ચેન્નાઈ સુપર કિંગ્સે ડિફેન્ડિંગ ચેમ્પિયનના ઘરઆંગણે 2 વિકેટથી વિજય મેળવ્યો. ઈડન ગાર્ડન્સ ખાતે અંતિમ ઓવરમાં અંશુલ કંબોજની બાઉન્ડ્રી સાથે CSK એ સિઝનની પોતાની ત્રીજી જીતનો સ્વાદ ચાખ્યો.
ચેન્નાઈએ KKR દ્વારા આપવામાં આવેલ 180 રનનો લક્ષ્યાંક 2 બોલ બાકી રહેતા હાંસલ કરી લીધો. ટીમ માટે ડેવાલ્ડ બ્રેવિસે 25 બોલમાં 52 રનની તોફાની ઈનિંગ રમી. જ્યારે, શિવમ દુબેએ 45 રનનું યોગદાન આપ્યું. બોલિંગમાં નૂર અહેમદનો સ્પિન જાદુ આસમાને હતો અને તેને 4 વિકેટ લીધી. આ હાર સાથે, KKR માટે પ્લેઓફમાં પહોંચવાનો રસ્તો વધુ મુશ્કેલ બની ગયો છે.
ચેન્નઈની ખરાબ શરૂઆત
180 રનના લક્ષ્યાંકનો પીછો કરતી વખતે ચેન્નાઈ સુપર કિંગ્સની શરૂઆત સારી રહી ન હતી. આયુષ મ્હાત્રેને વૈભવ અરોરાએ ખાતું ખોલાવ્યા વિના પેવેલિયન મોકલી દીધો. ડેવોન કોનવેને મોઈન અલીએ ક્લીન બોલ્ડ કર્યો. આ પછી, IPL માં ડેબ્યૂ કરી રહેલ ઉર્વિલ પટેલ ક્રીઝ પર આવ્યો. આવતાની સાથે જ ઉર્વિલે વિસ્ફોટક સ્ટાઈલમાં બેટિંગ કરી અને માત્ર 11 બોલમાં 31 રન બનાવ્યા. ઉર્વિલ હર્ષિત રાણાનો શિકાર બન્યો. જાડેજા 10 બોલમાં 19 રન બનાવીને આઉટ થયો.
બ્રેવિસે મચાવી દીધી ધૂમ
60 રનના સ્કોર પર 5 વિકેટ ગુમાવ્યા બાદ મુશ્કેલીમાં મુકાયેલી ચેન્નાઈની ઈનિંગને ડેવાલ્ડ બ્રેવિસે પોતાની તોફાની સ્ટાઈલથી સંભાળી હતી. બ્રેવિસે વૈભવ અરોરાની એક ઓવરમાં 30 રન બનાવ્યા, જેમાં ચોગ્ગા અને છગ્ગાનો વરસાદ થયો. તેને માત્ર 22 બોલમાં પોતાની અડધી સદી પૂરી કરી. બ્રેવિસ 25 બોલમાં 52 રન બનાવીને આઉટ થયો. બ્રેવિસ અને શિવમ દુબેએ છઠ્ઠી વિકેટ માટે 67 રન જોડ્યા. બ્રેવિસ પેવેલિયન પરત ફર્યા બાદ, શિવમ દુબે એક છેડે ઉભા રહ્યા અને 40 બોલમાં 45 રન બનાવ્યા. અંતિમ ઓવરમાં, એમએસ ધોનીએ સિક્સર અને અંશુલ કંબોજે ચોર ફટકારીને ચેન્નાઈની જીત પર મહોર લગાવી.
રહાણે-રસેલે રમી શાનદાર ઈનિંગ
ઈડન ગાર્ડન્સ મેદાન પર ટોસ જીતીને પહેલા બેટિંગ કરવાનો નિર્ણય લીધા બાદ KKR ની શરૂઆત સારી રહી ન હતી. ગુરબાઝ માત્ર 11 રન બનાવીને આઉટ થયો. આ પછી સુનીલ નારાયણ અને કેપ્ટન અજિંક્ય રહાણેએ અડધી સદીની પાર્ટનરશિપ કરી. નારાયણે 17 બોલમાં 26 રન બનાવ્યા. રહાણેએ વિસ્ફોટક સ્ટાઈલમાં બેટિંગ કરી અને 33 બોલમાં 48 રન બનાવ્યા. રહાણેએ પોતાની ઈનિંગ દરમિયાન 4 ચોગ્ગા અને 2 છગ્ગા ફટકાર્યા હતા. રઘુવંશી બેટથી કંઈ ખાસ કરી શક્યો નહીં અને માત્ર એક રન બનાવીને આઉટ થયા.
છેલ્લી ઓવરોમાં મનીષ પાંડે અને આન્દ્રે રસેલે જવાબદારી સંભાળી. રસેલે 21 બોલમાં 38 રન બનાવ્યા. રસેલે પોતાની ઈનિંગ દરમિયાન 4 ચોગ્ગા અને 3 છગ્ગા ફટકાર્યા. મનીષે 28 બોલમાં 36 રન બનાવ્યા, જેના કારણે કોલકાતાની ટીમ 20 ઓવરમાં 6 વિકેટ ગુમાવ્યા બાદ સ્કોર બોર્ડ પર 179 રન બનાવવામાં સફળ રહી.
