IPLની ફાઈનલ મેચ બેંગ્લુરુ અને પંજાબ કિંગ્સ વચ્ચે રમાશે. મંગળવારે રમનારી આ મેચ માટે બંને ટીમોએ જોરદાર તૈયારીઓ શરૂ કરી દીધી છે. વિજેતા ટીમને ટાઈટલ મળશે અને હારનારી ટીમનું સ્વપ્ન ચકનાચૂર થઈ જશે. RCB અને પંજાબ કિંગ્સ બંને અત્યાર સુધી ક્યારેય ટાઈટલ જીતી શકી નથી.
અમદાવાદના નરેન્દ્ર મોદી સ્ટેડિયમમાં પંજાબ કિંગ્સ અને મુંબઈ ઈન્ડિયન્સ વચ્ચે બીજી ક્વોલિફાયર મેચ રમાઈ હતી, આ મેચમાં વરસાદને કારણે શરુ થવામાં વિલંબ થયો હતો. મેચમાં કોઈ પણ ઓવર ઓછી થયા વગર સમાપ્ત થઈ. ફાઈનલ મેચમાં વરસાદની આગાહી વિશે જાણવું મહત્વપૂર્ણ છે.
નરેન્દ્ર મોદી સ્ટેડિયમ ફાઈનલ પિચ રિપોર્ટ
નરેન્દ્ર મોદી સ્ટેડિયમની પિચ બેટિંગ માટે સારી છે, આ સિઝનમાં ઘણી મેચોમાં આ જોવા મળ્યું છે. આવામાં ફાઈનલ મેચમાં પણ રનનો વરસાદ થઈ શકે છે. સ્પિનરોને લાઈનથી બચવાની તક મળી શકે છે. ટોસ જીત્યા પછી પહેલા બોલિંગ કરવાનો નિર્ણય સાચો સાબિત થઈ શકે છે. આ મેદાનમાં ઓછામાં ઓછો 200નો સ્કોર બનાવવો પડશે.
જાણો કેવું રહેશે હવામાન
આ મેચમાં પણ વરસાદના કારણે વિલંબ થઈ શકે છે. પરંતુ ચિંતા કરવાની કોઈ જરૂર નથી, ટોસ દરમિયાન અથવા પછી થોડો વરસાદ પડી શકે છે. એકસ્ટ્રા ટાઈમને કારણે આવતીકાલે જ મેચ પૂરી કરવાનો પ્રયાસ કરવામાં આવશે. રિઝર્વ ડે સુધી કદાચ તેને લઈ જવાનો કોઈ પ્રયાસ કરવામાં આવશે નહીં.
બેંગ્લુરુ અને પંજાબ વચ્ચેની મેચ સ્ટાર સ્પોર્ટ્સ પર લાઈવ જોઈ શકાશે. ભારતીય સમય મુજબ આ મેચ સાંજે 7:30 વાગ્યે શરૂ થશે. ઓટીટી પર આ મેચનું લાઈવ ટેલિકાસ્ટ જિયોહોટસ્ટાર પર જોવા મળશે.
બંને ટીમો પાસે ઈતિહાસ રચવાની તક
બેંગ્લુરુ અને પંજાબ કિંગ્સ હજુ સુધી ટાઈટલ જીતી શક્યા નથી. બંને ટીમો પાસે નવો ઈતિહાસ રચવાની તક છે. બંને ટીમોમાંથી કોઈ એક ટીમ જીતશે અને 17 વર્ષનો દુષ્કાળ સમાપ્ત થશે. બંને ટીમ વચ્ચે ફાઈનલમાં જોરદાર ટક્કરની અપેક્ષા રાખી શકાય છે.
બેંગ્લુરુ સંભવિત પ્લેઈંગ ઈલેવન
વિરાટ કોહલી, ફિલ સોલ્ટ, રજત પાટીદાર (કેપ્ટન), લિયામ લિવિંગસ્ટોન, જીતેશ શર્મા, રોમારીયો શેફર્ડ, કૃણાલ પંડ્યા, ભુવનેશ્વર કુમાર, યશ દયાલ, જોશ હેઝલવુડ, સુયશ શર્મા.
પંજાબ કિંગ્સ સંભવિત પ્લેઈંગ ઈલેવન
પ્રિયાંશ આર્ય, જોશ ઈંગ્લિસ, શ્રેયસ ઐયર (કેપ્ટન), નેહલ વાઢેરા, માર્કસ સ્ટોઈનિસ, શશાંક સિંહ, અઝમતુલ્લા ઉમરઝાઈ, કાયલ જેમિસન, વિજયકુમાર વિશાક, અર્શદીપ સિંહ, યુઝવેન્દ્ર ચહલ.
