તમામ ક્રિકેટ ચાહકો જેની આતુરતાથી રાહ જોઈ રહ્યા હતા તેનો હવે અંત આવ્યો છે. ઈન્ડિયન પ્રીમિયર લીગ IPL 2025 નું શેડ્યુલ જાહેર થઇ ગયું છે. ભારતીય ક્રિકેટ કંટ્રોલ બોર્ડ (BCCI) એ IPL 2025 નું ટાઇમ ટેબલ જાહેર કર્યું છે. આ વખતે IPL 22 માર્ચથી શરૂ થશે. પ્રથમ મેચ kkr અને rcb વચ્ચે યોજાશે. 22 માર્ચે કોલકાતાના ઈડન ગાર્ડનમાં રમાશે. 17 વર્ષ બાદ બંને ટીમો IPLની ઓપનર મેચ રમવા જઈ રહી છે. આ પહેલા RCB અને KKR 2008માં ઓપનિંગ મેચ રમી હતી. આ વખતે IPLમાં 65 દિવસ રહેશે. આ સમયગાળા દરમિયાન, 13 સ્થળોએ પ્લેઓફ અને ફાઈનલ સહિત 74 મેચો રમાશે. તેમાંથી 70 મેચ ગ્રુપ સ્ટેજની હશે. 25 મે ના રોજ આઇપીએલ ફાઇનલ રમાશે.
IPL 22 માર્ચ શનિવારથી શરૂ થશે. પ્રથમ 2 દિવસમાં 3 મેચ રમાશે. KKR અને RCBની શરૂઆતની મેચ બાદ બીજા દિવસે એટલે કે 23 માર્ચ રવિવારના રોજ બપોરે 3.30 વાગ્યાથી સનરાઈઝર્સ હૈદરાબાદ અને રાજસ્થાન રોયલ્સ વચ્ચે સીઝનની પ્રથમ ટક્કર થશે. તે જ દિવસે સાંજે 7.30 વાગ્યાથી ચેન્નાઈ સુપર કિંગ્સ અને મુંબઈ ઈન્ડિયન્સ વચ્ચે બ્લોકબસ્ટર મેચ રમાશે.
CSK બે વખત MI અને RCB સામે ટકરાશે
IPLમાં ચેન્નાઈ, મુંબઈ અને બેંગલુરુની ટીમો પાસે સૌથી વધુ ચાહકોનો આધાર છે. ચાહકો આ ત્રણેય ટીમોની મેચની આતુરતાથી રાહ જોઈ રહ્યા છે. આને સમજીને, BCCIએ CSK માટે RCB અને MI સામે બે-બે મેચો શેડ્યૂલ કરી છે. ચેન્નાઈની ટીમ ચેપોકમાં 23 માર્ચે મુંબઈ સામે પ્રથમ વખત ટકરાશે. 20 એપ્રિલે બંને ટીમો વાનખેડે ખાતે આમને-સામને ટકરાશે. CSKની RCB સામે પ્રથમ મેચ 28 માર્ચે ચેપોકમાં રમાશે, જ્યારે બીજી વખત બંને ટીમો 3 મેના રોજ ચિન્નાસ્વામી સ્ટેડિયમમાં ટકરાશે.
IPL 2025 નોકઆઉટ મેચો
IPL 2025માં ગ્રુપ સ્ટેજની 70 મેચો રમાશે. આ પછી લીગની ટોચની 4 ટીમો પ્લેઓફ માટે ટકરાશે. આ વખતે પ્લેઓફમાં પ્રથમ મેચ એટલે કે ક્વોલિફાયર-1 20મી મેના રોજ રમાશે. એલિમિનેટર મેચ 21 મેના રોજ જ્યારે ક્વોલિફાયર-2 માટે મેચ 23 મેના રોજ યોજાશે. છેલ્લે 25 મેના રોજ ફાઇનલમાં બે ટીમો ટાઇટલ માટે ટકરાશે.
