IPL 2025 ની 42મી લીગ મેચ બેંગલુરુના એમ. ચિન્નાસ્વામી સ્ટેડિયમ ખાતે રોયલ ચેલેન્જર્સ બેંગ્લુરુ અને રાજસ્થાન રોયલ્સ વચ્ચે રમાઈ હતી. આ મેચમાં RCB ટીમે પ્રથમ બેટિંગ કરીને 205 રન બનાવ્યા હતા.
જવાબમાં રાજસ્થાનની ટીમ 9 વિકેટ ગુમાવીને માત્ર 194 રન જ બનાવી શકી. આ સાથે, RCBએ મેચ 11 રનથી જીતી લીધી. આ મેચ જીત્યા બાદ, RCB પોઈન્ટ ટેબલમાં ત્રીજા સ્થાને પહોંચી ગયું છે.
રાજસ્થાનના બેટ્સમેન ફેલ
206 રનના લક્ષ્યાંકનો પીછો કરવા ઉતરેલી રાજસ્થાનની શરૂઆત સારી રહી. વૈભવ અને યશસ્વીએ માત્ર 4.2 ઓવરમાં 52 રન જોડ્યા હતા. આ ખતરનાક પાર્ટનરશિપ ભુવનેશ્વર કુમારે તોડી નાખી. તેને વૈભવને 16 રને આઉટ કર્યો. આ પછી, યશસ્વી પણ 19 બોલમાં 49 રન બનાવીને આઉટ થયો. તેને હેઝલવુડનો શિકાર બનાવવામાં આવ્યો. બે વિકેટ પડ્યા પછી, પરાગ અને રાણાએ ઈનિંગ્સની કમાન સંભાળી. આ સમય દરમિયાન પરાગે ઝડપથી રન બનાવ્યા.
રિયાન પરાગે 10 બોલમાં 22 રન બનાવ્યા. તેને કૃણાલ પંડ્યાએ આઉટ કર્યો. તેના આઉટ થયા પછી, ધ્રુવ જુરેલે તેની ઈનિંગ્સની જવાબદારી સંભાળી. પરંતુ હેટમાયર કંઈ ખાસ કરી શક્યો નહીં અને 8 બોલમાં 11 રન બનાવીને આઉટ થયો. 5 વિકેટ ગુમાવ્યા બાદ, શુભમ દુબે અને જુરેલે રાજસ્થાનને વિજયની નજીક પહોંચાડ્યું. પરંતુ ધ્રુવ 47 રન બનાવીને આઉટ થયો. તેમના આઉટ થયા પછી, શુભ દુબે કંઈ ખાસ કરી શક્યો નહીં અને RCB એ 11 રનથી મેચ જીતી લીધી.
વિરાટ કોહલી અને દેવદત્ત પડિકલે ફટકારી અડધી સદી
ગુરુવારે રાજસ્થાન રોયલ્સ સામેની IPL મેચમાં રોયલ ચેલેન્જર્સ બેંગ્લુરુએ શાનદાર બેટિંગ કરી અને 5 વિકેટે 205 રન બનાવ્યા. ટીમ માટે વિરાટ કોહલીએ 70 રન અને દેવદત્ત પડિકલે 50 રન બનાવ્યા. બંનેએ સાથે મળીને બીજી વિકેટ માટે 95 રનની મહત્વપૂર્ણ પાર્ટનરશિપ કરી.
કોહલીએ 42 બોલમાં 8 ચોગ્ગા અને 2 છગ્ગા ફટકાર્યા, જ્યારે પડિકલે 27 બોલમાં 4 ચોગ્ગા અને 3 છગ્ગા ફટકાર્યા. આ સિવાય ફિલ સોલ્ટે 26 રન, ટિમ ડેવિડે 23 રન અને જીતેશ શર્માએ અણનમ 19 રન બનાવ્યા હતા. રાજસ્થાન રોયલ્સ તરફથી સંદીપ શર્માએ 2 વિકેટ લીધી, જ્યારે જોફ્રા આર્ચર અને વાનિંદુ હસરંગાએ 1-1 વિકેટ લીધી.
