જુનાગઢમાં મૌલાના અઝહરીના ભડકાઉ ભાષણ મામલે પાકિસ્તાન સાથેના કનેક્શનને લઈને તપાસ શરૂ

જુનાગઢમાં મૌલાના અઝહરીના ભડકાઉ ભાષણના કેસમાં મૌલાના સલમાન અઝહરીને આજે કોર્ટમાં રજૂ કરાશે. જુનાગઢ પોલીસ મૌલાના અઝહરીના રિમાંડની માગ કરશે. મૌલાના સલમાન અઝહરીની મુંબઇથી ધરપકડ કરાઇ હતી. તેમજ આયોજકો સાથે સંપર્કમાં કેવી રીતે આવ્યો તેની તપાસ કરાશે.

ગઈકાલે જુનાગઢ લાવવામાં આવ્યા બાદ શહેરમાં અજંપા ભરી શાંતિ જોવા મળી છે. તેમજ શહેરના સંવેદનશીલ વિસ્તારોમાં ચુસ્ત પોલીસ બંદોબસ્ત ગોઠવી દેવામાં આવ્યો છે. પોલીસ પરેડ ગ્રાઉન્ડ પણ છાવણીમાં ફેરવાઈ ગયું છે. મીડિયા સહિત તમામ વ્યક્તિઓનો પણ પોલીસ પરેડ મેદાનમાં પ્રવેશ બંધ છે. ઉચ્ચ અધિકારીઓના માર્ગદર્શન હેઠળ ભારે બંદોબસ્ત હેઠળ મોલાનાની પૂછપરછ બાદ કોર્ટમાં રજૂ કરવામાં આવશે. મુંબઈથી લવાયેલા આરોપી મુફતી સલમાન અઝહરીની રાતભર પૂછપરછ કરવામાં આવી છે. પોલીસે મુફ્તિ મોલવીનાં જુનાગઢ આવવાના ઈરાદાઓ અંગે પણ આકરી પૂછપરછ કરી છે. જુનાગઢ પોલીસની આકરી પૂછપરછ છતા મોલાના યોગ્ય જવાબ આપતો ન હોવાનું સામે આવ્યું છે.

જુનાગઢ ખાતે સભામાં આયોજનના હેતુ અંગે તપાસ કરાશે. તેમજ ભડકાઉ ભાષણ આપવાના ઉદ્દેશ્ય અંગે પૂછપરછ કરાશે. ભાષણ આકસ્મિક હતું કે આયોજનપૂર્વક તેની તપાસ કરાશે. જુનાગઢમાં વ્યસનમુક્તિ કાર્યક્રમમાં મૌલાનાએ વિવાદિત નિવેદન આપ્યા બાદ રવિવારે રાત્રે મુંબઇથી તેની ધરપકડ કરવામાં આવી હતી. જે બાદ ગુજરાત એ.ટી.એસ મુંબઇથી મૌલાનાને અમદાવાદ લાવામાં આવ્યો હતો. ગુજરાતમાં મોડાસા, કચ્છ બાદ જુનાગઢમાં મૌલાના આવ્યો હતો. 14મી ફેબ્રુઆરીએ મૌલાના મોરબીના કાર્યક્રમમાં હાજરી આપવાના હતા. મૌલાનાએ જુનાગઢમાં વ્યસન મુક્તિ કાર્યક્રમમાં તેમણે ભડકાઉ ભાષણ કર્યું હતું.

મૌલાનાની કેટલીક ગતિવિધિ શંકાસ્પદ હોવાથી મોબાઈલની પણ તપાસ હાથ ધરાઈ છે. જેના પાકિસ્તાન સાથેના કનેક્શનને લઈને તપાસ શરૂ કરાઈ છે. અત્રે જણાવીએ કે, મૌલાના મૂળ કર્ણાટકનો હોવાનું સામે આવ્યું છે. મૌલાના હાલ મુંબઈમાં પરિવાર સાથે રહેતો હતો. મૌલાનાના ટ્રસ્ટ અને પરિવારના બેંક એકાઉન્ટની તપાસ શરૂ કરાઈ છે કે, મૌલાનાના ટ્રસ્ટના રૂપિયાનો ઉપયોગ શું થતો હતો જેને લઈને તપાસ શરૂ કરાઈ છે. મૌલાના કોના કોના સંપર્કમાં છે જેને લઈને ગુજરાત ATSની તપાસ તેજ કરી છે.