IPL 2025માં મુંબઈ ઈન્ડિયન્સની શરૂઆત ખૂબ જ ખરાબ રહી છે. ટીમે અત્યાર સુધીમાં 3 મેચ રમી છે અને 2 માં હારનો સામનો કરવો પડ્યો છે. ટીમનો સ્ટાર ફાસ્ટ બોલર જસપ્રીત બુમરાહ ઈજાને કારણે ત્રણેય મેચ ગુમાવી ચૂક્યો છે.
ફેન્સ ચોથી મેચમાં બુમરાહની વાપસીની રાહ જોઈ રહ્યા હતા પરંતુ હવે ફેન્સને મોટો ઝટકો લાગી શકે છે. સિઝન શરૂ થાય તે પહેલાં, એવા સમાચાર સામે આવ્યા હતા કે બુમરાહ ફક્ત 2 કે 3 મેચ જ ગુમાવી શકે છે.
જસપ્રીત બુમરાહના પરત ફરવામાં થશે વિલંબ
મીડિયા રિપોર્ટ મુજબ જસપ્રીત બુમરાહની વાપસીમાં વિલંબ થયો છે અને હજુ સુધી કોઈ ચોક્કસ સમયરેખા નક્કી કરવામાં આવી નથી, પરંતુ તે એપ્રિલના મધ્ય સુધીમાં પાછો ફરે તેવી અપેક્ષા છે. તબીબી ટીમ ખાતરી કરવા માંગે છે કે તેમને સ્ટ્રેસ ફ્રેક્ચર ન થાય. બુમરાહ પોતે પણ સાવધ રહી રહ્યો છે. તે COE ખાતે બોલિંગ કરી રહ્યો છે પરંતુ તેને સંપૂર્ણ રીતે ફિટ થવામાં વધુ સમય લાગી શકે છે.
જસપ્રીત બુમરાહ ઓસ્ટ્રેલિયા પ્રવાસ દરમિયાન થયો હતો ઈજાગ્રસ્ત
ઓસ્ટ્રેલિયા પ્રવાસ પર બોર્ડર ગાવસ્કર ટ્રોફી દરમિયાન સિડની ટેસ્ટમાં જસપ્રીત બુમરાહ ઘાયલ થયો હતો. બુમરાહને પીઠમાં દુખાવો હતો જેના કારણે તેને સ્કેન માટે મેચની વચ્ચે જ મેદાન છોડવું પડ્યું હતું. બુમરાહ સિડની ટેસ્ટમાં બોલિંગ પણ કરી શક્યો ન હતો, ત્યારથી આ ઝડપી બોલર ટીમ ઈન્ડિયાની બહાર છે. ઈજાને કારણે બુમરાહને ચેમ્પિયન્સ ટ્રોફી 2025 પણ ગુમાવવી પડી.
ચેમ્પિયન્સ ટ્રોફી માટે ફિટ થવાની હતી અપેક્ષા
ચેમ્પિયન્સ ટ્રોફી 2025 પહેલા ભારતે ઈંગ્લેન્ડ સાથે ODI અને T20 સિરીઝ રમી હતી. જસપ્રીત બુમરાહને પણ ODI સિરીઝ માટે 15 સભ્યોની ટીમમાં સામેલ કરવામાં આવ્યો હતો, કારણ કે સિલેક્ટર્સને આશા હતી કે બુમરાહ ત્યાં સુધીમાં ફિટ થઈ જશે, પરંતુ સંપૂર્ણ ફિટ ન હોવાને કારણે તે આ સિરીઝમાં રમી શક્યો નહીં, ત્યારબાદ બુમરાહના સ્થાને હર્ષિત રાણાને ODI ટીમમાં સામેલ કરવામાં આવ્યો અને બાદમાં બુમરાહ ચેમ્પિયન્સ ટ્રોફીમાંથી પણ બહાર થઈ ગયો.
