સનરાઈઝર્સ હૈદરાબાદ અને દિલ્હી કેપિટલ્સ વચ્ચેની મેચ વરસાદને કારણે રદ્દ કરવામાં આવી છે. આ મેચમાં હૈદરાબાદના કેપ્ટન પેટ કમિન્સે ટોસ જીતીને પહેલા બોલિંગ કરવાનો નિર્ણય લીધો હતો. આ પછી દિલ્હીની ટીમ ફક્ત 133 રન જ બનાવી શકી.
દિલ્હીનો દાવ પૂરો થતાં જ મેચ દરમિયાન વરસાદ પડ્યો અને હૈદરાબાદની ટીમ બેટિંગ કરવા માટે મેદાનમાં આવી શકી નહીં. આ પછી, મેદાન ખૂબ ભીનું હોવાથી, અમ્પાયરોએ મેચ રદ્દ કરવાનો નિર્ણય લીધો અને બંને ટીમોને એક-એક પોઈન્ટ આપવામાં આવ્યો.
સનરાઈઝર્સ હૈદરાબાદની ટીમ પ્લેઓફની દોડમાંથી બહાર
સનરાઈઝર્સ હૈદરાબાદની ટીમે અત્યાર સુધીમાં IPLમાં કુલ 11 મેચ રમી છે, જેમાંથી ટીમ ફક્ત ત્રણમાં જ જીતી શકી છે અને એક મેચ વરસાદને કારણે રદ્દ થઈ હતી. હાલમાં, 7 પોઈન્ટ સાથે, તેનો નેટ રન રેટ માઈનસ 1.192 છે. ચાલુ સિઝનમાં તેની ત્રણ મેચ બાકી છે. જો તે આ મેચો જીતી જાય તો પણ તે મહત્તમ 13 પોઈન્ટ સુધી પહોંચી જશે. RCB, પંજાબ કિંગ્સ, મુંબઈ ઈન્ડિયન્સ, ગુજરાત ટાઈટન્સ અને દિલ્હી કેપિટલ્સ પાસે પોઈન્ટ ટેબલમાં 14 કે તેથી વધુ પોઈન્ટ છે. આ પરિસ્થિતિમાં, તે પોઈન્ટ ટેબલના ટોપ-4માં પહોંચી શકશે નહીં. આ કારણે, તેઓ પ્લેઓફની દોડમાંથી બહાર થઈ ગયા છે અને IPL ટાઈટલ જીતવાનું તેમનું સ્વપ્ન ચકનાચૂર થઈ ગયું છે. જો વરસાદ ન પડ્યો હોત અને SRH મેચ જીતી ગયું હોત, તો પ્લેઓફ માટેની તેમની આશા અકબંધ રહી હોત, પરંતુ એવું બન્યું નહીં.
દિલ્હી કેપિટલ્સના બેટ્સમેન ગયા નિષ્ફળ
દિલ્હી કેપિટલ્સની શરૂઆત ખૂબ જ ખરાબ રહી કારણ કે ઓપનર કરુણ નાયર ખાતું ખોલાવ્યા વિના પેવેલિયન પરત ફર્યો. તે પેટ કમિન્સના બોલ પર આઉટ થયો. બાદમાં ફાફ ડુ પ્લેસિસ 3 રને અને અભિષેક પોરેલ 8 રને પોતાની ઈનિંગ્સને મોટા સ્કોરમાં રૂપાંતરિત કરવામાં નિષ્ફળ ગયો અને આઉટ થઈ ગયો. પેટ કમિન્સ સામે દિલ્હી કેપિટલ્સના બેટ્સમેન લાચાર હતા. કેએલ રાહુલને 10 રન અને અક્ષર પટેલને 6 રન બનાવવા માટે સંઘર્ષ કરવો પડ્યો.
આ પરિસ્થિતિમાં, ફેન્સને લાગ્યું કે દિલ્હી કેપિટલ્સ ટીમ ખૂબ જ ઓછા સ્કોર પર આઉટ થઈ જશે. ત્યારબાદ આશુતોષ શર્મા અને ટ્રિસ્ટન સ્ટબ્સે 41-41 રનની ઈનિંગ્સ રમી અને ટીમને 100 રનના આંકને પાર પહોંચાડી. દિલ્હી કેપિટલ્સની ટીમે નિર્ધારિત 20 ઓવરમાં 133 રન બનાવ્યા.
પેટ કમિન્સે લીધી ત્રણ વિકેટ
સનરાઈઝર્સ હૈદરાબાદ માટે પેટ કમિન્સ સૌથી મોટો હીરો સાબિત થયો. તેને મેચની ચાર ઓવરમાં 19 રન આપીને ત્રણ મહત્વપૂર્ણ વિકેટ લીધી. જ્યારે જયદેવ ઉનડકટ, ઈશાન મલિંગા અને હર્ષલ પટેલે એક-એક વિકેટ લીધી હતી. આ બોલરોના કારણે દિલ્હીની ટીમ મોટો સ્કોર કરી શકી નહીં.
