ક્રિકેટમાં ભારત અને પાકિસ્તાન ફક્ત ICC અને એશિયા કપ જેવી ટુર્નામેન્ટમાં જ એકબીજાનો સામનો કરે છે. બંને વચ્ચેની મેચો પણ તટસ્થ સ્થળોએ રમાઈ રહી છે. આવામાં ફેન્સ ભારત-પાકિસ્તાન મેચની આતુરતાથી રાહ જુએ છે.
પરંતુ આગામી થોડા મહિનામાં ભારત અને પાકિસ્તાન વચ્ચે કોઈ મેચ રમવાની નથી, પરંતુ ટૂંક સમયમાં ભારત અને પાકિસ્તાનના ખેલાડીઓ સાથે રમતા જોવા મળશે.
એક જ ટીમમાં રમશે ભારતીય અને પાકિસ્તાની
ભારતના ઋતુરાજ ગાયકવાડ અને પાકિસ્તાનના અબ્દુલ્લા શફીક એક જ ટીમમાં રમવાના છે. શફીકે ઈંગ્લિશ કાઉન્ટી ક્લબ યોર્કશાયર સાથે કોન્ટ્રાક્ટ કર્યો છે અને ટ્રેન્ટ બ્રિજ અને યોર્ક ખાતે બે ચેમ્પિયનશિપ મેચ રમશે. બે ચેમ્પિયનશિપ મેચ સિવાય શફીક વિટૈલિટી T20 બ્લાસ્ટમાં ચાર મેચોમાં પણ ભાગ લેશે. T20 બ્લાસ્ટમાં શફીક ભારતીય બેટ્સમેન ઋતુરાજ ગાયકવાડ સાથે રમશે. ઋતુરાજ ગાયકવાડે પણ યોર્કશાયર સાથે કોન્ટ્રાક્ટ કર્યો છે.
યોર્કશાયરમાં જોડાયા પછી અબ્દુલ્લા શફીકે ક્લબ માટે રમવાની ઉત્સુકતા વ્યક્ત કરી. તેમને કહ્યું કે તે યોર્કશાયર સાથે આ તક મેળવીને ખૂબ જ ખુશ છે અને નોટિંગહામશાયર સામેની મોટી મેચ પહેલા ટીમમાં સાથે જોડાવા માટે ખૂબ જ ઉત્સાહિત છે. શફીકના સામેલ થવાથી યોર્કશાયરની બેટિંગ મજબૂત થવાની અપેક્ષા છે.
1 વર્ષ પહેલા રમી હતી પાકિસ્તાન માટે મેચ
શફીકે પોતાના ઈન્ટરનેશનલ કરિયરની શરૂઆત શાનદાર રીતે કરી હતી. તેને બાંગ્લાદેશ સામેની પહેલી ટેસ્ટ મેચમાં 52 અને 73 રન બનાવ્યા હતા. ત્યારથી તેને ઓસ્ટ્રેલિયા અને શ્રીલંકા સામે શાનદાર પ્રદર્શન કર્યું અને પાકિસ્તાન ટીમ માટે એક મહત્વપૂર્ણ ખેલાડી બન્યો. 22 ટેસ્ટ મેચોમાં તેને 38 ની એવરેજથી 1504 રન બનાવ્યા છે, જેમાં તેના નામે 5 સદીનો સમાવેશ થાય છે.
ટેસ્ટ પછી, તેને ODI અને T20I માં પણ પાકિસ્તાન ટીમનું પ્રતિનિધિત્વ કર્યું છે, જોકે મર્યાદિત ફોર્મેટમાં તેનું કરિયર એવેરજ રહ્યું છે. તેને છેલ્લા એક વર્ષથી પાકિસ્તાન માટે કોઈ મેચ રમી નથી. તે છેલ્લે ગયા વર્ષે એપ્રિલમાં પાકિસ્તાનની જર્સીમાં ન્યુઝીલેન્ડ સામે ODI મેચ રમતા જોવા મળ્યો હતો.
