લેન્ડને 106 રનથી હરાવ્યું
- શુભમન ગિલે 13 ઈનિંગ્સ બાદ શાનદાર સદી ફટકારી
- BCCIએ શુભમન ગિલનો એક વીડિયો શેર કર્યો
સિરીઝની બીજી ટેસ્ટ મેચ વિશાખાપટ્ટનમમાં રમાઈ હતી. ટીમ ઈન્ડિયાએ આ મેચ 106 રને જીતી લીધી હતી. આ મેચમાં ભારતીય ટીમ શરૂઆતથી જ સારા ફોર્મમાં જોવા મળી હતી. બેટિંગથી લઈને બોલિંગ સુધી ભારતીય ખેલાડીઓએ શાનદાર પ્રદર્શન કર્યું હતું. આ મેચમાં જસપ્રિત બુમરાહ બોલિંગમાં કમાલ કરી હતી જ્યારે યશસ્વી જયસ્વાલ અને શુભમન ગિલે બેટિંગમાં શાનદાર પ્રદર્શન કર્યું હતું.
યશસ્વી જયસ્વાલની બેવડી સદીની મદદથી ભારતનો સ્કોર 400ની નજીક પહોંચ્યો હતો. આ પછી જ્યારે ઈંગ્લેન્ડ માત્ર 253 રનના સ્કોર પર ઓલઆઉટ થઈ ગયું ત્યારે એવું લાગી રહ્યું હતું કે મેચ ભારતના હાથમાં છે. પરંતુ તે પછી બીજી દાવમાં ઈંગ્લેન્ડે શાનદાર વાપસી કરી અને ભારતને માત્ર 255 રનમાં આઉટ કરી દીધું. આ ઈનિંગ દરમિયાન ગિલે સદી ફટકારી હતી.
ગિલે ટીમ ઈન્ડિયાની ઈજ્જત બચાવી
શુભમન ગિલની સદીના કારણે ટીમ યોગ્ય સ્કોર સુધી પહોંચી શકી અને જીતની આશા અકબંધ રહી. ગિલ લાંબા સમયથી ફોર્મમાં નહોતો. ગિલે છેલ્લી 13 ઇનિંગ્સમાં એક પણ ટેસ્ટ ફિફટી ફટકારી ન હતી. આવી સ્થિતિમાં, આ ઇનિંગ દરમિયાન ગિલ પાસેથી અપેક્ષાઓ નહિવત હતી, પરંતુ ગિલે શાનદાર વાપસી કરી અને સદી ફટકારી હતી. આ ઈનિંગ બાદ BCCIએ શુભમન ગિલનો એક વીડિયો જાહેર કર્યો છે. આ વીડિયોમાં ગિલે જણાવ્યું કે કેવી રીતે તે 13 ઈનિંગ્સ બાદ પોતાના ફોર્મમાં પાછો આવ્યો છે.
‘પિતાએ આપ્યો ગુરૂમંત્ર’
શુભમન ગિલે કહ્યું કે જ્યારે 3-4 મેચમાં બેટથી રન ન બન્યા હોય ત્યારે રન બનાવવો ખૂબ જ મહત્વપૂર્ણ બની જાય છે. આજે મારા માટે ખુશીનો દિવસ છે કે મેં સદી ફટકારી છે. તેણે કહ્યું કે જ્યારે મારા બેટમાંથી આવી રહ્યા ન હોતા ત્યારે આ સમયગાળો મારા માટે સરળ ન હતો. મારા પિતાએ કહ્યું કે અત્યારે જે થઈ રહ્યું છે તે ભૂલી જા અને તારી જુની સ્ટાઈલમાં રમવાનું ચાલુ કર. મેં મારી બેટિંગમાં આનો ઉપયોગ કર્યો અને સદી ફટકારી હતી. ગિલે કહ્યું કે મારા પિતા હંમેશા મેચ જોવા આવવાનો પ્રયાસ કરે છે. પિતા સામે સદી ફટકારીને સારું લાગે છે.
