RCB ટીમે પંજાબ કિંગ્સને 8 વિકેટથી હરાવીને IPL 2025 ની ફાઈનલમાં એન્ટ્રી કરી છે. આ મેચમાં, RCB માટે બોલરો અને બેટ્સમેનોએ શાનદાર પ્રદર્શન કર્યું.
પંજાબ કિંગ્સના બેટ્સમેન RCB બોલરો સામે ટકી શક્યા નહીં અને આખી ટીમ 101 રનમાં ઓલઆઉટ થઈ ગઈ. આ પછી, RCB એ માત્ર 10 ઓવરમાં લક્ષ્ય પ્રાપ્ત કરી લીધું. સુપર સ્ટાર બેટ્સમેન વિરાટ કોહલીએ મેચમાં 12 બોલમાં 12 રન બનાવ્યા, જેમાં બે ચોગ્ગાનો સમાવેશ થાય છે.
T20 ક્રિકેટમાં મચાવી ધૂમ
12 રનની ઈનિંગ રમીને વિરાટ કોહલીએ T20 ક્રિકેટમાં પોતાના 13500 રન પૂરા કર્યા. તે T20 ક્રિકેટમાં 13500 રન પૂરા કરનાર પ્રથમ ભારતીય બેટ્સમેન બન્યો. તેના પહેલા કોઈ પણ ભારતીય ખેલાડી આ કરી શક્યો ન હતો. તે T20 ક્રિકેટમાં ભારત માટે સૌથી વધુ રન બનાવનાર ખેલાડી પણ છે. T20 ક્રિકેટમાં કોહલી કરતાં વધુ રન ફક્ત ક્રિસ ગેઈલ, એલેક્સ હેલ્સ, શોએબ મલિક અને કાયરન પોલાર્ડ જ બનાવી શક્યા છે.
T20 ક્રિકેટમાં ફટકારી છે 100થી વધુ અડધી સદી
વિરાટ કોહલીએ 413 T20 ક્રિકેટ મેચોમાં કુલ 13500 રન બનાવ્યા છે. આ સમયગાળા દરમિયાન, તેમના બેટે 9 સદી અને 105 અડધી સદી ફટકારી છે. લક્ષ્યનો પીછો કરતી વખતે કોહલીનો એક અલગ જ અંદાજ જોવા મળે છે. જ્યાં સુધી તે ક્રીઝ પર છે, ત્યાં સુધી ફેન્સ જીતની આશા રાખે છે. ચેઝમાં તેના ઉત્તમ પ્રદર્શનને કારણે તેમને ચેઝ માસ્ટરનું બિરુદ મળ્યું છે.
શાનદાર ફોર્મમાં છે વિરાટ કોહલી
વિરાટ કોહલી આજ સુધી IPLનો ખિતાબ જીતી શક્યો નથી. હવે RCB ચોથી વખત IPL ફાઈનલમાં પ્રવેશ્યું છે. આ પરિસ્થિતિમાં, દરેકને આશા છે કે તે ખિતાબ જીતશે. કોહલીએ વર્તમાન સિઝનમાં શાનદાર પ્રદર્શન કર્યું છે અને પોતાની બેટિંગ કુશળતા દર્શાવી છે. વર્તમાન સિઝનમાં, તેને અત્યાર સુધીમાં 614 રન બનાવ્યા છે, જેમાં 8 અડધી સદી તેના બેટમાંથી આવી છે.
