IPL 2025 ની શરૂઆત મુંબઈ ઈન્ડિયન્સ માટે ખાસ રહી નહી.. શરૂઆતમાં જ તે સતત બે મેચ હારી ગયુ છે. ગુજરાત ટાઇટન્સ સામે રમાયેલી મેચમાં મુંબઈની ટીમ ખૂબ જ નબળી સાબિત થઈ, જેના કારણે તેને 36 રનથી હારનો સામનો કરવો પડ્યો. આ મેચમાં મુંબઈ ઇન્ડિયન્સ એક મોટા ફેરફાર સાથે મેદાનમાં ઉતર્યું. કેપ્ટન હાર્દિક પંડ્યાએ આ મેચથી પોતાની સિઝનની શરૂઆત કરી હતી. ટીમની પહેલી મેચમાં તે પ્લેઇંગ 11 નો ભાગ નહોતો. પરંતુ પંડ્યાએ IPLમાં વાપસી કરીને મોટી ભૂલ કરી.
હાર્દિકે ભૂલ કરી રિપીટ !
IPL 2025 માં, મુંબઈ ઈન્ડિયન્સે પોતાની પહેલી મેચ ચેન્નાઈ સુપર કિંગ્સ સામે રમી હતી. હાર્દિક પંડ્યા એક મેચના પ્રતિબંધને કારણે તે મેચમાં રમી શક્યો ન હતો. ગયા સિઝનમાં મુંબઈની છેલ્લી મેચમાં, હાર્દિક પંડ્યા પર ધીમા ઓવર રેટને કારણે એક મેચ માટે પ્રતિબંધ મૂકવામાં આવ્યો હતો. પરંતુ ત્યાં સુધીમાં તે લીગમાંથી બહાર થઈ ગઈ હતી. આવી સ્થિતિમાં તેણે વર્તમાન સિઝનની પહેલી મેચમાં બહાર બેસવું પડ્યું. હાર્દિક પંડ્યાએ પોતાની ભૂલમાંથી શીખ ન લીધી અને આવતાની સાથે જ સ્લો ઓવર રેટમાં ફસાઈ ગયો.
ગુજરાત ટાઇટન્સ સામે રમાયેલી મેચમાં મુંબઈ ઇન્ડિયન્સની ટીમ સમયસર 20 ઓવર ફેંકવામાં નિષ્ફળ રહી. જેના કારણે તેને ગુજરાતની ઇનિંગ્સની છેલ્લી ઓવરમાં દંડ ફટકારવામાં આવ્યો. આ ઓવરમાં તેણે 30 યાર્ડના સર્કલ પર એક વધારાનો ફિલ્ડર રાખવો પડ્યો. જોકે આ વખતે IPLમાં સ્લો ઓવર રેટના કારણે કોઈપણ કેપ્ટન પર પ્રતિબંધ મૂકવામાં આવશે નહીં. આ વખતે ICC ની જેમ, IPL માં પણ ડિમેરિટ પોઈન્ટ સિસ્ટમ લાગુ કરવામાં આવી છે. આ ડિમેરિટ પોઈન્ટ્સ ત્રણ વર્ષ સુધી રહેશે.
2022 પછી સૌથી વધુ નુકસાન
મુંબઈ ઈન્ડિયન્સ આઈપીએલની સૌથી સફળ ટીમોમાંની એક છે. આ ટીમએ આ લીગનો ખિતાબ 5 વખત જીત્યો છે. પરંતુ વર્ષ 2022 થી આ ટીમનું પર્ફોમન્સ ડાઉન થયુ છે. IPL 2022 થી મુંબઈ ઈન્ડિયન્સ કુલ 29 મેચ હારી ગયું છે જે અન્ય ટીમોની તુલનામાં સૌથી વધુ છે. મુંબઈ ઈન્ડિયન્સ સિવાય કોઈ પણ ટીમ 26 થી વધુ મેચ હાર્યું નથી. જોકે, મુંબઈની ટીમ તેના પુનરાગમન માટે જાણીતી છે. આવી સ્થિતિમાં પંડ્યા એન્ડ ટીમની નજર મજબૂત વાપસી પર નજર રાખશે.
