IPL 2025 22 માર્ચથી શરૂ થવા જઈ રહી છે. ઈડન ગાર્ડન્સ ખાતે યોજાનારી કોલકાતા વિરુદ્ધ બેંગ્લુરૂ મેચ પહેલા અહીં એક ભવ્ય ઓપનિંગ સેરેમનીનું આયોજન કરવામાં આવશે. વિશ્વની સૌથી મોટી ક્રિકેટ લીગની મેચો, જે 2 મહિના સુધી ચાલશે, 13 સ્થળોએ રમાશે. આઈપીએલ હોમ એન્ડ અવે ફોર્મેટમાં રમાશે.
આ સમય દરમિયાન, ટીમોને એક મેચથી બીજી મેચમાં અલગ અલગ સ્થળોએ જવું પડે છે, જે ખેલાડીઓ માટે પણ થકવી નાખે છે. IPL 2025 માં, RCB ટીમને સૌથી વધુ મુસાફરી કરવી પડશે જ્યારે સનરાઈઝર્સ હૈદરાબાદને સૌથી વધુ આરામ મળશે.
આઈપીએલની 10 ટીમો સાત હોમ અને સાત અવે એમ કુલ 14 મેચો રમશે. આ તમામને આઠ વિવિધ વેન્યૂમાં રમવાનું છે. દિલ્હી કેપિટલ્સ, રાજસ્થાન રોયલ્સ તથા પંજાબ કિંગ્સ એમ આ ત્રણ નવ વેન્યૂમાં રમશે. આ ત્રણેય ટીમોના બીજા હોમ ગ્રાઉન્ડ અનુક્રમે વિશાખાપટ્ટનમ, ગુવાહાટી તથા ધર્મશાલા છે. આઈપીએલની આગામી સિઝનમાં સનરાઈઝર્સ હૈદરાબાદનો કાર્યક્રમ સૌથી ઓછો થકવી નાખે તેવો છે. આ ટીમ સિઝનમાં સૌથી ઓછું ટ્રાવેલિંગ કરશે. રોયલ ચેલેન્જર્સ બેંગ્લુરુએ 17 હજાર પ્લસ કિલોમીટરનો પ્રવાસ કરવો પડશે.
પંજાબ કિંગ્સ અને KKRની પણ સ્થિતિ ખરાબ
જે ટીમોના બે હોમગ્રાઉન્ડ છે તેની સ્થિતિ વધારે ખરાબ છે. પંજાબ કિંગ્સનો કાર્યક્રમ ઘણો ચઢાવઉતારવાળો છે. મુલ્લાનપુર સિવાય તે ધર્મશાલામાં પણ પોતાની હોમ મેચ રમશે. આ કારણથી તેને વધારે ટ્રાવેલિંગ કરવાનું રહેશે. પંજાબ કિંગ્સ લીગ સ્ટેજ દરમિયાન 14,341 કિલોમીટરનો પ્રવાસ કરશે. બીજી તરફ કોલકાતા નાઈટ રાઈડર્સે પણ 13,537 કિલોમીટરનું અંતર કાપવું પડશે. લીગ તબક્કામાં તેની સૌથી મોટી સફર ત્રીજી મેચ માટે ગુવાહાટીથી મુંબઈ અને સાતમી મેચ માટે ચેન્નાઈથી મુલ્લાનપુર સુધીની રહેશે. ગુવાહાટીથી મુંબઈની એક ડિસ્ટન્સ 2079 કિલોમીટર છે અને તેના માટે લગભગ ત્રણ કલાકની ફ્લાઈટ મુસાફરી થશે.
RCBને રિકવરી માટે મળશે સૌથી ઓછો સમય
આઈપીએલ 2025માં સૌથી વધારે ટ્રાવેલિંગનો કાર્યક્રમ આરસીબીનો છે. લીગ સ્ટેજ દરમિયાન આ ટીમે લગભગ 17,084 કિલોમીટરનું ટ્રાવેલિંગ કરવું પડશે. જેમાં દક્ષિણ અને ઉત્તર ભારતની વચ્ચે 1,500 કિલોમીટરથી વધારાના સતત આઠ પ્રવાસ છે. આ સ્થિતિમાં આરસીબીના ખેલાડીઓને રિકવરી કરવા માટે ઘણો ઓછો સમય મળશે જે તેના માટે સૌથી મોટી સમસ્યા રહેશે. આરસીબી બાદ ચેન્નઈ સુપર કિંગ્સ ટીમે કુલ 16,184 કિલોમીટરનું ટ્રાવેલિંગ કરવું પડશે.
જાણો તમામ ટીમોની પરિસ્થિતિ
રાજસ્થાન રોયલ્સે જયપુર અને ગુવાહાટીને પોતાના હોમ ગ્રાઉન્ડ બનાવ્યા છે જેના કારણે તેની સમસ્યાઓમાં વધારો થયો છે. રાજસ્થાનની ટીમે આ વખત કુલ 12,730 કિલોમીટરનું ટ્રાવેલિંગ કરવાનું રહેશે. મુંબઈ ઈન્ડિયન્સ 12,702 તથા ગુજરાત ટાઈટન્સ પણ 10,405 કિલોમીટરની યાત્રા કરશે. લખનઉ સુપર જાયન્ટ્સ પણ 9,747 કિલોમીટરનું અંતર કાપશે. દિલ્હી કેપિટલ્સના પણ આ વખતે બે હોમગ્રાઉન્ડ છે. આ ટીમ દિલ્હી સિવાય વિશાખાપટ્ટનમમાં પણ મેચો રમશે. આ માટે તેને 9,270 કિલોમીટરની મુસાફરી કરવી પડશે. સનરાઈઝર્સ હૈદરાબાદ સૌથી મોટા ફાયદામાં રહેશે. તેને લીગ તબક્કામાટે સૌથી ઓછું 8,536 કિલોમીટરનું અંતર કાપવું પડશે જે અન્ય ટીમો કરતાં લોએસ્ટ છે.
