ગુજરાત ટાઈટન્સે IPL 2025માં રમાયેલી 23મી મેચમાં રાજસ્થાન રોયલ્સને 58 રને હરાવીને ચોથી જીત નોંધાવી. આ જીત સાથે શુભમન ગિલના ગુજરાત ટાઈટન્સનું વર્ચસ્વ પોઈન્ટ ટેબલમાં પણ જોવા મળ્યું છે, હવે ગુજરાત પ્રથમ સ્થાને પહોંચી ગયું છે.
આ મેચમાં હાર બાદ રાજસ્થાન રોયલ્સના કેપ્ટન સંજુ સેમસનને એક ભૂલની ભારે કિંમત ચૂકવવી પડી, જેના માટે સંજુ પર દંડ પણ ફટકારવામાં આવ્યો છે.
સંજુ સેમસનને ફટકારવામાં આવ્યો દંડ
ગુજરાત ટાઈટન્સ સામેની મેચમાં સ્લો ઓવર રેટ બદલ રાજસ્થાન રોયલ્સના કેપ્ટન સંજુ સેમસનને દંડ ફટકારવામાં આવ્યો છે. આ સિઝનમાં રાજસ્થાન રોયલ્સ પર આ બીજી વખત દંડ ફટકારવામાં આવ્યો છે. આ પહેલા રિયાન પરાગની કેપ્ટનશીપ હેઠળ રાજસ્થાન ટીમને પણ સ્લો ઓવર રેટ માટે દંડ ફટકારવામાં આવ્યો હતો. કેપ્ટન સંજુ પર સ્લો ઓવર રેટના કારણે 24 લાખ રૂપિયાનો દંડ ફટકારવામાં આવ્યો છે. આ સિવાય ઈમ્પેક્ટ સબસ્ટિટ્યુટ સહિત બાકીના ખેલાડીઓને 6 લાખ રૂપિયા અથવા તેમની મેચ ફીના 25 ટકા દંડ ચૂકવવો પડશે.
રાજસ્થાનને ત્રીજી હારનો સામનો કરવો પડ્યો
IPL 2025ની 23મી મેચમાં, ગુજરાત ટાઈટન્સે રાજસ્થાન રોયલ્સને 58 રને હરાવ્યું. આ સિઝનમાં રાજસ્થાનની આ ત્રીજી હાર છે અને ગુજરાતની ચોથી જીત છે. રાજસ્થાને સીઝન-18માં અત્યાર સુધીમાં 5 મેચ રમી છે. જેમાંથી સંજુ સેમસનની ટીમે 2 જીત અને 3 હારનો સામનો કરવો પડ્યો છે. હાલમાં, રાજસ્થાન રોયલ્સ ટીમ 4 પોઈન્ટ સાથે પોઈન્ટ ટેબલમાં સાતમા સ્થાને છે.
રાજસ્થાનની ટીમ 159 રનમાં થઈ ઓલઆઉટ
મેચમાં પ્રથમ બેટિંગ કરતા ગુજરાત ટાઈટન્સે 20 ઓવરમાં 216 રન બનાવ્યા. ગુજરાત તરફથી સાઈ સુદર્શને સૌથી વધુ 82 રન બનાવ્યા. આ પછી, 217 રનના લક્ષ્યાંકનો પીછો કરતી વખતે, રાજસ્થાનની ટીમ 19.2 ઓવરમાં 159 રનમાં ઓલઆઉટ થઈ ગઈ. ગુજરાત તરફથી બોલિંગ કરતી વખતે, પ્રસિદ્ધ કૃષ્ણાએ સૌથી વધુ 3 વિકેટ લીધી.
