IPL 2025ની ફાઈનલ મેચમાં ગઈ કાલે રાત્રે અમદાવાદના નરેન્દ્ર મોદી સ્ટેડિયમમાં રોયલ ચેલેન્જર્સ બેંગ્લુરુ અને પંજાબ કિંગ્સ વચ્ચે રમાઈ હતી. આ મેચને RCB એ 6 રનથી જીતીને પહેલી વાર ટાઈટલ જીત્યું.
આ સાથે પંજાબ કિંગ્સનું પહેલું ટાઈટલ જીતવાનું સ્વપ્ન તૂટી ગયું. RCBની જીતમાં સ્ટાર ઓલરાઉન્ડર કૃણાલ પંડ્યાએ મહત્વપૂર્ણ ભૂમિકા ભજવી. આ મેચમાં કૃણાલ પંડ્યાએ એક ખાસ સિદ્ધિ હાંસલ કરી.
ફાઈનલમાં કૃણાલ પંડ્યાએ બનાવ્યો રેકોર્ડ
ફાઈનલ મેચમાં કૃણાલ પંડ્યાએ પંજાબ કિંગ્સ સામે શાનદાર બોલિંગ પ્રદર્શન કર્યું. તેને આ મેચમાં બોલિંગ કરતી વખતે 4 ઓવરમાં માત્ર 17 રન આપીને 2 વિકેટ લીધી. કૃણાલ પંડ્યાએ પ્રભસિમરન અને જોશ ઈંગ્લિશની વિકેટ લીધી. આ બંને વિકેટ RCB માટે ખૂબ જ મહત્વપૂર્ણ હતી. તેના શાનદાર પ્રદર્શનને કારણે કૃણાલ પંડ્યાને પ્લેયર ઓફ ધ મેચ તરીકે પસંદ કરવામાં આવ્યો.
આ આઈપીએલ ઈતિહાસમાં કૃણાલ પંડ્યાએ ફાઈનલમાં બીજી વખત પ્લેયર ઓફ ધ મેચ એવોર્ડ જીત્યો હતો. આ પહેલા મુંબઈ ઈન્ડિયન્સ તરફથી આઈપીએલ 2017 ફાઈનલમાં કૃણાલ પંડ્યા પ્લેયર ઓફ ધ મેચ બન્યો હતો. હવે કૃણાલ પંડ્યા આઈપીએલ ઈતિહાસમાં ફાઈનલમાં 2 વાર પ્લેયર ઓફ ધ મેચ જીતનાર પહેલો ખેલાડી બની ગયો છે.
બેંગ્લુરુએ 6 રનથી જીતી મેચ
આ મેચમાં ટોસ જીતીને પંજાબ કિંગ્સના કેપ્ટન શ્રેયસ ઐયરે પહેલા બોલિંગ કરવાનો નિર્ણય લીધો હતો. આ પછી પહેલા બેટિંગ કરતાં બેંગ્લુરુએ 20 ઓવરમાં 9 વિકેટના નુકસાન સાથે 190 રન બનાવ્યા. બેંગ્લુરુ તરફથી વિરાટ કોહલીએ સૌથી વધુ 43 રન બનાવ્યા હતા. આ સિવાય કેપ્ટન રજત પાટીદારે 26 રન, લિવામ લિવિંગસ્ટોને 25 રન, મયંક અગ્રવાલે 24 રન અને જીતેશ શર્માએ 24 રન બનાવ્યા હતા. આ સિવાય પંજાબ કિંગ્સ તરફથી બોલિંગ કરતાં અર્શદીપ સિંહ અને કાયલ જેમિસને 3-3 વિકેટ લીધી.
આ ટાર્ગેટ ચેઝ કરતાં પંજાબ કિંગ્સની ટીમ 20 ઓવરમાં 7 વિકેટના નુકસાન સાથે 184 જ રન બનાવી શકી. પંજાબ તરફથી બેટિંગ કરતાં શશાંક સિંહે સૌથી વધુ 61 રન બનાવ્યા. આ સિવાય જોશ ઈંગ્લિસે 39 રન બનાવ્યા.
