- આજે વર્લ્ડકપ 2023ની પ્રથમ સેમીફાઈનલ મેચ
- ભારત અને ન્યૂઝીલેન્ડ વચ્ચે રમાશે મેચ
- મુંબઈના વાનખેડે સ્ટેડિયમમાં રમાશે મેચ
વર્લ્ડકપની પ્રથમ સેમીફાઈનલ મેચ આજે ભારત અને ન્યૂઝીલેન્ડ વચ્ચે રમવામાં આવશે. આ મેચ મુંબઈના વાનખેડે સ્ટેડિયમમાં રમવામાં આવશે. ઉલ્લેખનીય છે કે, 2019ના વર્લ્ડકપમાં આ બંને ટીમ આમને-સામને આવી હતી. જેમાં ન્યૂઝીલેન્ડની ટીમે ભારતને માત આપી હતી. જેથી આજે ભારતીય ટીમ 2019નો હિસાબ બરાબર કરવા માટે મેદાને ઉતરશે.
વર્લ્ડકપમાં ન્યૂઝીલેન્ડની ટીમનો દબદબો
ભારત અને ન્યૂઝીલેન્ડની ટીમો વનડે વર્લ્ડકપમાં અત્યાર સુધીમાં કુલ 10 વખત આમને-સામને આવી છે. જેમાંથી ન્યૂઝીલેન્ડે 5 મેચ જીતી છે, જ્યારે ભારતીય ટીમની 4 મેચમાં જીત થઈ છે. આ ઉપરાંત 1 મેચમાં કોઈ પરિણામ આવ્યું નથી. ઉલ્લેખનીય છે કે, 2003 બાદ ભારતે ICC ઈવેન્ટ્સમાં માત્ર 1 વખત ન્યૂઝીલેન્ડને હરાવ્યું છે. ટીમ ઈન્ડિયાએ આ જીત વર્લ્ડકપ 2023માં મેળવી છે.
વનડેમાં ટીમ ઈન્ડિયાનો દબદબો
જો ભારત અને ન્યૂઝીલેન્ડ વચ્ચે વનડેમાં હેડ ટૂ હેડના આંકડા પર નજર કરવામાં આવે તો, રોહિત સેનાની બોલબાલા રહી છે. 50 ઓવરના ફોર્મેટમાં બંને ટીમ કુલ 117 વખત આમને-સામને આવી આવી છે. જેમાંથી 59 મેચમાં ભારતીય ટીમની અને 50 મેચમાં ન્યૂઝીલેન્ડની જીત થઈ છે. આ ઉપરાંત 7 મેચના પરિણામ આવ્યા નથી.
લીગ મેચમાં ન્યૂઝીલેન્ડને હરાવ્યું હતું
ભારતીય ટીમ વર્લ્ડકપ 2023માં એક વખત ન્યૂઝીલેન્ડને હરાવી ચૂકી છે. ધર્મશાળામાં રમાયેલી મેચમાં ટીમ ઈન્ડિયાએ ન્યૂઝીલેન્ડને 4 વિકેટે હરાવ્યું હતું. પ્રથમ બેટિંગ કરીને ન્યૂઝીલેન્ડની ટીમે 273 રન બનાવ્યા હતા. આ મેચમાં ભારત માટે મોહમ્મદ શમીએ 5 વિકેટ લીધી હતી. આ ઉપરાંત વિરાટ કોહલીએ 95 રનની શાનદાર ઈનિંગ રમી હતી.
વાનખેડેમાં 25 વનડે મેચ રમાઈ
આ મેદાન પર 25 વનડે મેચ રમાઈ છે. જેમાંથી પ્રથમ બેટિંગ કરનારી ટીમ 14 વખત જીતી છે. આ સાથે જ 11 વખત પીછો કરનારી ટીમની જીત થઈ છે. એટલે કે ટોસની ભૂમિકા મહત્વની સાબિત થઈ નથી.
વાનખેડે મેદાનના કેટલાક વિશેષ આંકડા
વાનખેડેમાં સૌથી વધુ રન બનાવવાનો રેકોર્ડ માસ્ટર બ્લાસ્ટર સચિન તેંડુલકરના નામે છે. તેણે અહીં 11 મેચમાં 455 રન બનાવ્યા છે. અહીં સૌથી વધુ વિકેટ વેંકટેશ પ્રસાદે લીધી છે. તેણે 6 મેચમાં 15 વિકેટ લીધી છે.
બંને દેશની સંભવિત પ્લેઈંગ ઈલેવન-
ભારત- રોહિત શર્મા(કેપ્ટન), શુભમન ગિલ, વિરાટ કોહલી, શ્રેયસ અય્યર, કેએલ રાહુલ, સૂર્યકુમાર યાદવ, રવિન્દ્ર જાડેજા, કુલદીપ યાદવ, જસપ્રીત બુમરાહ, મોહમ્મદ શમી, મોહમ્મદ સિરાઝ
ન્યૂઝીલેન્ડ- ડેવોન કોનવે, કેન વિલિયમસન(કેપ્ટન), રચિન રવિન્દ્ર, ડેરિલ મિચેલ, ટોમ લાથમ, માર્ક ચેપમેન, ગ્લેન ફિલિપ્સ, મિચેલ સેંટનર, ટ્રેન્ટ બોલ્ટ, લોકી ફર્ગ્યૂસન અને ટિમ સાઉથી
