- ભારત અને ઈંગ્લેન્ડ વચ્ચે પાંચ મેચની ટેસ્ટ સિરીઝ
- પ્રથમ મેચમાં રવિન્દ્ર જાડેજા થયો હતો ઈજાગ્રસ્ત
- ઈજાને ઠીક થવામાં 3 થી 4 અઠવાડિયા લાગશે
ભારતીય ટીમનો સ્ટાર ઓલરાઉન્ડર રવિન્દ્ર જાડેજા પ્રથમ ટેસ્ટ મેચમાં ઈજાગ્રસ્ત થતાં બીજી ટેસ્ટમાંથી બહાર થઈ ગયો હતો. હવે રવિન્દ્ર જાડેજાની ટીમમાં વાપસીને લઈને એક મોટું અપડેટ સામે આવ્યું છે. જે ટીમ ઈન્ડિયાનું ટેન્શન થોડું વધારી શકે છે. હૈદરાબાદ ટેસ્ટ મેચની બીજી ઇનિંગમાં રવિન્દ્ર જાડેજા રનઆઉટ થયો હતો. આ દરમિયાન તે કેટલીક મુશ્કેલીમાં જોવા મળ્યો હતો. જે બાદ બીસીસીઆઈએ માહિતી આપી હતી કે જાડેજાની ઈજા થોડી ગંભીર છે, તેથી તે બીજી ટેસ્ટ મેચમાં રમી શકશે નહીં. જે બાદ રવિન્દ્ર જાડેજાને રિહેબ માટે નેશનલ ક્રિકેટ એકેડમી (NCA) જવું પડ્યું હતું. હાલમાં જાડેજા NCAમાં વાપસી પ્રક્રિયામાંથી પસાર થઈ રહ્યો છે.
શું ત્રીજી ટેસ્ટમાં જાડેજા કરશે વાપસી?
રવિન્દ્ર જાડેજાએ હૈદરાબાદ ટેસ્ટ મેચમાં બેટ અને બોલ બંનેથી શાનદાર પ્રદર્શન કર્યું હતું. જાડેજાએ પ્રથમ દાવમાં અડધી સદી ફટકારી હતી. આ સિવાય બોલિંગ દરમિયાન જાડેજાએ 3 વિકેટ પણ પોતાના નામે કરી હતી. જે બાદ જાડેજાને બીજી ઇનિંગમાં રન લેતી વખતે સ્નાયું ખેંચાયા હતા. આ દરમિયાન જાડેજા લંગડાતો પણ જોવા મળ્યો હતો. જાડેજાની બાદબાકી બાદ કુલદીપ યાદવને વિશાખાપટ્ટનમ ટેસ્ટ મેચ માટે ટીમમાં સામેલ કરવામાં આવ્યો હતો.
તાજેતરના અહેવાલો અનુસાર, રવિન્દ્ર જાડેજાની ઈજાને ઠીક થવામાં 3 થી 4 અઠવાડિયાનો સમય લાગી શકે છે. જે બાદ રવિન્દ્ર જાડેજા ઈંગ્લેન્ડ સાથે રમાઈ રહેલી ટેસ્ટ સિરીઝ બાદ જ સંપૂર્ણ રીતે ફિટ થઈ જશે. ટેસ્ટ સિરીઝમાં હજુ 3 મેચ બાકી છે, તેથી આ સિરીઝમાંથી રવિન્દ્ર જાડેજાનું બહાર થવું ભારતીય ટીમ માટે મોટો ફટકો બની શકે છે. રવિન્દ્ર જાડેજાનું વર્તમાન ફોર્મ પણ શાનદાર હતું. હવે રવિન્દ્ર જાડેજા IPL 2024 સુધી જ સંપૂર્ણ રીતે ફિટ રહેશે. જે બાદ જાડેજા IPL 2024માં ચેન્નાઈ સુપર કિંગ્સ તરફથી રમતો જોવા મળી શકે છે.
કેએલ રાહુલની વાપસી
હૈદરાબાદ ટેસ્ટ મેચમાં રવિન્દ્ર જાડેજાની સાથે કેએલ રાહુલ પણ ઈજાગ્રસ્ત થયો હતો. જે બાદ કેએલ રાહુલને પણ બીજી ટેસ્ટ મેચમાંથી બહાર રહેવું પડ્યું હતું. જો કે, અહેવાલો અનુસાર, કેએલ રાહુલ રાજકોટમાં રમાનારી ત્રીજી ટેસ્ટ મેચમાં વાપસી કરી શકે છે. આ પહેલા બીજી ટેસ્ટ મેચમાં કેએલ રાહુલના સ્થાને રજત પાટીદારને ટીમમાં સામેલ કરવામાં આવ્યો હતો. આ સાથે રજત પાટીદારે ભારતીય ટીમ માટે ટેસ્ટ ઈન્ટરનેશનલમાં પણ ડેબ્યુ કર્યું હતું.
ભારતે સિરીઝ 1-1થી બરાબરી કરી
હૈદરાબાદ ટેસ્ટ મેચમાં ભારતીય ટીમને 28 રનથી હારનો સામનો કરવો પડ્યો હતો. જે બાદ ટીમ ઈન્ડિયાએ બીજી ટેસ્ટ મેચમાં ઈંગ્લેન્ડને 106 રને હરાવ્યું અને સિરીઝ 1-1થી બરાબર કરી લીધી. બીજી મેચમાં ભારતીય ટીમની બેટિંગ, બોલિંગ અને ફિલ્ડિંગ શાનદાર રહી હતી. જસપ્રીત બુમરાહે આ મેચમાં શાનદાર બોલિંગ કરી હતી. બુમરાહે પ્રથમ દાવમાં 6 અને બીજી ઈનિંગમાં 3 વિકેટ ઝડપી હતી. આ સાથે જસપ્રીત બુમરાહને મેન ઓફ ધ મેચ પસંદ કરવામાં આવ્યો હતો. હવે ભારત અને ઈંગ્લેન્ડ વચ્ચે સિરીઝની ત્રીજી મેચ 15મી ફેબ્રુઆરીથી રાજકોટમાં રમાશે.
