રાજસ્થાન રોયલ્સ અને પંજાબ કિંગ્સ વચ્ચેની મેચ 18 મેના રોજ જયપુરના સવાઈ માનસિંહ સ્ટેડિયમમાં રમાઈ. પંજાબે પહેલા બેટિંગ કરીને 219 રન બનાવ્યા, જેના જવાબમાં રાજસ્થાનને શાનદાર શરૂઆત મળી. રાજસ્થાન માટે ઓપનિંગ બેટ્સમેન તરીકે આવેલા યશસ્વી જયસ્વાલે ધૂમ મચાવી. તેને દિવસ દરમિયાન પંજાબના બોલરોને તારા બતાવ્યા.
યશસ્વી જયસ્વાલે મચાવી ધૂમ
યશસ્વી જયસ્વાલે પહેલી ઓવરમાં જ પંજાબ કિંગ્સના મુખ્ય ઝડપી બોલર અર્શદીપ સિંહને નિશાન બનાવ્યો. તેને પહેલી ઓવરમાં જ 22 રન બનાવ્યા. આ દરમિયાન તેને 4 ચોગ્ગા અને 1 છગ્ગો ફટકાર્યો. પહેલી ઓવરમાં વિસ્ફોટક બેટિંગ કરીને તેને પોતાનો ઈરાદો વ્યક્ત કર્યો કે તે આ મેચમાં ધૂમ મચાવશે. આ પછી પણ જયસ્વાલનું બેટિંગ અટક્યું નહીં. તેને વિસ્ફોટક બેટિંગ ચાલુ રાખી.
24 બોલમાં ફટકારી ધમાકેદાર ફિફ્ટી
યશસ્વી જયસ્વાલે 24 બોલમાં પોતાની ફિફ્ટી પૂરી કરી. આ દરમિયાન તેને 9 ચોગ્ગા સિવાય 1 છગ્ગો ફટકાર્યો. પરંતુ તે 25 બોલમાં 50 રન બનાવીને આઉટ થયો. 8.4 ઓવરમાં હરપ્રીત બ્રારે તેને આઉટ કર્યો.
યશસ્વી જયસ્વાલે પોતાની તોફાની ઈનિંગ્સના દમ પર ઓરેન્જ કેપ પણ કબજે કરી. તેને સૂર્યકુમાર યાદવને પાછળ છોડી દીધો. યશસ્વી જયસ્વાલ હવે 520 રન સાથે ટોપ પર પહોંચી ગયો છે. તેને 510 રન સાથે ઓરેન્જ કેપ ધારણ કરી રહેલા સૂર્યકુમાર યાદવને પાછળ છોડી દીધો.
યશસ્વી જયસ્વાલ સિવાય ઓપનર વૈભવ સૂર્યવંશીએ પણ શાનદાર બેટિંગ કરી હતી. તેને 15 બોલમાં 40 રન બનાવીને રાજસ્થાનને શાનદાર શરૂઆત અપાવી.
નેહલ વાઢેરા અને શશાંક સિંહની ધમાકેદાર ઈનિંગ
પંજાબ તરફથી નેહલ વાઢેરા અને શશાંક સિંહે પણ વિસ્ફોટક બેટિંગ કરી. નેહલ વાઢેરાએ 37 બોલમાં 70 રનની ઈનિંગ રમી, જેમાં તેને 5 ચોગ્ગા અને 5 છગ્ગા ફટકાર્યા. આ સિવાય શશાંક સિંહે પણ 30 બોલમાં 59 રનની શાનદાર ઈનિંગ રમી હતી. શશાંકે 5 ચોગ્ગા અને 3 છગ્ગા ફટકાર્યા. પંજાબે 20 ઓવરમાં 5 વિકેટ ગુમાવીને 219 રન બનાવ્યા હતા.
