ઈંગ્લેન્ડ સામે 5 મેચની ટેસ્ટ સીરીઝ 20 જૂનથી શરૂ થશે. ભારતીય ટીમ હવે આ પ્રવાસ માટે ઇંગ્લેન્ડ પહોંચી ગઈ છે. કેટલાક ખેલાડીઓ ઇન્ડિયા A માટે પણ રમી રહ્યા છે. લંડન પહોંચતાની સાથે જ ભારતીય ટીમે કોઈપણ વિલંબ કર્યા વિના પ્રેક્ટિસ શરૂ કરી દીધી હતી. BCCIએ પહેલા પ્રેક્ટિસ સેશનનો વીડિયો પણ અપલોડ કર્યો છે. તેને જોતા સ્પષ્ટ થાય છે કે અનુભવી રવિન્દ્ર જાડેજાને સીરીઝમાં મોટી જવાબદારી મળી શકે છે.
ટીમ ઈન્ડિયાએ તૈયારીઓ શરૂ કરી દીધી
ઈંગ્લેન્ડ સામેની ટેસ્ટ સીરીઝ પહેલા ટીમ ઈન્ડિયાનો 10 દિવસનો કેમ્પ શરૂ થઈ ગયો છે. જ્યાં બધા ખેલાડીઓ સંપૂર્ણ તાકાત સાથે પ્રેક્ટિસ કરતા જોવા મળી રહ્યા છે. ભારતીય ટીમના મુખ્ય કોચ ગૌતમ ગંભીર આ સમયે કોચિંગ સ્ટાફ અને અનુભવી રવિન્દ્ર જાડેજા સાથે વાત કરતા જોવા મળ્યા હતા. હાલમાં જાડેજા આ ટીમનો સૌથી અનુભવી ખેલાડી છે તેથી તે મેદાન પર કેપ્ટન શુભમન ગિલને મદદ કરતો જોઈ શકાય છે. જાડેજા હવે ટીમ મેનેજમેન્ટમાં પણ પ્રવેશ કરી શકે છે.
શું ઈંગ્લેન્ડને હરાવશે ઈન્ડિયા?
રાહુલ દ્રવિડની કેપ્ટનશીપ હેઠળ, ટીમ ઈન્ડિયાએ 2007માં ઇંગ્લેન્ડને તેના ઘરઆંગણે ટેસ્ટ સીરીઝમાં હરાવ્યું હતું. ત્યારથી ઈંગ્લેન્ડમાં ટેસ્ટ સીરીઝ જીતવી એ બધા કેપ્ટનો માટે એક સપનું રહ્યું છે. યુવા કેપ્ટન શુભમન ગિલ ઈંગ્લેન્ડને તેના ઘરઆંગણે હરાવીને ઇતિહાસનું પુનરાવર્તન કરવા માંગશે. જો આપણે ટીમ ઈન્ડિયા પર નજર કરીએ તો, યુવા અને અનુભવનું સારું મિશ્રણ છે. રવિન્દ્ર જાડેજા, જસપ્રીત બુમરાહ અને કેએલ રાહુલ પર વધારાની જવાબદારી રહેશે. ભારતીય ટીમના કેપ્ટન શુભમન ગિલ બેટથી મોટી ઈનિંગ્સ રમીને પોતાને સાબિત કરવા માંગશે.
